ଷ୍ଟଣ୍ଟ ଦେବ ପରିଚୟ

ନିଜର ଚୁଲବୁଲି ଅନ୍ଦାଜ ପାଇଁ ଘରେଘରେ ପରିଚିତ ଥିବା ପ୍ରନାଲୀ ରାଠୋଡ ବର୍ତ୍ତମାନ ନିଜର ଆଉ ଏକ ଅନ୍ଦାଜ ଦର୍ଶକଙ୍କୁ ଦେଖେଇବାକୁ ପ୍ରସ୍ତୁତ ହେଉଥିବା ନେଇ ଚର୍ଚ୍ଚା ହେଉଛି । ଖୁବଶୀଘ୍ର ତାଙ୍କୁ ଖତରୋଁ କି ଖିଲାଡିରେ ଦେଖିବାକୁ ମିଳିବ, ଯାହାକୁ ନେଇ ତାଙ୍କ ଫ୍ୟାନମାନେ ଖୁବ ଖୁସି ଅଛନ୍ତି ।

ଟେଲିଭିଜନ ଜଗତର ଜଣେ ଆଗଧାଡ଼ିର ତଥା ଲୋକପ୍ରିୟ ଅଭିନେତ୍ରୀ ଭାବେ ନିଜକୁ ପ୍ରତିଷ୍ଠିତ କରିଥିବା ପ୍ରନାଲୀ ରାଠୋଡ଼ଙ୍କ ସଫଳତା ପଛରେ ଏକ ଦୀର୍ଘ ସଂଘର୍ଷମୟ କାହାଣୀ ଲୁଚି ରହିଛି। ମହାରାଷ୍ଟ୍ରର ମୁମ୍ବାଇରେ ଜନ୍ମିତ ପ୍ରନାଲୀଙ୍କ କ୍ୟାରିୟର ଜଣେ ମଡେଲ ଭାବେ ଆରମ୍ଭ ହୋଇଥିଲା, କିନ୍ତୁ ଅଭିନୟ କ୍ଷେତ୍ରରେ ପାଦ ଥାପିବା ତାଙ୍କ ପାଇଁ ସହଜ ନଥିଲା । ପ୍ରାରମ୍ଭିକ ପର୍ଯ୍ୟାୟରେ ସେ ଅନେକ ଅଡିସନ ଦେଇଥିଲେ ଏବଂ ଅନେକ ଥର ପ୍ରତ୍ୟାଖ୍ୟାନର ଶିକାର ହୋଇଥିଲେ ମଧ୍ୟ ହାର ମାନି ନଥିଲେ । ଯାହା ଶେଷରେ ତାଙ୍କୁ ‘ଜାତ କହାଁ ସେ ଆଇ ହୈ’ ଏବଂ ‘କ୍ୟୁଁ ଉଥେ ଦିଲ୍ ଛୋଡ୍ ଆୟେ’ ଭଳି ଧାରାବାହିକରେ ସୁଯୋଗ ଆଣିଦେଇଥିଲା । ତେବେ ତାଙ୍କ ଜୀବନର ସବୁଠାରୁ ବଡ଼ ସଫଳତା ଥିଲା ‘ୟେ ରିଶ୍ତା କ୍ୟା କେହଲାତା ହୈ’ରେ ଅକ୍ଷରା ଗୋଏଙ୍କାଙ୍କ ଚରିତ୍ର । ଯାହା ତାଙ୍କୁ ରାତାରାତି ଘରେ ଘରେ ପରିଚିତ କରାଇବା ସହ ଜଣେ ପାୱାରହାଉସ୍ ପରଫର୍ମର ଭାବେ ସାବ୍ୟସ୍ତ କରିଥିଲା । ବ୍ୟକ୍ତିଗତ ଜୀବନକୁ ନେଇ ଅନେକ ସମୟରେ ସେ ଚର୍ଚ୍ଚାରେ ରହିଥାଆନ୍ତି ।  ସହ-ଅଭିନେତା ହର୍ଷଦ ଚୋପଡ଼ାଙ୍କ ସହ ତାଙ୍କର ନିବିଡ଼ ସମ୍ପର୍କ ସର୍ବଦା ଗଣମାଧ୍ୟମର ଶିରୋନାମା ପାଲଟିଥାଏ । ତେବେ ବର୍ତ୍ତମାନ ସେ ନିଜର ଇନୋସେଣ୍ଟ ଇମେଜକୁ ପଛରେ ପକାଇ ରୋହିତ ସେଟ୍ଟୀଙ୍କ ସାହସିକ ରିଆଲିଟି ଶୋ' ‘ଖତରୋଁ କେ ଖିଲାଡ଼ି’ ପ୍ରୋଜେକ୍ଟରେ ସାମିଲ ହୋଇଥିବା ଖବର ପ୍ରଶଂସକଙ୍କ ମଧ୍ୟରେ ବେଶ୍ ଚର୍ଚ୍ଚାର ବିଷୟ ପାଲଟିଛି । ଏହି ଶୋରେ ସେ ନିଜର ଶାରୀରିକ ଓ ମାନସିକ ସାହସର ପରିଚୟ ଦେଇ ସମସ୍ତ ବିପଜ୍ଜନକ ଷ୍ଟଣ୍ଟକୁ ସଫଳତାର ସହ ସାମ୍ନା କରିବେ ବୋଲି ଫ୍ୟାନମାନେ ଆଶା ରଖିଛନ୍ତି । ଏହି ନୂଆ ଫେଜ ପ୍ରନାଲୀଙ୍କ ବହୁମୁଖୀ ପ୍ରତିଭାକୁ ଦର୍ଶାଉଛି ଏବଂ ଜଣେ ସଂଘର୍ଷରତ କଳାକାରରୁ ଷ୍ଟାର ହେବା ପର୍ଯ୍ୟନ୍ତ ତାଙ୍କର ଏହି ସଫଳତା ଯୁବପିଢ଼ିଙ୍କ ପାଇଁ ଏକ ବଡ଼ ପ୍ରେରଣା ସାଜିଛି ।