ଅବସାଦ

ଆଜିକାଲି ଯେ କୌଣସି ବୟସ କିମ୍ବା ବର୍ଗର ବ୍ୟକ୍ତିତ୍ୱ ହୋଇଥାଆନ୍ତୁ, ସେମାନଙ୍କ ଜୀବନରେ ଅବସାଦର ସ୍ଥାନ ବଢି ବଢି ଚାଲିଛି । ଅବସାଦକୁ ନିୟନ୍ତ୍ରଣ ବା ପରିଚାଳନା ନକରିପାରି ଆମକୁ ଅନେକ ସ୍ୱାସ୍ଥ୍ୟ ସମସ୍ୟାର ସମ୍ମୁଖୀନ ମଧ୍ୟ ହେବାକୁ ପଡୁଛି । ଆସନ୍ତୁ ଜାଣିବା କିଭଳି ଆମେ ଏହି ଅବସାଦର ପରିଚାଳନା ବା ନିୟନ୍ତ୍ରଣ କରିପାରିବା ।
ଆଜିକାଲିର ଏହି ବ୍ୟସ୍ତ ବହୁଳ ଜୀବନରେ ଅବସାଦ ଚିନ୍ତା ବଢି ଚାଲିଛି । ଅଫିସ ହେଉ କିମ୍ବା ଘର ସବୁସ୍ଥାନରେ ପରିବେଶ ଚିନ୍ତା ଓ ଅଶାନ୍ତିରେ ଭରି ରହୁଛି । ତେବେ ଦୈନନ୍ଦିନ ଜୀବନରେ ଏଗୁଡିକର ନିୟନ୍ତ୍ରଣ ଓ ପରିଚାଳନା କରିବାର ଆବଶ୍ୟକତା ଅଧିକ ରହିଛି । ତେବେ ପ୍ରଥମେ ଆମକୁ ଏହାର କାରଣ କଣ ଜାଣିବାର ଅଛି, ଯାହାପରେ ଏହାକୁ ନିୟନ୍ତ୍ରଣ କରିବା ସହଜ ହୋଇଥାଏ । ଦୈନନ୍ଦିନ ଜୀବନରେ କେଉଁ କାରଣରୁ ଚିନ୍ତା ବଢୁଛି ଯେପରି ଆର୍ଥିକ, କାର୍ଯ୍ୟାଳୟରେ କାମର ପ୍ରେସର, ପରିବାରରେ ଅଶାନ୍ତି, ସ୍ୱାସ୍ଥ୍ୟ ସମସ୍ୟା ସେଗୁଡିକ ସମ୍ପର୍କରେ ପ୍ରଥମେ ଜାଣନ୍ତୁ । ଏହାକୁ ଜାଣିବା ପରେ ଷ୍ଟ୍ରେସ ମ୍ୟାନେଜ କରିବା ସହଜ ହୋଇଥାଏ । ବିଶେଷଭାବେ ଆମେ ଯେତେବେଳେ ଜୀବନରେ କିଛି କରିବାକୁ ଆହ୍ୱାନ ନେଇଥାଉ ହେଲେ ଏହାକୁ ପୂରଣ କରିବାରେ ଅସୁବିଧା ହୋଇଥାଏ ସେହି ସମୟରେ ଷ୍ଟ୍ରେସ ବା ଅବସାଦ ବଢିଥାଏ ।
ପ୍ରଭାବ
ଅବସାଦର ଅନେକ ନକରାତ୍ମକ ପ୍ରଭାବ ଆମର ସ୍ୱାସ୍ଥ୍ୟ ଉପରେ ପଡିଥାଏ । ଶରୀରର ସମସ୍ତ ଅଙ୍ଗ ଉପରେ ଏହାର ପ୍ରଭାବ ରହିଛି । କେବଳ ଶରୀର ନୁହେଁ ଏହାର ଆମର ଦୈନନ୍ଦିନ ଜୀବନ ଉପରେ ମଧ୍ୟ ପ୍ରଭାବ ରହିଛି ।
ସ୍ୱାସ୍ଥ୍ୟ – ଅବସାଦ କାରଣରୁ ଅନେକ ସ୍ୱାସ୍ଥ୍ୟ ସମସ୍ୟା ଦେଖିବାକୁ ମିଳିଥାଏ । ଏହି କାରଣରୁ ମୁଣ୍ଡବିନ୍ଧା, ଫଟିଗୋ, ଉଚ୍ଚ ରକ୍ତଚାପ, ପାଚନତନ୍ତ୍ର ଉପରେ ଏହାର ପ୍ରଭାବ ଦେଖିବାକୁ ମିଳିଥାଏ । ଅଧିକ ଚିନ୍ତାରେ ରହିବା ଦ୍ୱାରା ଆମର ରୋଗପ୍ରତିରୋଧକ ଶକ୍ତି ମଧ୍ୟ କମିଥାଏ ।
