ସହଜ ନଥିଲା ସଫଳତାର ଯାତ୍ରା

ବଲିଉଡର ଅନ୍ୟତମ ସଫଳ ଏବଂ ଚର୍ଚ୍ଚିତ ଅଭିନେତ୍ରୀ ଭାବେ ଗଣାଯାଉଥିବା କିଆରା ଆଡଭାନୀଙ୍କ ପାଇଁ ସଫଳତାର ଶୀର୍ଷରେ ପହଞ୍ଚିବା ଆଦୌ ସହଜ ନଥିଲା । ୩୧ ଜୁଲାଇ ୧୯୯୨ରେ ମୁମ୍ବାଇରେ ଜନ୍ମିତ କିଆରା ଜଣେ ବ୍ୟବସାୟୀ ପିତା ଓ ଶିକ୍ଷୟିତ୍ରୀ ମାଆଙ୍କ ଝିଅ ଭାବେ ବଡ଼ ହୋଇଥିଲେ ଏବଂ ଅଭିନୟକୁ ଆସିବା ପୂର୍ବରୁ ଏକ ପ୍ରି-ସ୍କୁଲରେ ଶିକ୍ଷୟିତ୍ରୀ ଭାବେ କାର୍ଯ୍ୟ କରୁଥିଲେ । ସଲମାନ ଖାନଙ୍କ ପରିବାର ସହ ପାରିବାରିକ ସମ୍ପର୍କ ଥିଲେ ମଧ୍ୟ ସେ ଏହାର କୌଣସି ସୁଫଳ ପାଇନଥିଲେ । କେବଳ ପରିଚୟ ବଳରେ ନୁହେଁ, ବରଂ ନିଜ ସଂଘର୍ଷ ଓ ଯୋଗ୍ୟତା ଯୋଗୁଁ ସେ ଫିଲ୍ମ ଇଣ୍ଡଷ୍ଟ୍ରିରେ ସ୍ଥାନ ପାଇଛନ୍ତି ବୋଲି ସେ ଅନେକ ସମୟରେ ମତ ଦେଇଛନ୍ତି । ୨୦୧୪ରେ 'ଫଗଲି' ଫିଲ୍ମରୁ ଡେବ୍ୟୁ କରିଥିବା କିଆରାଙ୍କ ପ୍ରଥମ ଫିଲ୍ମ ବକ୍ସ ଅଫିସରେ ଫ୍ଲପ୍ ହେବା ପରେ ମାସ ମାସ ଧରି ତାଙ୍କୁ କୌଣସି କାମ ମିଳିନଥିଲା । ୨୦୧୬ରେ 'ଏମ୍.ଏସ୍. ଧୋନି : ଦି ଅନଟୋଲ୍ଡ ଷ୍ଟୋରୀ' ପରି ସୁପରହିଟ୍ ଫିଲ୍ମରେ ସାକ୍ଷୀ ଧୋନିଙ୍କ ଭୂମିକା ନିଭାଇବା ପରେ ମଧ୍ୟ ତାଙ୍କୁ କ୍ରମାଗତ ଅଡିସନ ଓ ରିଜେକ୍ସନର ସାମ୍ନା କରିବାକୁ ପଡ଼ିଥିଲା । ଏପରିକି ଆରମ୍ଭ ଦିନରେ ବଡ଼ ଫ୍ୟାଶନ ଡିଜାଇନରମାନେ ମଧ୍ୟ ତାଙ୍କୁ ରେଡ୍ କାର୍ପେଟ୍ ପାଇଁ ପୋଷାକ ଦେବାକୁ ମନା କରିଦେଇଥିଲେ । ତେବେ ସୋସିଆଲ ମିଡିଆ ଟ୍ରୋଲିଂ, ଅଭିନୟକୁ ନେଇ ସମାଲୋଚନା ଓ ପ୍ରତ୍ୟାଖ୍ୟାନରେ ଭାଙ୍ଗି ନପଡ଼ି ସେ ଆକ୍ଟିଂ ୱାର୍କସପ୍ ମାଧ୍ୟମରେ ନିଜ ଦକ୍ଷତାକୁ ସୁଧାରିଥିଲେ । ଯାହାର ଫଳସ୍ୱରୂପ 'କବୀର ସିଂ' ଏବଂ ପରବର୍ତ୍ତୀ ବ୍ଲକବଷ୍ଟର ଫିଲ୍ମଗୁଡ଼ିକ ମାଧ୍ୟମରେ ସେ ଆଜି କୋଟି କୋଟି ପ୍ରଶଂସକଙ୍କ ହୃଦୟ ଜିତିବା ସହ ବଲିଉଡ୍ ଓ ଫ୍ୟାଶନ ଜଗତର ପ୍ରଥମ ପସନ୍ଦ ପାଲଟିପାରିଛନ୍ତି ।