ଇଂଲଣ୍ଡ: ସେପ୍ଟେମ୍ବର ୨୧: ଜଣେ ବ୍ରିଟିଶ ନାଗରିକ ଗୋଟିଏ ଡାଳରେ ୮୩୯ଟି ଟମାଟୋ ଚାଷ କରି ବିଶ୍ୱ ରେକର୍ଡ କରିବାରେ ସଫଳ ହୋଇଛନ୍ତି । ଇଂଲଣ୍ଡର ଷ୍ଟେନଷ୍ଟେଡ୍ ଏବାଟସ୍ରେ ରହୁଥିବା ୪୩ ବର୍ଷୀୟ ଡଗଲସ ସ୍ମିଥଙ୍କ ଏହି ନିଆରା କାରନାମା ସମସ୍ତ ବିଶ୍ୱବାସୀଙ୍କୁ ଚକିତ କରିଦେଇଛନ୍ତି । ସ୍ମିଥଙ୍କ କହିବା ଅନୁଯାୟୀ, ସେ ମାର୍ଚ୍ଚରେ ମଞ୍ଜି ବୁଣିଥିଲେ ଏବଂ ଏହାକୁ ଗ୍ରୀନ ହାଉସରେ ଲଗାଇଥିଲେ । ଏହାପରେ ଗୋଟିଏ ମାସରେ କେବଳ ଗୋଟିଏ ହିଁ ଡାଳରୁ ୮୩୯ଟି ଟମାଟୋ ତୋଳିଥିଲେ । ତେବେ ଏହି ଅବିଶ୍ୱସନୀୟ ଏବଂ ଚମତ୍କାର ଚାଷ ଯୋଗୁଁ ସ୍ମିଥ ତାଙ୍କ ନାଁକୁ ଗିନିଜ୍ ବୁକ୍ ଅଫ୍ ୱାର୍ଲ ରେକର୍ଡରେ ସ୍ଥାନିତ କରିଛନ୍ତି ।
ଏହାପୂର୍ବରୁ ଏହି ରେକର୍ଡ ଗ୍ରାହମ ଟେଣ୍ଟରଙ୍କ ନାମରେ ଥିଲା । ଗ୍ରାହମ ଗୋଟିଏ ଡାଳରେ ୪୪୮ଟି ଟମାଟୋ ବଢାଇ ବର୍ଷ ୨୦୧୦ରେ ଏହି ରେକର୍ଡ କରିଥିଲେ । ଏବେ ସ୍ମିଥ ଗ୍ରାହମଙ୍କଠାରୁ ଦୁଇ ଗୁଣ ଟମାଟୋ ତୋଳି ପୂର୍ବ ରେକର୍ଡକୁ ଭାଙ୍ଗିଛନ୍ତି । ତେବେ ଏହା ପୂର୍ବରୁ ସ୍ମିଥ ଗତ ବର୍ଷ ସବୁଠୁ ବଡ଼ ଟମାଟୋ ଚାଷ କରି ସମଗ୍ର ବିଶ୍ୱବାସୀଙ୍କୁ ଚକିତ କରିଥିଲେ । ତେବେ ଟମାଟୋ ଗଛକୁ ଯତ୍ନ ନେବାରେ ତାଙ୍କର ୩ରୁ ୪ ଘଣ୍ଟା ସମୟ ଯାଏ ବୋଲି ସ୍ମିଥ କହିଛନ୍ତି । ଯାହାର ଫଳାଫଳ ସ୍ୱରୂପ ସେ ଦୁନିଆର ସଫଳ ଚାଷୀଙ୍କ ମଧ୍ୟରେ ସାମିଲ ହୋଇପାରିଛନ୍ତି । ରିପୋର୍ଟ ଅନୁଯାୟୀ ଡଗଲସ ସ୍ମିଥ ଆଇଟି ମ୍ୟାନେଜର ଭାବେ ଚାକିରୀ କରୁଛନ୍ତି ।
Comments are closed.