ଅହମଦାବାଦ: ଆସନ୍ତା ରବିବାର ଏସିଆ କପ୍ ଆୟୋଜନ ସଂକ୍ରାନ୍ତରେ ବଡ଼ ନିଷ୍ପତ୍ତି ନିଆଯିବ। ଆଇପିଏଲ୍ ଫାଇନାଲ୍ ପାଇଁ ଏସୀୟ କ୍ରିକେଟ୍ ପରିଷଦ (ଏସିସି) ର ସଦସ୍ୟ ରାଷ୍ଟ୍ରଙ୍କ ପଦାଧିକାରୀମାନଙ୍କୁ ଅତିଥି ଭାବେ ନିମନ୍ତ୍ରଣ କରାଯାଇଛି। ଏଠାରେ ଏସିଆ କପ୍କୁ ଗୋଟିଏ ଦେଶରେ ନା ଏକାଧିକ ଦେଶରେ ଆୟୋଜନ ହେବ ସେ ସଂକ୍ରାନ୍ତରେ ଚୂଡ଼ାନ୍ତ ନିଷ୍ପତ୍ତି ନିଆଯିବ ବୋଲି ବିସିସିଆଇ ସମ୍ପାଦକ ଜୟ ଶାହ କହିଛନ୍ତି। ଚଳିତ ବର୍ଷ ଏସିଆ କପ୍ ଆୟୋଜନ ଅଧିକାର ପାକିସ୍ତାନକୁ ମିଳିଛି। କିନ୍ତୁ ଭାରତୀୟ କ୍ରିକେଟ୍ ଦଳ କେନ୍ଦ୍ର ସରକାରଙ୍କ ଅନୁମତି ବିନା ପାକିସ୍ତାନ ଗସ୍ତ କରିପାରିବନି। ଏଥିପାଇଁ ପାକିସ୍ତାନ କ୍ରିକେଟ୍ ବୋର୍ଡ (ପିସିବି) ଅଧ୍ୟକ୍ଷ ନଜମ ସେଠୀ ହାଇବ୍ରିଡ୍ ମଡେଲ୍ ପାଇଁ ପ୍ରସ୍ତାବ ଦେଇଛନ୍ତି। ଏହି ମଡେଲ୍ ଅନୁସାରେ ଶ୍ରୀଲଙ୍କା, ବାଂଲାଦେଶ, ନେପାଳ ଓ ଆଫଗାନିସ୍ତାନ ପ୍ରଥମ ୪ ମ୍ୟାଚ୍ ପାକିସ୍ତାନରେ ଖେଳିବେ ଏବଂ ଭାରତ ତାହାର ସବୁ ମ୍ୟାଚ୍ ନିରପେକ୍ଷ ସ୍ଥାନରେ ଖେଳିବ। କିନ୍ତୁ ଏସଂକ୍ରାନ୍ତରେ ଏସିସି ପକ୍ଷରୁ କୌଣସି ଔପଚାରିକ ସ୍ପଷ୍ଟୋକ୍ତି ଆସିନାହିଁ। ସୂଚନାନଯୋଗ୍ୟ, ସେପ୍ଟେମ୍ବର ୧ରୁ ୧୭ ତାରିଖ ମଧ୍ୟରେ ଏସିଆ କପ୍ ଖେଳାଯିବାକୁ ସମୟ ଧାର୍ଯ୍ୟ କରାଯାଇଛି। ଏସିଆ କପ୍ରେ ଖେଳିବା ପାଇଁ ଭାରତର ଆଭିମୁଖ୍ୟ ଉପରେ ପାକିସ୍ତାନର ଦିନିକିଆ ବିଶ୍ବକପ୍ ଅଂଶଗ୍ରହଣ ନିର୍ଭର କରୁଛି।
Comments are closed.