କାରାବାସର ଅର୍ଥ ହେଲା ଦଣ୍ଡ ଏବଂ ଦଣ୍ଡ ମାନେ କଷ୍ଟ ଭୋଗିବା । ହେଲେ ବିଶ୍ୱରେ ଏଭଳି କେତେକ କାରାଦଣ୍ଡ ରହିଛି ଯାହା ନର୍କ ସଦୃଶ । ଏଠାରେ କଏଦୀଙ୍କୁ ପଶୁ ଭଳି ବ୍ୟବହାର କରାଯାଇଥାଏ । ଏହି ଜେଲ୍ ଗୁଡିକ ବିଭିନ୍ନ ସମସ୍ୟା ଦେଖିବାକୁ ମିଳିଥାଏ ଯେପରି ଗଣ୍ଡଗୋଳ, ମାରାତ୍ମକ ସଂକ୍ରମଣ ରୋଗ, ପୋଲିସ ବା ସୁରକ୍ଷାକର୍ମୀଙ୍କ ଦ୍ୱାରା କଏଦୀମାନେ ନିର୍ଯ୍ୟାତିତ ହୋଇଥାଆନ୍ତି । । ଆସନ୍ତୁ ଜାଣିବା ସେହିଭଳି କିଛି ଭୟଙ୍କର ଜେଲ୍ ବିଷୟରେ
ଗୀତାରାମ ଜେଲ୍, ରଓ୍ୱାନ୍ଦା
ଦକ୍ଷିଣ ଆଫ୍ରିକାର ରଓ୍ୱାନ୍ଦା ଦେଶରେ ରହିଛି ଗୀତାରାମ ଜେଲ୍ । ଏହି ଜେଲକୁ ବିଶ୍ୱର ସବୁଠାରୁ ଭୟଙ୍କର କାରାବାସ ଭିତରେ ଗଣା ଯାଇଥାଏ । ଏହି ଜେଲ୍ରେ ପାଖାପାଖି ୬ହଜାରରୁ ୭ହଜାର ପର୍ଯ୍ୟନ୍ତ କଏଦୀ ଦଣ୍ଡ ଭୋଗୁଥାଆନ୍ତି । ହେଲେ ଏହି ଜେଲ୍ର କ୍ଷମତା ହେଲା ମାତ୍ର ୬୦୦ ଜଣ କଏଦୀଙ୍କୁ ରଖିବା । ଯାହାଫଳରେ ଏଠାରେ ଥିବା କଏଦୀମାନେ ନାହିଁ ନଥିବା ସମସ୍ୟାର ସମ୍ମୁଖୀନ ହୋଇଥାଆନ୍ତି । ଏଠାରେ ଥିବା ଅନେକ କଏଦୀ ଛିଡା ହୋଇ ସମୟ କାଟି ଥାଆନ୍ତି । ତେବେ ସୂଚନା ମୂତାବକ ଏଠାରେ ବିଭିନ୍ନ ସମସ୍ୟା ରହିଥିବାରୁ ପ୍ରତିଦିନ କଏଦୀଙ୍କର ମୃତ୍ୟୁ ମଧ୍ୟ ହୋଇଥାଏ । ଏମାନଙ୍କୁ ଏଠାରେ ଖାଦ୍ୟ ପାଇଁ ଅନେକ ସଂଘର୍ଷ କରିବାକୁ ହୋଇଥାଏ । ଏପରିକି ସେମାନେ ନିଜ ନିଜ ଭିତରେ ଖାଦ୍ୟପାଇଁ ଗଣ୍ଡଗୋଳ କରି ଅନ୍ୟ କଏଦୀଙ୍କୁ ହତ୍ୟା ମଧ୍ୟ କରିଥାଆନ୍ତି । ତଥ୍ୟ ଅନୁସାରେ ମୃତକଙ୍କ ମାଂସ ଅନ୍ୟ କଏଦୀମାନେ ଖାଦ୍ୟଭାବେ ଗ୍ରହଣ କରିଥାଆନ୍ତି । ଏଠାରେ କଏଦୀମାନଙ୍କୁ ସବୁ ସମୟରେ ଖାଲି ପାଦରେ ଦେଖିବାକୁ ମିଳିଥାଏ । ଏଠିକାର ଅବ୍ୟବସ୍ଥା ସମ୍ପର୍କରେ ଅନେକ ସମୟରେ ଅନେକ ହ୍ୟୁମାନ ରାଇଟ୍ସ ସଂସ୍ଥା ଦ୍ୱାରା ଆପତ୍ତି ଉଠା ଯାଇଛି, ହେଲେ ଏହାର କୌଣସି ସମାଧାନ ହୋଇନାହିଁ । ଏବେ ମଧ୍ୟ ସେଠାରେ କଏଦୀମାନେ ଏହିଭଳି ଯନ୍ତ୍ରଣା ଦାୟକ ପରିସ୍ଥିତିରେ ଦଣ୍ଡ ଭୋଗୁଛନ୍ତି । ଏହି ଜେଲ୍ର ସମସ୍ୟା ଆଜିକାଲି ନୁହେଁ ବରଂ ଅନେକ ବର୍ଷର । ୧୯୯୫ରେ ଏନେଇ ଏକ ରିପୋର୍ଟ ପ୍ରକାଶ ପାଇବା ପରେ ସାରା ବିଶ୍ୱରେ ଚର୍ଚ୍ଚା ଆରମ୍ଭ ହୋଇଥିଲା । ହେଲେ ଏନେଇ କୌଣସି ପଦକ୍ଷେପ ନିଆଯାଇନଥିବା ସୂଚନା ରହିଛି ।
ବାଙ୍ଗ୍ କ୍ୱାଙ୍ଗ୍ ପ୍ରିଜନ୍, ବ୍ୟାଙ୍ଗକକ୍
ବାଙ୍ଗ୍ କ୍ୱାଙ୍ଗ୍ ପ୍ରିଜନ୍ ଏଠିକାର ସାଧାରଣ ଲୋକଙ୍କ ଭିତରେ ବ୍ୟାଙ୍ଗ୍କକ୍ ହିଲଫନ ନାମରେ ପରିଚିତ । ଏହି ଜେଲ୍ରେ ପାଖାପାଖି ୬ହଜାର କଏଦୀ ରହୁଛନ୍ତି । ତେବେ ଏହି ଜେଲ୍ର ଅଧିକାରୀଙ୍କ ନାଁରେ ଅନେକ ଅଭିଯୋଗ ରହିଛି, ଯେପରି କଏଦୀଙ୍କୁ ଏଠାରେ ବିଭିନ୍ନ ମାନସିକ ଓ ଶାରୀରିକ ଯନ୍ତ୍ରଣା ଦିଆଯାଇଥାଏ । ଏଠାରେ କଏଦୀଙ୍କୁ ଖୁବ ଛୋଟଛୋଟ କୋଠରୀରେ ରଖାଯାଇଥାଏ, ଯେଉଁଠାରେ ସେମାନଙ୍କୁ ରହିବା ପାଇଁ ଅନେକ ସମସ୍ୟା ହୋଇଥାଏ । ଏଠାରେ ସେମାନଙ୍କୁ ଲୁହା ବେଡି ପକାଇ ରଖାଯାଇଥାଏ । ସେହିଭଳି ତଥ୍ୟ ଅନୁସାରେ ଏଠାରେ କଏଦୀଙ୍କୁ ମାତ୍ର ଥରେ ଖାଇବାକୁ ଦିଆଯାଇଥାଏ, ଯାହା ପୁଣି ଖୁବ କମ ପରିମାଣର । ଏହି ସମସ୍ତ କାରଣ ପାଇଁ ଏଠାରେ ଅନେକ କଏଦୀଙ୍କର ମୃତ୍ୟୁ ହେଉଥିବାର ଦେଖିବାକୁ ମିଳେ ।
କମିଟି ମ୍ୟାକ୍ସିମମ୍ ସିକ୍ୟୁରିଟି ପ୍ରିଜନ୍, କେନିଆ
କେନିଆର ଏହି ଜେଲ୍କୁ ୧୪୦୦ କଏଦୀଙ୍କ ପାଇଁ ନିର୍ମାଣ କରାଯାଇଥିଲା । ହେଲେ ଏହି କାରାବାସରେ ୩୫୦୦ରୁ ଅଧିକ କଏଦୀଙ୍କୁ ଦଣ୍ଡ ଭୋଗିବା ପାଇଁ ଛଡା ଯାଇଥାଏ । ଯେଉଁ କାରଣରୁ କଏଦୀଙ୍କ ଜୀବନଶୈଳୀ ଏଠାରେ ଖୁବ ଖରାପ ହୋଇଥାଏ । ସେମାନଙ୍କୁ ରହିବା ପାଇଁ ପର୍ଯ୍ୟାପ୍ତ ଯାଗା କିମ୍ବା ଖାଇବା ପାଇଁ ପର୍ଯ୍ୟାପ୍ତ ଖାଦ୍ୟ ମିଳୁନାହିଁ । କେବଳ ଖାଦ୍ୟ ନୁହେଁ ଏଠାରେ କଏଦୀଙ୍କୁ ପାଣି ମଧ୍ୟ ମିଳିନଥାଏ । ପ୍ରତିଦିନ ପାଖାପାଖି ୨୦୦ ଜଣ କଏଦୀ ଏଠାରେ ପାଣି ପାଇଁ ସଂଘର୍ଷ କରିଥାଆନ୍ତି । ସେହିଭଳି ଏଠାରେ କାମ କରୁଥିବା କଏଦୀଙ୍କୁ ଦିନକୁ ମାତ୍ର ୧୦ ସେଣ୍ଟ୍ ମିଳିଥାଏ । ଏଠାରେ ଦଣ୍ଡ ଭୋଗିବାକୁ ଥିବା କଏଦୀଙ୍କ ମଧ୍ୟରେ ବି ବିଭିନ୍ନ ଅପରାଧ ହୋଇଥାଏ । ଏଠାରେ ଜେଲ ଭିତରେ ଗଣ୍ଡଗୋଳ ଏପରିକି ବଳତ୍କାର ମାମଲା ମଧ୍ୟ ସାମନାକୁ ଆସିଛି । ଅନେକ ସମୟରେ କଏଦୀମାନଙ୍କୁ ଏଠାରେ ମହାମାରୀରେ ମରିବାର ମଧ୍ୟ ଦେଖିବାକୁ ମିଳିଛି ।
ଭାଲଦିମିର୍ ସେଣ୍ଟ୍ରାଲ୍ ପ୍ରିଜନ, ରୁଷ୍
ରୁଷ୍ର ସବୁଠାରୁ ବଡ ଜେଲ୍ ଭାବେ ଭାଲଦିମିର୍ ସେଣ୍ଟ୍ରାଲ୍ ପ୍ରିଜନ ପରିଚିତ । ଏହି ଜେଲରେ ୧୨୨୦ ଜଣ କଏଦୀ ରହିବା ପାଇଁ ସ୍ଥାନ ରହିଛି । ଯେଉଁଥିରେ ଅଧିକତର କଏଦୀଙ୍କୁ ୧୦ ବର୍ଷର ଜେଲ୍ ଦଣ୍ଡରେ ଦଣ୍ଡିତ କରାଯାଇଥାଏ । ହେଲେ ବର୍ତ୍ତମାନ ଏହି ଜେଲର ଅବସ୍ଥା ଭୟଙ୍କର । ଏଠାରେ ବର୍ତ୍ତମାନ ଏତେ ମାତ୍ରାରେ କଏଦୀଙ୍କୁ ରଖା ଯାଉଛି ଯେଉଁ କାରଣରୁ ଏହାଭିଡ ପୂର୍ଣ୍ଣ ଜେଲ୍ରେ ପରିଣତ ହୋଇଛି । କଏଦୀଙ୍କୁ ଏଠାରେ ମାତ୍ରାଧିକ ନିର୍ଯ୍ୟାତନା ଦିଆଯାଉଥିବାର ସୂଚନା ରହିଛି । ଏଠାରେ ନିୟୋଜିତ ଗାର୍ଡଙ୍କ ଦ୍ୱାରା ସେମାନଙ୍କୁ ମରା ଯାଉଥିବା ମଧ୍ୟ ଅଭିଯୋଗ ହୋଇଥାଏ । ଏହି ମାଡରେ କଏଦୀଙ୍କ ମୃତ୍ୟୁ ମଧ୍ୟ ହୋଇଥାଏ ବୋଲି ଅଭିଯୋଗ ଆସିଥାଏ । ତେବେ ଏନେଇ ଅନେକ ସମୟରେ ଚର୍ଚ୍ଚା ହୋଇଥିଲେ ମଧ୍ୟ ଏଥିରେ କିଛି ପରିବର୍ତ୍ତନ ହେଉ ନଥିବା ଦେଖିବାକୁ ମିଳିଛି ।
Comments are closed.