ନୂଆଦିଲ୍ଲୀ, ୨୬/୩ : ୱାସିଂଟନରେ ଭାରତୀୟ ଦୂତାବାସ ବାହାରେ ଆନ୍ଦୋଳନ କରିଥିବା ଖଲିସ୍ତାନୀ ସମର୍ଥକମାନେ ଜଣେ ଭାରତୀୟ ସାମ୍ବାଦିକଙ୍କ ଉପରେ ଆକ୍ରମଣ କରିଛନ୍ତି ଏବଂ ତାଙ୍କୁ ଗାଳିଗୁଲଜ କରିଛନ୍ତି। ୱାସିଂଟନ୍ରେ ଅବସ୍ଥାପିତ ଏହି ସାମ୍ବାଦିକଙ୍କ ନାମ ଲଳିତ ଝା। ସେ ପିଟିଆଇର ଜଣେ ସାମ୍ବାଦିକ। ୱାସିଂଟନ୍ ସ୍ଥିତ ଭାରତୀୟ ଦୂତାବାସ ବାହାରେ ଖଲିସ୍ତାନୀ ସମର୍ଥକମାନେ ଶନିବାର ଆନ୍ଦୋଳନ କରିଥିଲେ। ତେବେ ଖବର ସଂଗ୍ରହ ପାଇଁ ଯିବା ସମୟରେ ଲଳିତଙ୍କ ଉପରେ ଆକ୍ରମଣ ହୋଇଥିଲା। ଲଳିତ କହିଛନ୍ତି ଖଲିସ୍ତାନୀ ସମର୍ଥକମାନେ ୨ଟି ବାଡ଼ି ଧରି ତାଙ୍କ ଉପରେ ଆକ୍ରମଣ କରିଥିଲେ। ତାଙ୍କ ବାମ କାନରେ ଆଘାତ ଲାଗିଛି। କିନ୍ତୁ ବେଶୀ କିଛି ହେବା ପୂର୍ବରୁ ଆମେରିକା ସିକ୍ରେଟ୍ ସର୍ଭିସ ଏବଂ ସ୍ଥାନୀୟ ପୁଲିସ ତାଙ୍କୁ ସୁରକ୍ଷା ଦେଇଥିଲେ। ସେ ମଧ୍ୟ ତାଙ୍କ ଟ୍ବିଟର ଆକାଉଣ୍ଟରେ ଖଲିସ୍ତାନୀ ସମର୍ଥକମାନଙ୍କର ଏକ ଭିଡିଓ ସେୟାର କରିଛନ୍ତି। ଏହି ଭିଡିଓରେ ଦେଖିବାକୁ ମିଳିଛି ଯେ ଖଲିସ୍ତାନୀ ସମର୍ଥକମାନେ ଭାରତ ଏବଂ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କୁ ଅପମାନିତ କରୁଛନ୍ତି। ସେମାନେ ଭାରତୀୟ ଦୂତାବାସ ଭଙ୍ଗାରୁଜା କରିବାପାଇଁ ମଧ୍ୟ ଧମକ ଦେଇଛନ୍ତି ଏବଂ ଭାରତୀୟ ଆମ୍ବାସାଡରଙ୍କୁ ଧମକ ଦେଇଛନ୍ତି। ଆମେରିକା ସ୍ଥିତ ଭାରତୀୟ ଦୂତାବାସ ପକ୍ଷରୁ ଉକ୍ତ ଘଟଣାକୁ କଡ଼ା ନିନ୍ଦା କରାଯାଇଛି। ତେବେ ଲଳିତ ଝା ଆମେରିକା ସିକ୍ରେଟ ଅଫିସ୍କୁ ଧନ୍ୟବାଦ ଦେଇଛନ୍ତି। ତାଙ୍କୁ ସୁରକ୍ଷା ଦେଇଥିବାରୁ ଏବଂ ତାଙ୍କ କାର୍ଯ୍ୟ କରିବାରେ ସହଯୋଗ କରିଥିବାରୁ ଝା ଏଥିପାଇଁ ଧନ୍ୟବାଦ ଜଣାଇଛନ୍ତି। ଭାରତୀୟ ଦୂତାବାସ ପକ୍ଷରୁ ଉକ୍ତ ଘଟଣାକୁ କଡ଼ା ନିନ୍ଦା କରାଯାଇଛି। ଆମେରିକା ମଧ୍ୟ ଉକ୍ତ ଘଟଣାକୁ ନିନ୍ଦା କରିଛି।
Comments are closed.