ରାଜସ୍ଥାନ: ସେପ୍ଟେମ୍ବର ୨୦: ଘରୁ ବାହାରୁଥିବା ବିଭିନ୍ନ ଆବର୍ଜନା ଆଜିକାଲିର ଏକ ବଡ଼ ସମସ୍ୟା । ଏହା ବିଭିନ୍ନ ସ୍ଥାନରେ ଥିବା ନାଳ, ଡ୍ରେନ୍, ନଦୀ ଆଦିକୁ ପ୍ରଦୂଷଣ କରିବାରେ ଲାଗିଛି । ସବୁଠାରୁ ଭୟଙ୍କର ହେଉଛି ଘରେ ବ୍ୟବହାର ହେଉଥିବା କେତେକ ଆବର୍ଜନା ଅନେକ ବର୍ଷ ନେଇଥାଏ ନଷ୍ଟ ହେବାକୁ । ଯେପରି ପ୍ଲାଷ୍ଟିକ ନଷ୍ଟ ହେବାକୁ ପ୍ରାୟ ଶହେ ବର୍ଷରୁ ଅଧିକ ଲାଗିଥାଏ, ସେହିଭଳି କାଚ ଅଗଣିତ ବର୍ଷ । ତେଣୁ ଏଭଳି ଆବର୍ଜନା ଜମା ହେବା ଫଳରେ ଅନେକ ସମସ୍ୟା ଉପୁଜିଥାଏ । ହେଲେ ଏହି ସମସ୍ୟାରୁ ବର୍ତ୍ତିବା ପାଇଁ ଅନେକ ଉପାୟ କରାଯାଉଛି ।
ରାଜସ୍ଥାନର ଯୋଧପୁରରେ ଏହି ଆବର୍ଜନାକୁ ବ୍ୟବହାର କରି ଏକ ବ୍ୟବହାର ଯୋଗ୍ୟ ସାମଗ୍ରୀ ପ୍ରସ୍ତୁତ କରାଯାଉଛି । ଏଠାରେ ଏହି ଆବର୍ଜନାରୁ ‘ଡ୍ରାଏ-ଫୁଏଲ୍’ ପ୍ରସ୍ତୁତ କରାଯାଉଛି । ଯୋଧପୁର ନଗର ନିଗମ ପକ୍ଷରୁ ଏହି ପ୍ରୋଜେକଫର ଆରମ୍ଭ କରାଯାଇଛି । ଏହି ପ୍ରକଳ୍ପ ଅଧୀନରେ ସବୁ ମାସରେ ୯୦୦ ଟନ ଡ୍ରାଏ-ଫୁଏଲ୍ ପ୍ରସ୍ତୁତ କରାଯାଉଛି । ଏହା ପ୍ରସ୍ତୁତ ପରେ ସିଧା ସିମେଣ୍ଟ ଫ୍ୟାକ୍ଟ୍ରିକୁ ପଠାଯାଇଥାଏ । ଯାହା ବଦଳରେ ନିଗମକୁ ପ୍ରାୟ ପ୍ରତିଦିନ ଦେଢ ଲକ୍ଷ ଟଙ୍କା ମିଳିଥାଏ । ଯୋଧପୁରରେ ଏଭଳି ତିନୋଟି ପ୍ଲାଣ୍ଟ ରହିଛି । ପ୍ରତିଦିନ ସହରରୁ ପ୍ରାୟ ୫୦ ଟନ୍ ଆବର୍ଜନା ବାହାରିଥାଏ । ଏଥିରେ ବିଭିନ୍ନ ପ୍ରକାରର ଆବର୍ଜନା ରହିଥାଏ । ଯାହାକୁ ବ୍ୟବହାର କରି ଡ୍ରାଏ-ଫୁଏଲ୍ ପ୍ରସ୍ତୁତ କରାଯାଉଛି । ଏହି ପ୍ଲାଣ୍ଟରେ ପ୍ରାୟ ୭୫ ଲକ୍ଷର ମେସିନ୍ ଲଗାଯାଇଛି, ଯାହା ଏହି ସମସ୍ତ ଆବର୍ଜନାରୁ ଡ୍ରାଏ -ଫୁଏଲ୍ ପ୍ରସ୍ତୁତ କରୁଛି । ସେହିଭଳି ପ୍ରକଳ୍ପ ଅଧୀନରେ ପ୍ରାୟ ୩୦୦ ଲୋକ ରୋଜଗାର କ୍ଷମ ମଧ୍ୟ ହୋଇପାରିଛନ୍ତି । ତେଣୁ ଏହା ସହରର ଆବର୍ଜନା କମ କରିବା ସହ ଲୋକଙ୍କୁ ରୋଜଗାର ମଧ୍ୟ ଯୋଗାଉଛି ।
Comments are closed.