ଇଣ୍ଡୋନେସିଆରେ ଭୀଷଣ ଭୂମିକମ୍ପ

ନୂଆଦିଲ୍ଲୀ : ଆଜି ଇଣ୍ଡୋନେସିଆର ଟୋବେଲୋରେ ଭୀଷଣ ଭୂମିକମ୍ପ ଅନୁଭୂତ ହୋଇଛି। ତୁର୍କୀ, ସିରିଆ, ଆଫଗାନିସ୍ତାନ, ତାଜିକିସ୍ତାନ ଏବଂ ଚୀନ୍ ପରେ ଇଣ୍ଡୋନେସିଆ ଥରି ଉଠିଛି I ରିକ୍ଟର ସ୍କେଲରେ ଏହାର ତୀବ୍ରତା ୬.୨ ରେକର୍ଡ କରାଯାଇଛି। ଭାରତୀୟ ସମୟ ରାତି ୧ଟା ୩୨ ମିନିଟ ୪୭ ସେକେଣ୍ଡରେ ଝଟକା ଅନୁଭୂତ ହୋଇଥିଲା। ଇଣ୍ଡୋନେସିଆର ହାଲମେହେରା ଦ୍ୱୀପଠାରୁ ପ୍ରାୟ ୧୦୦ କିଲୋମିଟର ଉତ୍ତରରେ ଏହି ଭୂକମ୍ପ ହୋଇଥିଲା। ଟୋବେଲୋ ଠାରୁ ୧୭୭ କିଲୋମିଟର ଉତ୍ତରରେ ଏହି ଭୂକମ୍ପର କେନ୍ଦ୍ରସ୍ଥଳ ହୋଇଥିବା ଜଣାଯାଇଛି। ଏଥରେ ଇଣ୍ଡୋନେସିଆରେ ବ୍ୟାପକ କ୍ଷୟକ୍ଷତି ହୋଇଥିଲେ ମଧ୍ୟ ମୃତାହତଙ୍କ ସଂଖ୍ୟା ଜଣ ପଡି ନାହିଁ I

ସେହିପରି ଇଣ୍ଡୋନେସିଆ ପରେ ଏବେ ପାକିସ୍ତାନରେ ମଧ୍ୟ ଶୁକ୍ରବାର ସକାଳେ ଭୂମିକମ୍ପ ଅନୁଭୂତ ହୋଇଛି। ପାକିସ୍ତାନର ରାଜଧାନୀ ଇସଲାମାବାଦଠାରୁ ୨୯ କିଲୋମିଟର ପଶ୍ଚିମରେ ସ୍ଥାନୀୟ ସମୟ ସକାଳ ୬ଟା ୬ ମିନିଟରେ ଏହି ଭୂମିକମ୍ପ ଅନୁଭୂତ ହୋଇଥିଲା। ରିକ୍ଟର ସ୍କେଲରେ ଭୂମିକମ୍ପର ତୀବ୍ରତା ୩.୯ ରହିଥିଲା।

ଅନ୍ୟପଟେ ଗୁରୁବାର ଆଫଗାନିସ୍ତାନ ଏବଂ ତାଜିକିସ୍ତାନରେ ମଧ୍ୟ ପ୍ରବଳ କମ୍ପନ ଅନୁଭୂତ ହୋଇଥିଲା। ଗୁରୁବାର ସକାଳେ ୦୬ .୦୭ ମିନିଟରେ ଆଫଗାନିସ୍ତାନରେ ଏହି ଭୂକମ୍ପ ଘଟିଛି। ଏହି ଭୂକମ୍ପର କେନ୍ଦ୍ରସ୍ଥଳ ଫୈଜାବାଦ ଠାରୁ ୨୬୫ କିଲୋମିଟର ଦୂରରେ ଅବସ୍ଥିତ ଥିଲା। ଏଥି ସହିତ ତାଜିକିସ୍ତାନରେ ମଧ୍ୟ ସକାଳ ୬ :୦୭ ରେ ୬.୭ ମ୍ୟାଗ୍ନିଚ୍ୟୁଡର ଭୂମିକମ୍ପ ଘଟି ଯାଇଛି । ଏହାର ପ୍ରଭାବ ଚାଇନାରେ ମଧ୍ୟ ଦେଖିବାକୁ ମିଳିଥିଲା। ଚାଇନାରେ ହୋଇଥିବା ଭୂକମ୍ପର ମାତ୍ରା ୭ .୩ ଥିଲା। ତଥାପି, ସେଠାରେ ଅଧିକ କ୍ଷତି ହୋଇନଥିଲା I

ସେହିପରି ଗୁରୁବାର ବିଳମ୍ବିତ ରାତିରେ ଗୁଜୁରାଟରେ ମଧ୍ୟ ପ୍ରବଳ କମ୍ପନ ଅନୁଭୂତ ହୋଇଥିଲା। ଗୁଜୁରାଟର ଆମ୍ରୋଲିରେ ରାତି ୧୧.୩୫ ରେ ଭୂମିକମ୍ପ ଅନୁଭୂତ ହୋଇଥିଲା। ରିଚ୍ଟର ସ୍କେଲରେ ଏହାର ତୀବ୍ରତା ୩.୪ ଥିଲା I

ସୂଚନାନୁସାରେ,ଗତ ଫେବୃଆରୀ ୬ ତାରିଖରେ ତୁର୍କୀ ଏବଂ ସିରିଆରେ ଦେଖାଯାଇଥିବା ପ୍ରଳୟଙ୍କରୀ ଭୂମିକମ୍ପରେ ମୃତ୍ୟୁସଂଖ୍ୟା ୪୭ ,୦୦୦ପାର କରିଛି । ଜାତିସଂଘର ରିପୋର୍ଟ ଅନୁଯାୟୀ ୧.୫ ମିଲିୟନରୁ ଅଧିକ ଲୋକ ଭୂମିହୀନ ହୋଇଯାଇଛନ୍ତି। ତୁର୍କୀ ଏବଂ ସିରିଆରେ ଭୂକମ୍ପରେ ପୀଡିତମାନଙ୍କୁ ସାହାଯ୍ୟ କରିବାକୁ ଭାରତ ଆଗକୁ ଆସିଥିଲା। ଭାରତ ଅପରେସନ୍ ‘ଦୋସ୍ତ’ ଜରିଆରେ ଉଦ୍ଧାର କାର୍ଯ୍ୟ ପାଇଁ NDRF ଟିମ ଏବଂ ଚିକିତ୍ସା ସୁବିଧା ଯୋଗାଇ ୧୦ ଦିନ ପରେ ନିକଟରେ ଦିଲ୍ଲୀ ଫେରିଛି I