‘ନେପାଲମ୍ ବାଳିକା’ଙ୍କ ଶେଷ ହେଲା ୫୦ ବର୍ଷ ଧରି ଚାଲୁଥିବା ଚର୍ମ ଚିକିତ୍ସା
ନେପାଲମ ବୋମା ମାଡ଼ରେ ଆହତ ହୋଇଥିଲେ ୯ ବର୍ଷୀୟ ଭିଏତ୍ନମୀ ବାଳିକା
ଦିଲ୍ଲୀ: ଜୁନ୍ ୩୦: ଆମେରିକା ୧୯୭୨ ମସିହାରେ ଭିଏତ୍ନାମ ଉପରେ ପକାଇଥିବା ନେପାଲମ ବୋମା ମାଡ଼ର ଫଟୋଦୃଶ୍ୟ ଅତି ଲୋମହର୍ଷକ ରହିଥିଲା । ସେହି ଫଟୋ ମଧ୍ୟରୁ ଗୋଟିଏ ଫଟୋରେ କିଛି ଛୋଟ ପିଲା ନିଜ ଜୀବନ ରକ୍ଷା କରିବା ପାଇଁ ଚିତ୍କାର କରି ଦୌଡୁଥିବା ଫଟୋ ଇତିହାସ ପୃଷ୍ଠାରେ ଛପିଯାଇଥିଲା ।
ତେବେ ସେହି ଫଟୋରେ ଥିବା ଜଣେ ଉଲଗ୍ନ ନାବାଳିକା, ଯାହାକୁ ଦୁନିଆ ‘ନେପାଲମ ବାଳିକା’ ନାମରେ ଜାଣେ, ତାଙ୍କର ଆଜି ଚର୍ମ ଚିକିତ୍ସା ଶେଷ ହୋଇଛି । ବୋମା ମାଡ଼ରେ ଭୟଙ୍କର ଭାବରେ ପୋଡ଼ିଯାଇଥିବା ତାଙ୍କ ଚର୍ମର ଦୀର୍ଘ ୫୦ ବର୍ଷ ଧରି ଚିକିତ୍ସା ଚାଲିଥିଲା । ସେହି ନାବାଳିକାଙ୍କ ନାମ-କିମ୍ ଫୁକ୍ ଫାନ୍ ସି । ତାଙ୍କୁ ଏବେ ୮୯ ବର୍ଷ ବୟସ ।
ଯୁଦ୍ଧ ବେଳେ ୧୯୭୨ ମସିହା ଜୁନ୍ ମାସରେ ତାଙ୍କ ଗାଁ ଉପରେ ନେପାଲମ ବୋମା ପଡ଼ିବାରୁ ତାଙ୍କ ଦେହରେ ସୃଷ୍ଟ ଗଭୀର ପୋଡ଼ ଘାଆ ଜନିତ ଯନ୍ତ୍ରଣା ଲାଘବ ପାଇଁ ବିଭିନ୍ନ ପଦ୍ଧତିରେ ଚିକିତ୍ସା ଚାଲିଥିଲା । ଡାକ୍ତରଖାନାରେ ଗୋଟିଏ ବର୍ଷ ରହିବା ଏବଂ ପରେ ୧୭ ଥର ଅସ୍ତ୍ରୋପଚାର ପରେ ଭୀଷଣ ପୋଡ଼ିଯାଇଥିବା ନେପାଲମ ବାଳିକାକୁ ଘରକୁ ଛଡ଼ାଯାଇଥିଲା । ଅବଶ୍ୟ ପୁଣି ଠିକ୍ ଭାବେ ଚାଲବୁଲ କରିବା ପାଇଁ ସମର୍ଥ ହେବା ପୂର୍ବରୁ ପରବର୍ତ୍ତୀ ୧୦ ବର୍ଷ ଧରି ତାଙ୍କୁ ଅନେକ ପ୍ରକାର ଚିକିତ୍ସା କରାଇବାକୁ ପଡ଼ିଥିଲା । ବହୁ ଚିକିତ୍ସା ସତ୍ତେ୍ୱ ତାଙ୍କ ପାଇଁ ପ୍ରତିଟି ଦିନ ଯନ୍ତ୍ରଣାଦାୟକ ରହିଥିଲା ।
୧୯୯୨ରେ କମ୍ୟୁନିଷ୍ଟ ଶାସିତ ଭିଏତ୍ନାମ ଖସି ଯାଇ ନେପାଲମ ବାଳିକା ଏବଂ ତାଙ୍କ ସ୍ୱାମୀ କାନଡାରେ ରାଜନୈତିକ ଶରଣ ନେଇଥିଲେ । ୨୦୧୫ରେ ସେ ଯୁକ୍ତରାଷ୍ଟ୍ର ଆମେରିକାର ଫ୍ଲୋରିଡା ପ୍ରଦେଶ ଅନ୍ତର୍ଗତ ମିଆମିରେ ଥିବା ଡାକ୍ତର ଜିଲ୍ ଜ୍ୱାଇବେଲ୍ଙ୍କ ସଙ୍ଗେ ପରିଚିତ ହୋଇ ପୋଡ଼ା ଏବଂ କ୍ଷତ ପାଇଁ ବିଶେଷ ଚିକିତ୍ସା ଗ୍ରହଣ କରିଥିଲେ । ନେପାଲମ ବାଳିକାଙ୍କ କାହାଣୀ ଶୁଣି ଡାକ୍ତର ଜ୍ୱାଇବେଲ୍ ମାଗଣାରେ ତାଙ୍କ ଚିକିତ୍ସା କରିଥିଲେ ।
ସେ ସମୟରେ ଡାକ୍ତରଖାନାକୁ ନିଆଯିବା ପୂର୍ବରୁ ତାଙ୍କର ଫଟୋ ଉଠାଇ ଥିବା ପୁଲିଜର୍ ପୁରସ୍କାରପ୍ରାପ୍ତ ସାମ୍ବାଦିକ ନିକ୍ ଉଟ୍ ମଧ୍ୟ ମିଆମି ଯାଇ ତାଙ୍କୁ ଭେଟିବା ସହ ଅଧିକ ଫଟୋ ଉଠାଇଥିଲେ । ଭୀଷଣ ଯନ୍ତ୍ରଣାରେ ଥିବା ନେପାଲମ୍ ବାଳିକା ଫଟୋରେ ହସୁଥିଲେ ।
Comments are closed.