ମାନସିକ ସ୍ବାସ୍ଥ୍ୟକୁ ଭଲ ରଖିବାର ଏକ ପ୍ରମୁଖ ଉପାୟ ହେଲା ନିଜ ଷ୍ଟ୍ରେସ ଲେବଲକୁ ନିୟନ୍ତ୍ରଣ କରିବା । ଆମେ ଯେତେ ଅଧିକ ନିଜର ମାନସିକ ଚାପକୁ ନିୟନ୍ତ୍ରଣରେ ରଖିବା ସେତେ ଅଧିକ ସୁସ୍ଥ ରହିବା । ତେବେ ଆଜିକାଲିର ବ୍ୟସ୍ତବହୁଳ ଜୀବନରେ ଚାପ ଆସିବା ସ୍ବାଭାବିକ । ହେଲେ କିଛି ଟ୍ରିକ ଓ ଟିପ୍ସ ରହିଛି ଯାହାକୁ ବ୍ୟବହାର କରି ଆମେ ଜୀବନରେ ଚାପ ମୁକ୍ତ ରହି ପାରିବା । ବ୍ୟବସ୍ଥିତ ଢଙ୍ଗରେ ଦୈନନ୍ଦିନ କାର୍ଯ୍ୟ କରିବା ଫଳରେ ଆମେ ଷ୍ଟ୍ରେସକୁ ନିୟନ୍ତ୍ରଣ କରିବାରେ ସଫଳ ହୋଇପାରିବା ।
ମାନସିକ ଚାପର କାରଣ ବୁଝନ୍ତୁ
ସବୁଠାରୁ ଗୁରୁତର ପଦକ୍ଷେପ ହେଲା ମାନସିକ ଚାପର କାରଣ ପ୍ରଥମେ ବୁଝନ୍ତୁ । ସାଧାରଣତଃ ମାନସିକ ଚାପ ଆର୍ଥିକ ସମସ୍ୟା, ସ୍ବାସ୍ଥ୍ୟଗତ କାରଣ, ସମ୍ପର୍କରେ ଫାଟ , କାର୍ଯ୍ୟାଳୟରେ ଚାପ କାରଣରୁ ମାନସିକ ଚାପର ଆରମ୍ଭ ହୋଇଥାଏ । ତେଣୁ ଏହି ସବୁ କାରଣକୁ ଚିହ୍ନି ସମସ୍ୟାକୁ ସମାଧାନ କରିବାକୁ ଚେଷ୍ଟା କରନ୍ତୁ କିମ୍ବା କିଭଳି ଏହାକୁ ନିୟନ୍ତ୍ରଣ କରିବେ ସେଥିପ୍ରତି ଚେଷ୍ଟିତ ହୁଅନ୍ତୁ ।
ଧ୍ୟାନ କରନ୍ତୁ
ମନକୁ ଶାନ୍ତ ରଖିବାର ସବୁଠାର ଉପାଦେୟ ଉପାୟ ହେଲା ଧ୍ୟାନ କରିବା । ଧ୍ୟାନ କରିବା ଦ୍ବାରା ଅନେକ ଚିନ୍ତା ଦୂର ହୋଇଥାଏ । ପ୍ରତିଦିନ ସକାଳୁ ୫ ରୁ ୧୦ ମିନିଟ ଧ୍ୟାନ କରନ୍ତୁ, ଏହା ଆପଣଙ୍କ ମନକୁ ଶାନ୍ତ କରିବା ସହିତ ଅନେକ ଚିନ୍ତାରୁ ମୁକ୍ତ କରିବା । ଏହି ସମୟରେ ସମସ୍ତ ଚିନ୍ତାରୁ ମୁକ୍ତ ରହିବାକୁ ଚେଷ୍ଟା କରନ୍ତୁ । ସେହିଭଳି ଏହି ସମୟରେ କିଛି ଭଲ ସ୍ମୃତି ମନେ ପକାଇ ପାରିବେ । ନଚେତ୍ ନିଜ ପସନ୍ଦର ସ୍ଲୋ ମ୍ୟୁଜିକ୍ ଶୁଣି ଧ୍ୟାନ କରିପାରିବେ, ଏହା ଖୁବ ଲାଭ ଦାୟକ ହୋଇଥାଏ ।
ବ୍ୟାୟାମ
ପ୍ରତିଦିନ ବ୍ୟାୟାମ କରିବା ଆମ ଶରୀର ପାଇଁ ଖୁବ ଲାଭଦାୟକ ହୋଇଥାଏ । ପ୍ରତିଦିନ ବ୍ୟାୟାମ କରିବା ଫଳରେ ଆମ ଶରୀର ଫୂର୍ତ୍ତି ରହିବା ସହିତ ମନ ଭଲ ରହିଥାଏ । ବ୍ୟାୟାମ ଆମ ଷ୍ଟ୍ରେସ ହର୍ମୋନକୁ କମାଇବାରେ ସାହାଯ୍ୟ କରିଥାଏ । ଏହା କୋର୍ଟିସୋଲ ହର୍ମୋନକୁ କମାଇ ଏଣ୍ଡ୍ରୋଫିନ୍ ହର୍ମୋନ କ୍ଷରଣକୁ ବଢାଇଥାଏ । ଯେଉଁ କାରଣରୁ ଆମେ ଖୁସି ରହିବାକୁ ଲାଗିଥାଉ । ଯାହାଫଳରେ ଆମକୁ ଭଲ ନିଦ ମଧ୍ୟ ହୋଇଥାଏ । ଷ୍ଟ୍ରେସ ମ୍ୟାନେଜ କରିବାର ଏହା ଖୁବ ଭଲ ଉପାୟ । ତେଣୁ ପ୍ରତିଦିନ ୨୦ ରୁ ୩୦ ମିନିଟ୍ କୌଣସି ବି ବ୍ୟାୟାମ ଯେପରି ଚାଲିବା, ଯୋଗ କିମ୍ବା ବ୍ୟାୟାମ କରିପାରିବେ । ଏହା ଆପଣଙ୍କ ଜୀବନ ଉପରେ ଖୁବ ଅଧିକ ପ୍ରଭାବ ପକାଇବ ।
