ବିପି ବିପଦ

ଆଗରୁ ରକ୍ତଚାପ ବା ବିପି ୫୦ କିମ୍ବା ୬୦ ବର୍ଷ ବୟସ ପରେ ଦେଖାଦେଉଥିବା ବେଳେ ଏବେ ସାଧାରଣ ସମସ୍ୟାରେ ପରିଣତ ହୋଇଛି । ଆଜିର ବ୍ୟସ୍ତବହୁଳ ଜୀବନଚର୍ଯ୍ୟା ଓ ମାନସିକ ଦୁଃଶ୍ଚିନ୍ତା ବିପିର ବୟସକୁ କମାଇ ଦେଇଛି । ଏବେ ଏହି ଅଦୃଶ୍ୟ ବିପଦ ବୟୋ, ବୃଦ୍ଧ ସମସ୍ତଙ୍କୁ ଗ୍ରାସ କରିଲାଣି ।
ପରିବର୍ତ୍ତିତ ଜୀବନଶୈଳୀ ଏବଂ ଖାଦ୍ୟପେୟ କାରଣରୁ ଆଜିକାଲି ଯୁବବର୍ଗଙ୍କ କ୍ଷେତ୍ରରେ ବହୁ ସ୍ୱାସ୍ଥ୍ୟ ସମସ୍ୟା ଦେଖାଯାଉଛି । ଯାହା ମଧ୍ୟରେ ଷ୍ଟ୍ରେସ୍‌ ଏବଂ ବିପି ସମସ୍ୟା ଦିନୁଦିନ ବଢ଼ିଚାଲିଛି । ଦିନଚର୍ଯ୍ୟାର ଚାପ ଏହି ସମସ୍ୟାର ବଡ଼ କାରଣ ହେଉଛି । ଏକ ସର୍ଭେ ଅନୁସାରେ, ଷ୍ଟ୍ରେସ୍‌ ବା ଚିନ୍ତା ପାଇଁ ବିଶେଷ କରି ବିପି ବା ରକ୍ତଚାପ ଦେଖାଯାଉଛି । ଉଚ୍ଚ ରକ୍ତଚାପ ଏକ ସ୍ଥାୟୀ ଭେଷଜ ରୋଗ । ଯେଉଁଥିରେ ରକ୍ତଚାପ ନିରନ୍ତର ବୃଦ୍ଧି ପାଇଥାଏ । ଏହି ରୋଗର କୌଣସି ଲକ୍ଷଣ ପ୍ରକାଶ ପାଏନାହିଁ । ତେବେ ରକ୍ତଚାପକୁ ଦୁଇ ପ୍ରକାରରେ ବିଭକ୍ତ କରାଯାଇଛି । ପ୍ରଥମଟି ଉଚ୍ଚ ରକ୍ତଚାପ (ହାଇ ବ୍ଲଡପ୍ରେସର)ଓ ଦ୍ୱିତୀୟଟି ଗୌଣ ରକ୍ତଚାପ (ଲୋ ବ୍ଲଡପ୍ରେସର) । ଉଚ୍ଚ ରକ୍ତଚାପ ୯୦ରୁ ୯୫ % ଲୋକଙ୍କର ଅନର୍ଦ୍ଦିଷ୍ଟ ଜୀବନଚର୍ଯ୍ୟା ଓ ଜେନେଟିକ କାରଣ ଯୋଗୁ ହୁଏ । ଯେପରି- ଅତ୍ୟଧିକ ଲୁଣ ଖାଇବା, ଅତ୍ୟଧିକ ଓଜନ ବୃଦ୍ଧି, ଧୂମପାନ ଓ ଆଲକୋହଲ ସେବନ । ସେମିତି ଗୌଣ ରକ୍ତଚାପ ୫ରୁ ୧୦% ଲୋକଙ୍କୁ ହୋଇଥାଏ । ତେବେ ଷ୍ଟ୍ରେସ୍‌ ହିଁ ଏହି ଦୁଇ ରକ୍ତିଚାପର ମୁଖ୍ୟ କାରଣ । ଔଷଧ ଓ ଜୀବନଚର୍ଯ୍ୟାର ପରିବର୍ତ୍ତନ ଯୋଗୁ ରକ୍ତଚାପ କମିଯିବା ଫଳରେ ସ୍ୱାସ୍ଥ୍ୟ ସଙ୍କଟ ଟଳିଯାଏ । ବିଶେଷ କରି ଲାଇଫ୍‌ ସିଡ୍ୟୁଲ୍‌ ଓ ଡାଏଟ୍‌ ପ୍ଲାନ ମୁତାବକ ସନ୍ତୁଳିତ ଖାଦ୍ୟ, ବ୍ୟାୟାମ ଓ ସୁସ୍ଥ ମନ ଦ୍ୱାରା ବିପି ଓ ଷ୍ଟ୍ରେସ୍‌ ନିୟନ୍ତ୍ରଣକୁ ଆସେ । ଫଳ, ପନିପରିବା, ଶସ୍ୟ ଜାତୀୟ ଖାଦ୍ୟ, ବିନ୍ସ , ବାଦାମ ଭଳି ଖାଦ୍ୟ ଖାଇଲେ ମାନସିକ ପରିବର୍ତ୍ତନ ଦେଖାଯାଇଥାଏ । ଏହାଛଡ଼ା ଫାଇବର, କ୍ୟାଲସିୟମ୍‌, ମ୍ୟାଗ୍ନେସିୟମ୍‌, ଏବଂ ପୋଟାସିୟମ୍‌ ଭରପୂର ଖାଦ୍ୟ ମଧ୍ୟ ଲାଭଦାୟକ । ତେବେ ସୁସ୍ଥ ମନ ଲାଗି ବାହାରକୁ ବୁଲିଯିବା, ନୃତ୍ୟ, ସଙ୍ଗୀତମନା ହେବା ଓ ସାଙ୍ଗସାଥୀଙ୍କ ସହ ହସଖୁସିର ସମୟ ବିତାଇବା ପ୍ରତି ଧ୍ୟାନ ଦେଇପାରିଲେ ବିପି ଭଳି ବିପଦକୁ ଦୂରେଇ ଦେଇହେବ ।