ରଜ ଖେଳ

ଜୀବନର ବିଭିନ୍ନ ଚିନ୍ତା ଦୂର କରି କିଛି ସମୟ ପାଇଁ ଖୁସିରେ ରହିବାକୁ ସମସ୍ତେ ଖେଳର ସାହାର ନେଇଥାଆନ୍ତି । ବିଶ୍ୱର ସବୁ ସ୍ଥାନର ପରମ୍ପରାରେ କିଛି ଖେଳ ଯୋଡି ହୋଇ ରହିଥାଏ । ସେହିଭଳି ରଜ ପର୍ବ ସବୁବେଳେ ଓଡ଼ିଶାର ପରମ୍ପରାକୁ ନେଇ ପାଳନ କରାଯାଇଥାଏ । ଏହି ତିନିଦିନ ବିଭିନ୍ନ ଖାଦ୍ୟ ସାଙ୍ଗକୁ ସମସ୍ତେ ବିଭିନ୍ନ ପ୍ରକାର ଖେଳ ଖେଳି ମନୋରଞ୍ଜନ କରିଥାଆନ୍ତି । ଆସନ୍ତୁ ଜାଣିବା ସେହିଭଳି କିଛି ରଜ ଖେଳ ସମ୍ପର୍କରେ

ଦୋଳି
ରଜର ପ୍ରମୁଖ ଖେଳ ହୋଇଥାଏ ଦୋଳି, ଯାହାକୁ ସବୁ ଝିଅମାନେ ଉପଭୋଗ କରନ୍ତି । ପ୍ରତିଟି ଘର ବାଡିପଟେ, ଗାଁ ଗୁଡିକର ଆମ୍ବ ତୋଟାରେ ଦୋଳି ବନ୍ଧା ହୋଇଥିବାର ଦେଖିବାକୁ ମିଳିଥାଏ । ସମସ୍ତେ ଏଠି ଏକାଠି ହୋଇ ଦୋଳିର ମଜା ନେଇଥାଆନ୍ତି । ଦୋଳି ଖେଳିବା ସମୟରେ ଝିଅମାନେ ପାରମ୍ପରିକ ରଜ ଦୋଳି ଗୀତ ମଧ୍ୟ ବୋଲୁଥିବାର ଶୁଣିବାକୁ ମିଳେ, ଯାହା ପରିବେଶକୁ ଖୁବ ମନୋରମ କରିଥାଏ ।

ତାସ
ରଜର ପ୍ରମୁଖ ଖେଳରେ ସାମିଲ ରହିଛି ତାସ ଖେଳ । ରଜ ତିନି ଦିନ ଧରି ଗାଁ ଗଣ୍ଡାର ପରିବେଶ ଖୁବ ଚଳଚଞ୍ଚଳ ରହିଥାଏ । ସମସ୍ତେ ବିଭିନ୍ନ ପିଠା ପଣା ଓ ସୁସ୍ୱାଦୁ ବ୍ୟଞ୍ଜନ ଖାଇ ଖେଳରେ ମାତି ଥାଆନ୍ତି । ଝିଅମାନେ ଦୋଳି ଖେଳୁଥିବାବେଳେ ପୁଅମାନେ ତାସ ଖେଳୁଥିବାର ଗାଁ ଗଣ୍ଡାରେ ଦେଖିବାକୁ ମିଳେ । ବିଭିନ୍ନ ସ୍ଥାନ ଯେପରି ଗାଁ ଛକ, କୋଠଘର ପିଣ୍ଡା ଭଳି ସ୍ଥାନରେ ସମସ୍ତେ ମିଶି ତାସ ଖେଳ ଖେଳୁଥିବାର ଦେଖିବାକୁ ମିଳିଥାଏ । ଏହି ଖେଳକୁ ଭାଇଚାରାର ପ୍ରତୀକ ଭାବେ ବିବେଚନା କରାଯାଇଥାଏ । ଏହା ସମସ୍ତଙ୍କ ମନୋରଞ୍ଜନ କରିବା ସହିତ ସଦ୍‌ଭାବନା ମଧ୍ୟ ବଢାଇଥାଏ ।

ପୁଚି
ପୁଚି ହେଉଛି ଓଡ଼ିଶାର ଖୁବ ପୁରୁଣା ଖେଳ । ବିଭିନ୍ନ ସମୟରେ ଖେଳାଯାଉଥିବା ଏହି ଖେଳ ରଜର ପ୍ରମୁଖ ଆକର୍ଷଣ ସାଜିଥାଏ । ଏହି ଖେଳକୁ କେବଳ ଝିଅପିଲାମାନେ ହିଁ ଖେଳି ଥାଆନ୍ତି । ବିଭିନ୍ନ ସ୍ଥାନରେ ପୁଚିର ପ୍ରତିଯୋଗିତା ମଧ୍ୟ ଆୟୋଜନ କରାଯାଇଥାଏ । ଗାଁରେ ଠାଏ ଠାଏ ଏକାଠି ହୋଇ ପୁଚି ପ୍ରତିଯୋଗିତା ହୋଇଥାଏ ଯେଉଁଥିରେ ବିଜେତାଙ୍କୁ ଆକର୍ଷଣୀୟ ପୁରସ୍କାର ମଧ୍ୟ ପ୍ରଦାନ କରାଯାଇଥାଏ ।

କବାଡି
ରଜରେ ଯେ ଖାଲି ଝିଅମାନେ ବିଭିନ୍ନ ଖେଳର ଆନନ୍ଦ ନେଇଥାଆନ୍ତି, ଏପରି ନୁହେଁ । ପୁଅମାନେ ମଧ୍ୟ ବିଭିନ୍ନ ଖେଳ ଖେଳିଥାନ୍ତି, ସେଥିମଧ୍ୟରୁ ଗୋଟିଏ ହେଲା କବାଡି । ଯାହାକୁ ଗାଁ ମାନଙ୍କରେ ବିଭିନ୍ନ ସ୍ଥାନରେ ଏକାଠି ହୋଇ ଦଳଦଳ ହୋଇ ପିଲାମାନେ ଖେଳୁଥିବାର ଦେଖିବାକୁ ମିଳେ । ସେମାନଙ୍କ ଭିତରେ ମଧ୍ୟ ପ୍ରତିଯୋଗିତା ଆୟୋଜନ ହୋଇଥାଏ । ବିଜେତା ଦଳକୁ ଆକର୍ଷଣୀୟ ପୁରସ୍କାର ପ୍ରଦାନ କରାଯାଇଥାଏ ।

ଲୁଡୁ
ଲୁଡୁ ଖେଳ ସମସ୍ତଙ୍କର ପ୍ରିୟ ହୋଇଥାଏ । ଏମିତି ଅନେକ ସମୟରେ ଖେଳାଯାଉଥିବା ଏହି ଖେଳଟି ରଜର ଏକ ପ୍ରତୀକ ଖେଳ । ଗାଁ ହେଉ କିମ୍ବା ସହର ବିଭିନ୍ନ ସ୍ଥାନରେ ଏହି ଖେଳ ଖେଳାଯାଉଥିବାର ଦେଖିବାକୁ ମିଳେ । ଝିଅ ଓ ପୁଅ ସମସ୍ତେ ମିଶି ପିଣ୍ଡାରେ ବସି ଲୁଡୁ ଖେଳୁଥିବାର ଦେଖିବାକୁ ମିଳେ । ରଜରେ ଏହି ଖେଳର ଖୁବ ଆନନ୍ଦ ସମସ୍ତେ ନେଇଥାଆନ୍ତି ।