ଭାବନାତ୍ମକ ପ୍ରଭାବ – ଆଙ୍ଗଜାଇଟି, ଡିପ୍ରେସନ, ମୁଡ୍‌ସୁଇଂ ଭଳି ସମସ୍ୟା ଏହାର ପ୍ରଭାବରେ ଦେଖିବାକୁ ମିଳିଥାଏ । ଯେଉଁକାରଣରୁ ମାନସିକ ସ୍ୱାସ୍ଥ୍ୟ ଉପରେ ପ୍ରଭାବ ଦେଖିବାକୁ ମିଳିଥାଏ । ଅନେକଙ୍କ କ୍ଷେତ୍ରରେ ଅଧିକ ଷ୍ଟ୍ରେସରେ ରହିବା ଫଳରେ ମାନସିକ ବିକୃତି ମଧ୍ୟ ଦେଖିବାକୁ ମିଳିଥାଏ । ସେମାନଙ୍କ କ୍ଷେତ୍ରରେ କୌଣସି କଥାକୁ ମନେ ରଖିବା କଷ୍ଟକର ହୋଇଥାଏ । ସେହିଭଳି ସେମାନେ କୌଣସି ନିଷ୍ପତ୍ତି ନେଇ ପାରନ୍ତି ନାହିଁ । ଯାହାର ପ୍ରଭାବ ବିଶେଷଭାବେ ସେମାନଙ୍କ ଦୈନନ୍ଦିନ ଜୀବନରେ ଦେଖିବାକୁ ମିଳେ । ଏମାନଙ୍କ ବ୍ୟବହାରରେ ମଧ୍ୟ ବେଳେବେଳେ ପରିବର୍ତ୍ତନ ଦେଖିବାକୁ ମିଳିଥାଏ । ନିଦ୍ରା ହୀନତା, ସବୁବେଳେ ଏକୁଟିଆ ରହିବାକୁ ପସନ୍ଦ କରିବା, ନିଶା ଦ୍ରବ୍ୟ ଅଧିକ ଖାଇବା, ଭୋକ ନଲାଗିବା ଭଳି ସମସ୍ୟା ଦେଖିବାକୁ ମିଳିଥାଏ ।

କିଭଳି କରିବେ ନିୟନ୍ତ୍ରଣ
ତେବେ ଯଦି ଅଧିକ ସମସ୍ୟା ରହିଛି ତେବେ ଡାକ୍ତରଙ୍କ ପରାମର୍ଶ ନିଅନ୍ତୁ । ଡାକ୍ତରଙ୍କ ପରାମର୍ଶ ସହିତ ଘରେ ମଧ୍ୟ କିଛି ଉପାୟ ଆପଣାଇ ସୁସ୍ଥ ରହିପାରିବେ । କିଛି ଛୋଟଛୋଟ ବ୍ୟାୟାମ ସହିତ ହସଖୁସିରେ ରହି ଏହି ସମସ୍ୟା ଦୂରେଇହେବ । ପ୍ରତିଦିନ ବ୍ୟାୟାମ କରିବା ଫଳରେ ଅବସାଦ କମ ହୋଇଥାଏ । ଏହାଦ୍ୱାରା ଶରୀରର ଷ୍ଟ୍ରେସ ହର୍ମୋନ ନିୟନ୍ତ୍ରଣରେ ରହିଥାଏ । ସେହିଭଳି ଏହା ମୁଡକୁ ମଧ୍ୟ ଫ୍ରେସ ରଖିଥାଏ । ସକାଳୁ ଚାଲିବା ହେଉ କି ଧ୍ୟାନ କରିବା ହେଉ ସମସ୍ତ କଥା ଆପଣଙ୍କୁ ଅବସାଦ ମୁକ୍ତ ରହିବାରେ ସାହାଯ୍ୟ କରିବ । ସେହିଭଳି ଏକୁଟିଆ ନରହି ସବୁବେଳେ ସାଙ୍ଗମାନଙ୍କ ସହିତ ରୁହନ୍ତୁ । ପରିବାର ହେଉ କିମ୍ବା ସାଙ୍ଗସାଥୀ ସମସ୍ତଙ୍କ ସହିତ ସମୟ ବିତାଇ ପାରିବେ । ଯାହା ଫଳରେ ଆପଣଙ୍କର ଷ୍ଟ୍ରେସ ଲେବଲ କମିବ । ସେହିଭଳି ଯେଉଁ କାମରୁ ଅବସାଦ ମିଳୁଛି ସେଥିରୁ ନିବୃତ ରୁହନ୍ତୁ । ସବୁବେଳେ ମନକୁ ଖୁସି ରଖିବା ଭଳି କାମ କରନ୍ତୁ । ଖାଲି ସମୟରେ ଚିତ୍ର ଆଙ୍କିବା, ସିନେମା ଦେଖିବା, ଗୀତ ଶୁଣିବା, ଗପ ପଢିବା, କିଛି ଭଲ ବହି ପଢିବା ଆଦି କାମ କରନ୍ତୁ ।