ସୁସ୍ଥ ହୃଦୟ ପାଇଁ ଖାଦ୍ୟ

ବର୍ତ୍ତମାନ ସମୟରେ ବଢୁଥିବା ସ୍ୱାସ୍ଥ୍ୟ ସମସ୍ୟାକୁ ଦେଖି ଆମକୁ ସଚେତନ ହେବା ଆବଶ୍ୟକ I ଏହା ମଧ୍ୟରେ ‘ହୃଦୟ’ ଜନିତ ସମସ୍ୟା ଦିନକୁ ଦିନ ଜଟିଳ ହେଉଛି I ହୃଦୟକୁ ସୁସ୍ଥ ରଖିବା ପାଇଁ ସନ୍ତୁଳିତ ଆହାର ହେଉଛି ସର୍ବୋତ୍ତମ ଉପାୟ I ତେବେ ଅନିୟମିତ ଜୀବନଚର୍ଯ୍ୟIରୁ ହୃଦୟର ସ୍ୱାସ୍ଥ୍ୟ ପ୍ରତି ବିପଦ ରହିଥାଏ, ଯେଉଁ କାରଣରୁ ହୃଦଘାତ, କରୋନାରୀ ଧମନୀ ରୋଗ ଏବଂ ଟ୍ରିପଲ୍ ଭେସେଲ ରୋଗର ସମ୍ମୁଖୀନ ହେବାକୁ ପଡିଥାଏ I ବେଳେ ବେଳେ ଏହି ରୋଗ ଗୁଡିକ ଏତେ ଜଟିଳ ହୋଇଥାଏ ଯେ ନିମିଷ ମାତ୍ରକେ ଜୀବନ ଚାଲି ଯିବାର ସମ୍ଭାବନା ଥାଏ I ତେଣୁ ହୃଦୟକୁ ସୁସ୍ଥ ରଖିବା ପାଇଁ କେଉଁ ସବୁ ଖାଦ୍ୟ ଆବଶ୍ୟକ ଆସନ୍ତୁ ଜାଣିବା :

୧-ପନିପରିବା
ସୁସ୍ଥ ହୃଦୟ ପାଇଁ ସତେଜ ପନିପରିବା ସବୁଠାରୁ ସୁସ୍ଥ ଖାଦ୍ୟ I ସବୁଜ ପତ୍ରଯୁକ୍ତ ସବୁଜ ପନିପରିବା ଯେପରିକି ପାଳଙ୍ଗ, ବିଭିନ୍ନ ପ୍ରକାର ଶାଗ ,ବ୍ରୋକୋଲି ଏବଂ ଅଙ୍କୁରିତ ଶସ୍ୟ ଇତ୍ୟାଦି I ଏହିସବୁ ଖାଦ୍ୟ ହୃଦୟକୁ ଭିଟାମିନ,ମିନେରାଲ୍ସ ଏବଂ ଆଣ୍ଟିଅକ୍ସିଡାଣ୍ଟ ଯୋଗାଇଥାନ୍ତି I

୨-ଯେ କୌଣସି କୋଳି ସ୍ୱାସ୍ଥ୍ୟ ପାଇଁ ଉପକାରୀ ହୋଇଥାଏ I ଷ୍ଟ୍ରବେରି, ବ୍ଲୁବେରି, ରା଼ସ୍ପବେରି ଏବଂ ବ୍ଲାକବେରିରେ ପୋଷକ ତତ୍ତ୍ୱ ଭରପୂର ଥାଏ I ଯାହା ହୃଦୟକୁ ସୁସ୍ଥ ରଖିବାରେ ଯଥେଷ୍ଟ ସହାୟକ ହୋଇଥାଏ I ସେଗୁଡ଼ିକରେ ଆଣ୍ଟିଅକ୍ସିଡାଣ୍ଟ ଥାଏ, ଯାହା ଅକ୍ସିଡେଟିଭ୍ ଚାପ ଏବଂ ପୀଡାକୁ ହ୍ରାସ କରିବାରେ ସାହାଯ୍ୟ କରିଥାଏ I ଏହା ବ୍ୟତୀତ ହୃଦୟ ପାଇଁ ସର୍ବୋତ୍ତମ ଫଳ ଆଭୋକାଡୋ ହୋଇଥାଏ I ଏଥିରେ ଏକ ପ୍ରକାର ଉପକାରୀ ଫ୍ୟାଟ ରହିଥାଏ, ଯାହା କୋଲେଷ୍ଟ୍ରଲ ସ୍ତରକୁ ହ୍ରାସ କରିବାରେ ସାହାଯ୍ୟ କରିଥାଏ I ସେହିପରି ସକାଳେ ଆମେ କିଛି ମାତ୍ରାରେ ଭିଜା ଆଲମଣ୍ଡ ର ଚୋପା ଛଡାଇ ଖାଇଲେ ହୃଦୟ ସୁସ୍ଥ ରହିଥାଏ I

