ମୋବାଇଲର ନକାରାତ୍ମକ ପ୍ରଭାବ

ଆଜିକାଲି ବଡ ହେଉ କି ଛୋଟ ସମସ୍ତଙ୍କର ମୋବାଇଲର ଆବଶ୍ୟକତା ରହୁଛି । ବଡମାନେ କାମ ପାଇଁ ବ୍ୟବହାର କରୁଥିବାବେଳେ ଛୋଟପିଲାମାନେ ଖାଇବାବେଳେ ହେଉ କିମ୍ବା ସମୟ ଅତିବାହିତ କରିବା ପାଇଁ ହେଉ ମୋବାଇଲର ବ୍ୟବହାର କରୁଛନ୍ତି । ତେବେ ଏହାର ନକରାତ୍ମକ ପ୍ରଭାବ ବେଶି ଛୋଟ ପିଲାଙ୍କ ଉପରେ ପଡୁଥିବା ଦେଖିବାକୁ ମିଳୁଛି । ଆସନ୍ତୁ ଜାଣିବା ସେହିଭଳି କିଛି ଗୁରୁତର ପ୍ରଭାବ ସମ୍ପର୍କରେ ଯାହା ପିଲାଙ୍କ ଉପରେ ପଡୁଛି ।
ଧୈର୍ଯ୍ୟ କମିବା
ମୋବାଇଲ ବ୍ୟବହାର ନକରାତ୍ମକ ପ୍ରଭାବ କାରଣରୁ ପିଲାଙ୍କର ଧୈର୍ଯ୍ୟ କମିବାରେ ଲାଗୁଛି । ସବୁବେଳେ ସ୍କ୍ରିନ ଦେଖିବା ଏବଂ କାମ ଜଲଦି ହେବାପାଇଁ ଇଚ୍ଛା ସେମାନଙ୍କ ଭିତରେ ଧୈର୍ଯ୍ୟର ଅଭାବ ସୃଷ୍ଟି କରୁଛି । ଏହି କାରଣରୁ ସେମାନେ ଚିଡଚିଡା ମଧ୍ୟ ହୋଇଯାଉଛନ୍ତି । ନିଜ ମାତା ପିତା ହେଉ କିମ୍ବା ଶିକ୍ଷକ କାହାର ବି ଅଳ୍ପ ଗାଳି ସେମାନେ ସହି ପାରୁ ନାହାନ୍ତି । ସେହିଭଳି ସେମାନଙ୍କୁ ରାଗ ଖୁବ ଜଲଦି ଆସୁଥିବା ଦେଖିବାକୁ ମିଳୁଛି ।
ଏକାଗ୍ରତା କମୁଛି
ମୋବାଇଲରେ ଆସୁଥିବା ସବୁବେଳେ ନୋଟିଫିକେସନ, ଆଲର୍ଟ ଓ ମେସେଜ୍‌ ସେମାନଙ୍କର ଧ୍ୟାନ ବା ଏକାଗ୍ରତା କମାଉଛି । ସେମାନେ ଖୁବ ଶୀଘ୍ର ବିଚଳିତ ହୋଇ ଯାଉଛନ୍ତି । ସେମାନେ ଏତେମାତ୍ରାରେ ମୋବାଇଲ ଆଡିକଫ ହେଉଛନ୍ତି କି କାମ ଅଧାରୁ ବନ୍ଦ କରି ମୋବାଇଲ ଦେଖୁଛନ୍ତି, ଏହା ସେମାନଙ୍କର ଏକାଗ୍ରତା ଉପରେ ଗଭୀର ପ୍ରଭାବ ପକାଉଛି ।
ଏକୁଟିଆ ରହିବାକୁ ଇଚ୍ଛା ହେବା
ମୋବାଇଲ ଅଧିକ ବ୍ୟବହାର କରିବା ଦ୍ୱାରା ସେମାନେ ଏକୁଟିଆ ରହିବାକୁ ଲାଗନ୍ତି । ସବୁବେଳେ ଏକୁଟିଆ ରହିବା ଦ୍ୱାରା ସାଙ୍ଗସାଥୀଙ୍କ ସହିତ ମିଶିବା କମିଥାଏ । ସେହିଭଳି ଏକୁଟିଆ ରହିବାରୁ ମାନସିକ ଅବସାଦ ବଢିଥାଏ, ଯଦି କିଛି କଥା ସେମାନଙ୍କୁ ସମସ୍ୟାରେ ପକାଇଥାଏ ସେମାନେ କାହାସହିତ ସେୟାର କରିପାରନ୍ତି ନାହିଁ । ଯାହା ସେମାନଙ୍କ ମାନସିକ ସ୍ୱାସ୍ଥ୍ୟ ଉପରେ ଖରାପ ପ୍ରଭାବ ପକାଇଥାଏ ।
ଆଖି ଉପରେ ପ୍ରଭାବ
ମୋବାଇଲ ଫୋନ୍‌ର ପ୍ରଭାବ ବିଶେଷଭାବେ ଆଖି ଉପରେ ଅଧିକ ଦେଖିବାକୁ ମିଳିଥାଏ । ଛୋଟଛୋଟ ପିଲାଙ୍କର ଆଜିକାଲି ଆଖି ଖରାପ ହେଉଥିବା ଦେଖିବାକୁ ମିଳୁଛି । ଏହା ସ୍କ୍ରିନ ଟାଇମ୍‌ ଅଧିକ ହେବାର ପ୍ରଭାବ । କେବଳ ଆଖି ଖରାପ ନୁହେଁ ନିଦ୍ରା ହୀନତା, ମେଦବହୁଳତା ଭଳି ସମସ୍ୟା ମଧ୍ୟ ଦେଖିବାକୁ ମିଳିଥାଏ ।