ନାଁ କହିବା ଶିଖନ୍ତୁ
ଜୀବନରେ ଏଭଳି କିଛି ମୂହୁର୍ତ୍ତଥାଏ ଯେଉଁଠି ନାଁ କହିବା ଆବଶ୍ୟକ ହୋଇଥାଏ, ଏପରି କରିବା ଦ୍ବାରା ଆମେ ଜୀବନରେ ଅଯଥା ସମସ୍ୟାରୁ ଦୂରରେ ରହି ପାରିବା । ନିଜର କାର୍ଯ୍ୟକ୍ଷେତ୍ରରେ, ସାମାଜିକ ସ୍ତରରେ କିମ୍ବା କୌଣସି ବି ସମ୍ପର୍କରେ ଯଦି କିଛି କଥା ପାଇଁ ଆପଣ ପ୍ରସ୍ତୁତ ନାହାନ୍ତି ତେବେ ସିଧାସିଧା ଏଥିରୁ ଓହରି ଯାଆନ୍ତୁ । ଇଚ୍ଛା ନଥାଇ ଚାପରେ ଆସି କୌଣସି କାମ କରିବା ଦ୍ବାରା ଆପଣ ନିଜେ ହିଁ ସମସ୍ୟାରେ ପଡିବେ, ତେଣୁ ନାଁ କହିବା ଶିଖନ୍ତୁ । ଏହାଦ୍ବାରା ଆପଣଙ୍କ ଚାପ କମିବ ।
ଡାକ୍ତରଙ୍କ ପରାମର୍ଶ
ମାନସିକ ସମସ୍ୟା ମଧ୍ୟ ଆମ ଶାରିରୀକ ସମସ୍ୟା ଭଳି ହୋଇଥାଏ । ଏହାକୁ ଭଲ କରିବାକୁ ଏକାଧିକ ଡାକ୍ତରଖାନା ସହିତ ଡାକ୍ତର ମଧ୍ୟ ରହିଛନ୍ତି । ତେଣୁ ଡାକ୍ତରଙ୍କ ପରାମର୍ଶ ନେବାକୁ କେବେ ହେଲେ ବି ପଛାନ୍ତୁ ନାହିଁ । ସବୁବେଳେ ଯଦି ଲାଗୁଛି ଆପଣଙ୍କ ନିଜର ହେଉ କିମ୍ବା ଆଖାପାଖରେ କୌଣସି ବ୍ୟକ୍ତିଙ୍କର ମାନସିକ ସ୍ଥିତି ଖରାପ ରହିଛି । ତେବେ ତୁରନ୍ତ ମାନସିକ ବିଶେଷଜ୍ଞଙ୍କର ସାହାଯ୍ୟ ନିଅନ୍ତୁ । ଡାକ୍ତରଙ୍କ ସହିତ ପରାମର୍ଶ କରି ଉପଯୁକ୍ତ ଚିକିତ୍ସା କରାଇଲେ ଏହା ଭଲ ହେବାର ସମ୍ଭାବା ଅଧିକ ରହିଛି । ସେହିଭଳି ଏହାକୁ କୌଣସି ଗୁରୁତର ରୋଗ ଭାବି କେବେ ଲୁଚାନ୍ତୁ ନାହିଁ । ଏହା କୌଣସି ଲଜ୍ୟା କଥା ନୁହେଁ ଅନ୍ୟ ସମସ୍ତ ରୋଗ ଭଳି ଏହାର ମଧ୍ୟ ଚିକିତ୍ସା ସମ୍ଭବ ।
ନିଜ ଲୋକଙ୍କ ସହିତ ଯୋଡି ହୋଇ ରୁହନ୍ତୁ
ମାନସିକ ଚାପରୁ ମୁକ୍ତି ପାଇବା ପାଇଁ ଡାକ୍ତର ଯେତିକି ସାହାଯ୍ୟ କରିପାରିବେ ନିଜ ଘର ଲୋକ କିମ୍ବା ବନ୍ଧୁମାନେ ମଧ୍ୟ ସେତିକି ସାହାଯ୍ୟ କରିପାରିବେ । ତେଣୁ ଯଦି କୌଣସି ସମସ୍ୟା ରହିଛି ତେବେ ଯାହା ସହିତ ଆପଣ ନିଜ ମନର ସବୁକଥା ସେୟାର କରନ୍ତି , ତାଙ୍କ ସହ ତୁରନ୍ତ କଥା ହୁଅନ୍ତୁ । ମନରେ କୌଣସି ଦ୍ବନ୍ଦ୍ବ ରଖନ୍ତୁ ନାହିଁ ତାଙ୍କୁ ସମସ୍ୟା ବିଷୟରେ କୁହନ୍ତୁ ଏବଂ ସାହାଯ୍ୟ ମାଗନ୍ତୁ । ଏପରି କରିବା ଦ୍ବାରା ଆପଣଙ୍କ ମନ ହାଲୁକା ହେବାସହ ସମସ୍ୟାର ସମାଧାନ ମଧ୍ୟ ବାହାରି ପାରିବ । ତେଣୁ ନିଜ ମନରେ କୌଣସି ସମସ୍ୟାକୁ ଲୁଚାଇ ନରଖି ମନର କଥା ସେୟାର କରନ୍ତୁ ।