୩- ବିନ୍ସରେ ରୋଗ ପ୍ରତିରୋଧକ ତତ୍ତ୍ୱ ରହିଥାଏ , ତେଣୁ ଏହା ହୃଦୟ ସ୍ୱାସ୍ଥ୍ୟ ପାଇଁ ବହୁତ ଭଲ, ଏହା କେବଳ ହଜମ ପ୍ରକ୍ରିୟାରେ ଉନ୍ନତି ଆଣେ ନାହିଁ, ବରଂ ହୃଦୟର ସ୍ଥିତିକୁ ମଧ୍ୟ ଉନ୍ନତ କରିଥାଏ ଏବଂ କୋଲେଷ୍ଟ୍ରଲ ହ୍ରାସ କରିବାରେ ମଧ୍ୟ ସାହାଯ୍ୟ କରିଥାଏ I

୪- ସୁସ୍ଥ ହୃଦୟ ପାଇଁ ବାଦାମ ତାଲିକାରେ ଶୀର୍ଷରେ ରହିଥାଏ I ଏଥିରେ ଅନେକ ଭିଟାମିନ୍ ଏବଂ ମିନେରାଲ୍ସ ରହିଥାଏ ଏବଂ ସୁସ୍ଥ ଫ୍ୟାଟ ଓ ଫାଇବରର ଏକ ସମୃଦ୍ଧ ଉତ୍ସ , ଯାହା ହୃଦ୍ ରୋଗକୁ ରୋକିବାରେ ସାହାଯ୍ୟ କରିଥାଏ I ଏହା ବ୍ୟତୀତ ବାଦାମ ଖାଇବା ଦ୍ୱାରା କୋଲେଷ୍ଟ୍ରଲ୍ର ସ୍ତରକୁ ନିୟନ୍ତ୍ରଣ କରାଯାଇପାରିବ I

୫-ଅନେକ ପ୍ରକାରର ମଞ୍ଜି ମଧ୍ୟ ହୃଦୟକୁ ସୁସ୍ଥ ରଖିବାରେ ସାହାଯ୍ୟ କରିଥାଏ I ଯେପରିକି ଚିଆ (ନାଡୀ ବବଲୀ ) ମଞ୍ଜି ଏବଂ ଅଳସି ମଞ୍ଜି,ଏଥିରେ ଫାଇବର ଏବଂ ଓମେଗା -୩ ଫ୍ୟାଟି ଏସିଡ୍ ଭରପୁର ମାତ୍ରାରେ ଥାଏ I ଏହା ହୃଦୟ ସ୍ୱାସ୍ଥ୍ୟ ପାଇଁ ପ୍ରଭାବଶାଳୀ ହୋଇଥାଏ I ତେଣୁ ଡାକ୍ତରମାନେ ମଧ୍ୟ ଦୈନନ୍ଦିନ ଖାଦ୍ୟରେ ଏସବୁ ଅନ୍ତର୍ଭୁକ୍ତ କରିବାକୁ ପରାମର୍ଶ ଦେଇଥାନ୍ତି I ବିଶେଷକରି ଚିଆ ସିଡ଼ ରାତିରେ ପାଣିରେ ବତୁରାଇ ସକାଳେ ଏହାକୁ ଖାଲି ପେଟରେ ଓ ଅଳସୀ ମଞ୍ଜିକୁ ଭାଜି ଖାଦ୍ୟ ଖାଇ ସାରିଲାପରେ ଅଳ୍ପ ପରିମାଣରେ ଚୋବାଇ ଖାଇଲେ ହୃଦୟ ସ୍ୱାସ୍ଥ୍ୟ ଉପରେ ଉତ୍ତମ ପ୍ରଭାବ ପକାଇଥାଏ I