ଏସିଆ ରୋଡ୍ ରେସିଂ ଚାମ୍ପିିଅନ୍ସିପ୍, ମାଲେସିଆରେ ହୋଣ୍ଡା ରେସିଂ ଇଣ୍ଡିଆ ଟିମ୍ ପାଇଁ ପଏଂଟ୍ ଯୋଡ଼ିଲେ ରାଜୀବ୍ ସେତୁ
ଭୁବନେଶ୍ୱର: ମାଲେସିଆର ସେପାଙ୍ଗ୍ ଇଣ୍ଟର୍ନ୍ୟାସ୍ନାଲ୍ ସର୍କିଟ୍ରେ ଚାଲିଥିବା ଏଫ୍ଆଇଏମ୍ ଏସିଆ ରୋଡ୍ ରେସିଂ ଚାମ୍ପିଅନ୍ସିପ୍ର ଦ୍ୱିତୀୟ ରାଉଣ୍ଡ୍ରେ ହୋଣ୍ଡା ରେସିଂ ଇଣ୍ଡିଆ ଟିମ୍ ପାଇଁ ଆଉ ଏକ ପଏଣ୍ଟ ଯୋଡ଼ିଛନ୍ତି ଚାଳକ ରାଜୀବ ସେତୁ । ଆଜି ୫ଟି ବର୍ଗରେ ପ୍ରାୟ ୧୪ ଜଣ ଚାଳକ ଧ୍ୟାନ ହରାଇ ରେସ୍ ବାହାରକୁ ଚାଲିଯାଇଥିଲେ । ରେସ୍ରେ ଭଲ ଆରମ୍ଭ କରି ରାଜୀବ ଲ୍ୟାପ୍ ୧ ରେସ୍ ଶେଷ ହେବା ପୂର୍ବରୁ ୧୬ତମ ସ୍ଥାନରୁ ଯାଇ ୧୪ତମ ସ୍ଥାନରେ ପହଞ୍ଚିଥିଲେ । ଏହା ପରେ ତାଙ୍କୁ ଇଣ୍ଡୋନେସିଆର ଚାଳକ ପିଟ୍ରିୟାନ୍ ସ୍ୟାହ କେଟେ ଓ ସ୍ଥାନୀୟ ଚାଳକ ମହମ୍ମଦ ଇଡଲାନ୍ ହାକିମିଙ୍କଠାରୁ କଡ଼ା ପ୍ରତିଦ୍ୱନ୍ଦୀତାର ସାମ୍ନା କରିବାକୁ ପଡ଼ିଥିଲା । ପଞ୍ଚମ ଲ୍ୟାପ୍ ବେଳକୁ ସେ ୧୭ତମ ସ୍ଥାନକୁ ଖସିଯାଇଥିଲେ ।
ଷଷ୍ଠ ଲ୍ୟାପ୍ ବେଳକୁ ସେ ୧୬ତମ ସ୍ଥାନକୁ ଫେରିଥିଲେ ଏବଂ ରେସ୍ ଶେଷ ହେବା ବେଳକୁ ୧୫ ସ୍ଥାନରେ ପହଂଚି ନିଜ ଟିମ୍ ପାଇଁ ଏକ ପଏଣ୍ଟ ହାସଲ କରିଥିଲେ । ରାଜୀବଙ୍କ ସାଥୀ ଚାଳକ ସେନ୍ଥିଲ୍ କୁମାର ମଧ୍ୟ ଭଲ ଲଢେଇ କରିଥିଲେ । ୧୭ତମ ଗ୍ରିଡ୍ରୁ ରେସ୍ ଆରମ୍ଭ କରି ଲ୍ୟାପ୍ ୧ ରେସ୍ ଶେଷ ସଦ୍ଧା ସେ ୧୬ତମ ସ୍ଥାନରେ ପହଞ୍ଚି ଯାଇଥିଲେ । ଲ୍ୟାପ୍ ୩ରେ ପୁଣି ୧୭ତମ ସ୍ଥାନକୁ ଖସିବା ପରେ ଲ୍ୟାପ୍ ୫ ସୁଦ୍ଧା ୧୪ତମ ସ୍ଥାନରେ ପହଞ୍ଚିଥିଲେ । ଲ୍ୟାପ୍ ୮ରେ ସେ ଦୁର୍ଘଟଣାର ଶିକାର ହୋଇଥିଲେ, କିନ୍ତୁ ପ୍ରତ୍ୟାବର୍ତ୍ତନ କରି ନିଜ ରେସ୍ ଶେଷ କରିଥିଲେ । ହୋଣ୍ଡା ମୋଟର୍ସାଇକଲ୍ ଆଣ୍ଡ୍ ସ୍କୁଟର୍ ଇଣ୍ଡିଆ ପ୍ରାଇଭେଟ୍ ଲିମିଟେଡ୍ର ଅପରେଟିଂ ଅଫିସର୍-ବ୍ରାଣ୍ଡ୍ ଆଣ୍ଡ୍ କମୁ୍ୟନିକେସନ ପ୍ରଭୁ ନାଗରାଜ କହିଛନ୍ତି ଯେ, ‘ମାଲେସିଆ ଆମ ପାଇଁ ଏକ ସନ୍ତୋଷଜନକ ପର୍ଯ୍ୟାୟ ହୋଇ ରହିଅଛି ।
