ମଙ୍କିପକ୍ସ ଏକ ପ୍ରକାର ବିରଳ ସ୍ୱାସ୍ଥ୍ୟ ସମସ୍ୟା, ଯାହା ଏମ୍ପକ୍ସ ଭାଇରସ କାରଣରୁ ସଂକ୍ରମିତ ହୋଇଥାଏ । ତେବେ ଏହା ବିଶେଷଭାବେ ମୂଷା ଓ ସେହି ପ୍ରଜାତିର ପଶୁଙ୍କୁ ହୋଇଥାଏ, କିନ୍ତୁ ଏହା ମନୁଷ୍ୟଙ୍କୁ ସଂକ୍ରମିତ ହେବାର ମଧ୍ୟ ସମ୍ଭାବନା ରହିଛି । ଏହା ସାଧାରଣତଃ ଆଫ୍ରିକା ମହାଦେଶରେ ଅଧିକ ସଂଖ୍ୟାରେ ହୋଇଥାଏ । ହେଲେ ବର୍ତ୍ତମାନ ବିଶ୍ୱର ସମସ୍ତ ଦେଶରେ ଏହାର ପ୍ରଭାବ ଦେଖିବାକୁ ମିଳୁଛି । ଏହାର ଲକ୍ଷଣ ସାଧାରଣତ ଏହାର ଭାଇରସ ଆମ ଶରୀରକୁ ଯିବାର ୩ ରୁ ୧୭ ଦିନ ଭିତରେ ଦେଖିବାକୁ ମିଳିଥାଏ । ସେହିଭଳି ଏହି ଲକ୍ଷଣ ପାଖାପାଖି ୨ ରୁ ୪ ସପ୍ତାହ ପର୍ଯ୍ୟନ୍ତ ଆମ ଶରୀରରେ ରହିଥାଏ । ଏହାରି ମଧ୍ୟରେ ଡାକ୍ତରଙ୍କୁ ଦେଖାଇ ଚିକିତ୍ସା ହେବାର ଆବଶ୍ୟକତା ରହିଛି ।
ଲକ୍ଷଣ
-ଜ୍ୱର
-ଚର୍ମ କୁଣ୍ଡାଇ ହେବା
-ଲିମ୍ଫ ନୋଡ୍ ଫୁଲିବା
-ମୁଣ୍ଡ ବିନ୍ଧା
-ମାଂଶପେଶୀ ବିନ୍ଧା ହେବା
-ଦୁର୍ବଳତା
ଏହି ସଂକ୍ରମଣ ଆରମ୍ଭ ହେଲେ ପ୍ରଥମେ ଜ୍ୱର ହୋଇଥାଏ । ଏହାପରେ ମୁହଁ, ହାତ ଓ ପାଦରେ ଫଳିବା ଆରମ୍ଭ ହୋଇଥାଏ । ଏହି ରାସ୍ ଗୁଡିକ ଧୀରେଧୀରେ ବଢିଥାଏ, ଏଥିରେ ପୁଜ ହେବାର ମଧ୍ୟ ବେଳେବେଳେ ଦେଖିବାକୁ ମିଳିଥାଏ ।
କିଭଳି ହୋଇଥାଏ ସଂକ୍ରମଣ
ସାଧାରଣତଃ ଏହି ରୋଗର ଭାଇରସ ରୋଗୀର ସଂସ୍ପର୍ଶରେ ଆସିଲେ ବ୍ୟାପିଥାଏ । ଯଦି ଆପଣ ରୋଗୀର ବ୍ୟବହୃତ କୌଣସି ସାମଗ୍ରୀ ବ୍ୟବହାର କରୁଛନ୍ତି ତେବେ ଏହା ହେବାର ସମ୍ଭାବନା ବେଶି ରହିଛି । ଯଦି ରୋଗୀଦେହରେ ହୋଇଥିବା ଫୋଟକାର ପାଣି ସଂସ୍ପର୍ଶରେ ଆପଣ ଆସୁଛନ୍ତି ତେବେ ଏହା ବ୍ୟାପିବାର ସମ୍ଭାବନା ରହିଛି । ସେହିଭଳି ଏହା ପଶୁଙ୍କ ପାଖରୁ ବ୍ୟାପିବାର ସମ୍ଭାବନା ବେଶି ରହିଛି । ଯଦି ମଙ୍କିପକ୍ସରେ ଆକ୍ରାନ୍ତ ପଶୁ ଆପଣଙ୍କୁ କାମୁଡୁଛି କିମ୍ବା ଆପଣ ଏହାର ପ୍ରତେକ୍ଷ ସଂସ୍ପର୍ଶରେ ଆସୁଛନ୍ତି ତେବେ ଏହା ଆପଣଙ୍କୁ ଆକ୍ରାନ୍ତ କରିବାର ସମ୍ଭାବନା ବଢିଥାଏ । ତେଣୁ ସବୁବେଳେ ସଂକ୍ରାମକ ପଶୁ କିମ୍ବା ମଣିଷଙ୍କ ଠାରୁ ସାମାଜିକ ଦୂରତା ରଖନ୍ତୁ । ସେମାନଙ୍କ ସହିତ ମିଳାମିଶା କରିବା ସମୟରେ ସତର୍କତା ଅବଲମ୍ବନ କରନ୍ତୁ । ସବୁବେଳେ ଡାକ୍ତରଙ୍କ ପରାମର୍ଶକୁ ପାଳନ କରନ୍ତୁ ।
Comments are closed.