ମାନସିକ ଚାପରେ ରହିଲେ ସମସ୍ତଙ୍କର କିଛି ନା କିଛି ଲକ୍ଷଣ ଦେଖିବାକୁ ମିଳିଥାଏ । ଏହା ବେଳେବେଳେ ଛୋଟ ହୋଇପାରେ ବେଳେବେଳେ ଗୁରୁତର ମଧ୍ୟ ହୋଇଥାଏ । ହେଲେ ଏହି ଲକ୍ଷଣ ସବୁକୁ ଚିହ୍ନି ରୋଗ ବିଷୟରେ ପ୍ରଥମେ ଜାଣିବାକୁ ହେବ ଯାହାପରେ ଏହାକୁ ସମାଧାନ କରିବା ସହଜ ହେବ । ଆସନ୍ତୁ ଜାଣିବା ଏହି ରୋଗର କଣ ସବୁ ଲକ୍ଷଣ ହୋଇପାରେ ।
ଭାବନାତ୍ମକ ଲକ୍ଷଣ
ମାନସିକ ଚାପରେ ରହୁଥିବା ଲୋକ ସବୁବେଳେ ଦୁଃଖ, ଅସହାୟ ଭାବେ ରହିବା ଆରମ୍ଭ କରନ୍ତି । ଯେ କୌଣସି ପରିସ୍ଥିତିକୁ ଖୁବ ଅଧିକ ଡରିବା । ବାରମ୍ବାର ମନ ପରିବର୍ତ୍ତନ ହେବା, ହଠାତ୍ କୌଣସି କଥାରେ ରାଗିଯିବା, ଛୋଟଛୋଟ କଥାରେ ଚିଡଚିଡା ହେବା । ହଠାତ୍ କାନ୍ଦିବା । କଥା ନଥାଇ ମଧ୍ୟ ମନ ଦୁଃଖ କରିବା ଏପରି କି କାନ୍ଦି ପକାଇବା । କୌଣସି ଲୋକଙ୍କ ସହିତ ଏମାନେ ସଠିକ୍ ଭାବେ କଥା ହୋଇ ପାରନ୍ତି ନାହିଁ । ସେହିଭଳି ସବୁବେଳେ ଏକୁଟିଆ ରହିବାକୁ ଏମାନେ ପସନ୍ଦ କରିଥାଆନ୍ତି ।
ନିଷ୍ପତ୍ତି ନେଇ ନପାରିବା
ସବୁଠାରୁ ବଡ ଦ୍ବନ୍ଦ ଏହି ରୋଗୀମାନେ କୌଣସି ନିଷ୍ପତ୍ତି ନେଇ ପାରନ୍ତି ନାହିଁ । ଛୋଟଛୋଟ ନିଷ୍ପତ୍ତି ହେଲେ ବି ଅନ୍ୟ ଉପରେ ନିର୍ଭର କରନ୍ତି । ହଠାତ୍ କିଛି ନିଷ୍ପତ୍ତି ନେଲେ ମଧ୍ୟ କିଛି ସମୟପରେ ଏହା ବଦଳି ଯାଇଥାଏ । କୌଣସି କାର୍ଯ୍ୟକୁ କରିବା ପାଇଁ ହଁ କରିଥିଲେ ମଧ୍ୟ ପରେ ଏହା ବଦଳି ଯାଇଥାଏ । ପରେ ସେମାନେ ଏହାକୁ କରିପାରିବେ ନାହିଁ ବୋଲି ମତ ଦେଇଥାଆନ୍ତି ।
ସ୍ମରଣ ଶକ୍ତି କମିବା
କିଛି ମାନସିକ ଚାପରେ ଥିବା ବ୍ୟକ୍ତିଙ୍କ ନିକଟରେ ସ୍ମରଣ ଶକ୍ତି କମିବାର ଉଦାହରଣ ଦେଖିବାକୁ ମିଳେ । ସେମାନେ ବିଭିନ୍ନ ଛୋଟଛୋଟ ଘଟଣାକୁ ଭୁଲିବାକୁ ଲାଗନ୍ତି । ତାଙ୍କୁ ଯଦି କୌଣସି କଥା ପାଇଁ କୁହାଯାଇଥାଏ ସେମାନେ ଏହାକୁ ନ କରି ଭୁଲି ଯାଇଥାଆନ୍ତି । ସେହିଭଳି କୌଣସି ଘଟଣା ଯାହାକୁ ସେ ମନରେ ଭାବୁଥାଆନ୍ତି ତାହାକୁ ବାସ୍ତବ ବୋଲି ଭାବି ନିଅନ୍ତି । ଏହା ବେଳେବେଳେ ଅନେକ ସମସ୍ୟାରେ ମଧ୍ୟ ପକାଇଥାଏ ।
ଶାରିରୀକ ଲକ୍ଷଣ
ଏହି ସମସ୍ୟାରେ କିଛି ଶାରିରୀକ ଲକ୍ଷଣ ମଧ୍ୟ ଦେଖିବାକୁ ମିଳିଥାଏ । ଯେପରି ଫଟିଗୋ, ଭୋକ ନଲାଗିବା, ବ୍ୟବହାରରେ ପରିବର୍ତ୍ତନ, ନିଦ୍ରା ହିନତା, ପାଚନ ତନ୍ତ୍ରରେ ସମସ୍ୟା, ମୁଣ୍ଡ ବିନ୍ଧା ଭଳି ସମସ୍ୟା ଦେଖିବାକୁ ମିଳିଥାଏ । ତେବେ ସବୁବେଳେ ଏହିଭଳି ଲକ୍ଷଣ ମାନସିକ ଚାପର ହୋଇ ନଥାଏ ।