ଏକ ଦିନ ଯେଉଁଥିରେ ୧୪ ଜଣ ଚାଳକ ଦୁର୍ଘଟଣାର ଶିକାର ହୋଇ ସର୍କିଟ୍ରୁ ବାହାରି ଯାଇଥିଲେ ସେଥିରେ ଆମ ଚାଳକମାନେ ନିଜ ନିକଟତମ ପ୍ରତିଦ୍ୱନ୍ଦୀଙ୍କ ସହ କଡ଼ା ଲଢ଼େଇ କରି ରେସ୍ ଶେଷ କରିବାକୁ ନିରବଚ୍ଛିନ୍ନ ଉଦ୍ୟମ କରିଥିଲେ । ପ୍ରତିଟି ରେସ୍ରୁ ମୂଲ୍ୟବାନ ଶିକ୍ଷା ମିଳିଛି । ମୋର ବିଶ୍ୱାସ ରହିଛି ଯେ ଆମ ଚାଳକମାନେ ଓ ଟିମ୍ ଏଥିରୁ ଶିଖିବେ ଏବଂ ସେମାନଙ୍କ ପ୍ରଦର୍ଶନରେ ଉନ୍ନତି ଆଣିବେ । ଏହା ପରେ ଏଆର୍ଆର୍ସି ର ତୃତୀୟ ପର୍ଯ୍ୟାୟ ଜାପାନ୍ର ସ୍ପୋର୍ଟ୍ସଲ୍ୟାଣ୍ଡ୍ ସୁଗୋ ଇଣ୍ଟର୍ନ୍ୟାସ୍ନାଲ୍ ସର୍କିଟ୍ରେ ଅନୁଷ୍ଠିତ ହେବ । ଏହା ଆମ ପାଇଁ ନିଶ୍ଚିତ ରୂପେ ଏକ ନୂଆ ଅନୁଭବ । ଆମର ଉଭୟ ଚାଳକ ସେଠାରେ ପ୍ରଥମ ଥର ପାଇଁ ରେସ୍ କରିବେ । ମୁଁ ନିଶ୍ଚିତ ଯେ ଜାପାନରେ ଆମେ ଆହୁରି ପଏଣ୍ଟ ଯୋଡ଼ିବୁ । ରାଜୀବ ସେତୁ କହିଛନ୍ତି ଯେ ଏହା ମୋ ପାଇଁ ସନ୍ତୋଷଜନକ ରେସ୍ ଥିଲା । ମୋର ଦକ୍ଷତାରେ ଉନ୍ନତି ଆଣିବା ଲାଗି ମୁଁ ଆହୁରି ପରିଶ୍ରମ କରିବି ଏବଂ ଆମ ଦେଶ ପାଇଁ ଗୌରବ ଆଣିବା ଲାଗି ପୁଣି ଦୃଢ଼ ଭାବେ ପ୍ରତ୍ୟାବର୍ତ୍ତନ କରିବି ।
ସେହିପରି, ସେନ୍ଥିଲ୍ କୁମାର କହିଛନ୍ତି ଯେ ଆଜି ମୋ ପାଇଁ ଆଉ ଏକ କଠିନ ଦିନ ଥିଲା । ଆରମ୍ଭରୁ ମୁଁ ଭଲ ସ୍ଥିତି ହାସଲ କରିଥିଲି, କି;ୁ ଲ୍ୟାପ୍ ୩ରେ ୧୭ତମ ସ୍ଥାନକୁ ଖସିଯାଇଥିଲି । ମୁଁ ଆଗକୁ ବଢ଼ି ଲ୍ୟାପ୍ ୫ରେ ୪ ଜଣ ଚାଳକଙ୍କୁ ଅତିକ୍ରମ କରିଥିଲି । ଶେଷରେ ୧୬ତମ ସ୍ଥାନରେ ରହି ରେସ୍ ଶେଷ କରିଥିଲି ।
Comments are closed.