ପୋର୍ଭୋରିମ୍: ଅରୁଣାଚଳପ୍ରଦେଶ ବିପକ୍ଷରେ ରଣଜୀ ଟ୍ରଫି ପ୍ଲେଟ୍ ଗ୍ରୁପ୍ର ଦ୍ବିତୀୟ ଦିନରେ ସ୍ନେହଲ କୌଥାଙ୍କର ଓ କାଶ୍ୟପ ବାକ୍ଲେ ଇତିହାସ ରଚିଛନ୍ତି। ପଦାର୍ପଣ ମ୍ୟାଚ୍ ଖେଳୁଥିବା କାଶ୍ୟପ ତ୍ରିଶତକ ଅର୍ଜନ କରିଥିଲା ବେଳେ ସ୍ନେହଲ୍ ପ୍ରଥମ ଥର ୩୦୦ ରନ୍ ଅତିକ୍ରମ କରିଛନ୍ତି। ତୃତୀୟ ୱିକେଟ୍ରେ ଉଭୟ ମିଳିତ ଭାବେ ୪୪୮ ବଲ୍ରୁ ୬୦୬ ରନ୍ର ଭାଗୀଦାରି ଗଢ଼ିଥିଲେ। ୭୨୭/୨ରେ ଗୋଆ ପାଳି ଘୋଷଣା ହେବା ପୂର୍ବରୁ ସ୍ନେହଲ ୩୧୪* ଓ ବାକ୍ଲେ ୩୦୦* ରନ୍ରେ ଅପରାଜିତ ଥିଲେ। ପ୍ରଥମ ପାଳିରେ ୮୪ ରନ୍ କରିଥିବା ଅରୁଣାଚଳପ୍ରଦେଶ ଦ୍ବତୀୟ ପାଳିରେ ୯୨ ରନ୍ରେ ଅଲ୍ଆଉଟ୍ ହେବାରୁ ଗୋଆ ୫୫୧ ରନ୍ରେ ବିଜୟୀ ହୋଇଛି। ତୃତୀୟ ୱିକେଟ୍ରେ ସ୍ନେହଲ ଓ କାଶ୍ୟପଙ୍କ ଭାଗୀଦାରି ରଣଜୀ ଟ୍ରଫିରେ ସର୍ବୋଚ୍ଚ ହୋଇଥିଲା ବେଳେ ପ୍ରଥମ ଶ୍ରେଣୀ କ୍ରିକେଟ୍ ଇତିହାସରେ ଦ୍ବିତୀୟ। ପୂର୍ବରୁ ଶ୍ରୀଲଙ୍କାର କୁମାର ସାଙ୍ଗାକାରା ଓ ମାହେଲା ଜୟବର୍ଧନେ ୨୦୦୬ରେ ଦକ୍ଷିଣ ଆଫ୍ରିକା ବିପକ୍ଷରେ ତୃତୀୟ ୱିକେଟ୍ରେ ୬୨୪ ରନ୍ର ଭାଗୀଦାରି କରିଥିଲେ। ସ୍ନେହଲଙ୍କ ଏହି ପାଳିରେ ୪୫ ଚୌକା ଓ ୪ ଛକା ସାମିଲ ଥିଲା ବେଳେ ବାକ୍ଲେ ୩୯ ଚୌକା ଓ ୨ ଛକା ସହାୟତାରେ ତ୍ରିଶତକ କରିପାରିଥିଲେ। ଅନ୍ୟପକ୍ଷରେ ସ୍ନେହଲ ୨୦୫ ବଲ୍ରୁ ୩୦୦ରେ ପହଞ୍ଚିଥିବାରୁ ପ୍ରଥମ ଶ୍ରେଣୀ ଇତିହାସରେ ତୃତୀୟ ଦ୍ରୁତତମ ଭାରତୀୟ ହୋଇପାରିଛନ୍ତି। ତାଙ୍କ ପୂର୍ବରୁ ହାଇଦ୍ରାବାଦର ତନ୍ମୟ ଅଗ୍ରୱାଲ୍ ଗତ ଋତୁରେ ୧୪୭ ବଲ୍ରୁ ଶତକ ଅର୍ଜନ କରିଥିଲା ବେଳେ ଦ୍ରୁତତମ ଶତକ ରବି ଶାସ୍ତ୍ରୀଙ୍କ ନାମରେ ରହିଛି। ସେହିପରି ରଣଜୀ ଟ୍ରଫି ଇତିହାସରେ ଦୁଇ ଜଣ ଗୋଟିଏ ପାଳିରେ ତ୍ରିଶତକ ମାରିବାରେ ଏହା ଦ୍ବିତୀୟ ଘଟଣା ହୋଇଛି। ୧୯୮୯ରେ ତାମିଲନାଡୁର ଡବ୍ଲ୍ୟୁଭି ରମଣ ଓ ଅର୍ଜୁନ କ୍ରିପାଲ୍ ଉଭୟ ତ୍ରିଶତକ ଲେଖାଏଁ ଅର୍ଜନ କରିଥିଲେ।
Comments are closed.