ନୂଆଦିଲ୍ଲୀ: ରାଜ୍ୟସଭା ସଦସ୍ୟ ରାଜୀବ ଶୁକ୍ଳା ଏକ ଗୁରୁତ୍ବପୂର୍ଣ୍ଣ ସୂଚନା ଦେଇ କହିଛନ୍ତି ଯେ ଆମେରିକା ୭.୨୫ ଲକ୍ଷ ଭାରତୀୟ ନାଗରିକଙ୍କୁ ଫେରାଇବ। ବିସିସିଆଇ ଉପାଧ୍ୟକ୍ଷ ଶୁକ୍ଳା ଅନେକ ବର୍ଷ ଧରି ଆମେରିକାରେ ରହୁଥିବା ପ୍ରବାସୀଙ୍କ ଭବିଷ୍ୟତକୁ ନେଇ ଚିନ୍ତା ପ୍ରକଟ କରିଛନ୍ତି। ଏକ ଏକ୍ସ ପୋଷ୍ଟରେ ଶୁକ୍ଳା ଲେଖିଛନ୍ତି ଯେ ସେ ବୈଦେଶିକ ମନ୍ତ୍ରଣାଳୟର ଏକ ବୈଠକରେ ଯୋଗ ଦେଇଥିଲେ ଏବଂ ଜାଣିବାକୁ ପାଇଥିଲେ ଯେ ଆମେରିକା ୭.୨୫ ଲକ୍ଷ ଭାରତୀୟଙ୍କୁ ବେଆଇନ କହି ଫେରାଇ ଦେବାକୁ ନିଷ୍ପତ୍ତି ନେଇଛି। ଏହି ଲକ୍ଷ ଲକ୍ଷ ଲୋକ ବର୍ଷ ବର୍ଷ ଧରି ସେଠାରେ ରହୁଛନ୍ତି। ସେମାନେ ଭଲ ରୋଜଗାର କରନ୍ତି। ଭାରତରେ ସେମାନଙ୍କ ପାଖରେ ଆଉ କିଛି ନାହିଁ। ଏଠାକୁ ଆସିବା ପରେ ସେମାନେ କ’ଣ କରିବେ? ସେମାନେ ହଠାତ୍ ଧନୀରୁ ଗରିବ ହୋଇଯାଇଛନ୍ତି।
ଭାରତୀୟ ନାଗରିକଙ୍କ ସଂଖ୍ୟା ପିଉ ରିସର୍ଚ୍ଚ ତଥ୍ୟରୁ ଆସିଛି, ଯେଉଁଥିରେ କୁହାଯାଇଛି ଯେ ମେକ୍ସିକୋ ଓ ଏଲ୍ ସାଲଭାଡୋର ପରେ ଆମେରିକାରେ ଅନଧିକୃତ ପ୍ରବାସୀଙ୍କ ସଂଖ୍ୟା ଦୃଷ୍ଟିରୁ ଭାରତ ତୃତୀୟ ସ୍ଥାନରେ ରହିଛି। ଏହା ପୂର୍ବରୁ ଆମେରିକା ଦୂତାବାସର ମୁଖପାତ୍ର ଏହି କାର୍ଯ୍ୟାନୁଷ୍ଠାନକୁ ନିଶ୍ଚିତ କରି କହିଛନ୍ତି ଯେ ଆମେରିକା ତା’ର ସୀମା ଓ ଇମିଗ୍ରେସନ ଆଇନକୁ କଡ଼ାକଡ଼ି ଭାବେ କାର୍ଯ୍ୟକାରୀ କରୁଛି। ଇତି ମଧ୍ୟରେ ଆମେରିକାରୁ ୧୦୪ ଭାରତୀୟ ନାଗରିକ ଆସି ଭାରତରେ ପହଞ୍ଚି ସାରିଛନ୍ତି।
Comments are closed.