ମାନସିକ ସ୍ବାସ୍ଥ୍ୟକୁ ଠିକ ରଖିବାକୁ ପ୍ରଥମେ ସମସ୍ୟା ପଛର କାରଣକୁ ବୁଝିବାକୁ ପଡିଥାଏ । ଯାହା ଫଳରେ ଏହାକୁ ନିରାକରଣ କରିବା ସହଜ ହୋଇଥାଏ । ତେଣୁ ସବୁବେଳେ ନିଜର ହେଉ କିମ୍ବା ଅନ୍ୟ କାହାର ଯଦି ମାନସିକ ସମସ୍ୟା ଦେଖାଯାଉଛି ତେବେ ପ୍ରଥମେ ଏହା ପଛର କାରଣ ବୁଝନ୍ତୁ ।
ଶାରିରୀକ ସମସ୍ୟା ହେଲେ ଆମର ବିଭିନ୍ନ ଲକ୍ଷଣ ଦେଖିବାକୁ ମିଳିଥାଏ । ଯାହାକୁ ଚିହ୍ନି ଆମର କଣ ରୋଗ ହୋଇଛି ସେ ସମ୍ପର୍କରେ ଡାକ୍ତର ଜାଣିଥାଆନ୍ତି । ରୋଗ ଚିହ୍ନଟ ହେବା ପରେ ଏହାର କାରଣ ଓ ନିରାକରଣ ଉପରେ ଆଲୋଚନା ହୋଇଥାଏ । ଠିକ୍ ସେହିପରି ମାନସିକ ସ୍ବାସ୍ଥ୍ୟ ଖରାପ ହେଲେ ବିଭିନ୍ନ ପ୍ରକାର ଲକ୍ଷଣ ଦେଖିବାକୁ ମିଳିଥାଏ । ହେଲେ ଏହାକୁ ଚିହ୍ନିବାରେ ବିଳମ୍ବ ହୋଇଥାଏ ଯାହା ସମସ୍ୟାକୁ ଗୁରୁତର କରିଥାଏ । ବେଳେବେଳେ ଏଭଳି ହୁଏ କି ଲକ୍ଷଣ ସମ୍ପର୍କରେ ନିଜେ ରୋଗୀ ମଧ୍ୟ ଜାଣି ପାରନ୍ତି ନାହିଁ ତେଣୁ ସେ କାହାଠାରୁ ସାହାଯ୍ୟ ମଧ୍ୟ ନେଇପାରନ୍ତି ନାହିଁ । ତେଣୁ ପ୍ରଥମେ ଏହାର କାରଣ ଓ ଲକ୍ଷଣ ସମ୍ପର୍କରେ ଜାଣିବାକୁ ହେବ ।
ପାଠପଢା ସମସ୍ୟା
ବର୍ତ୍ତମାନ ଏଭଳି ଅନେକ ଯୁବପିଢିଙ୍କୁ ଦେଖିବାକୁ ମିଳୁଛନ୍ତି ଯେଉଁମାନେ ପାଠ ପଢିବା ସମୟରେ ହିଁ ଆତ୍ମହତ୍ୟା କରୁଥିବାର ସାମନାକୁ ଆସୁଛି । ଏମାନଙ୍କର ମୁଖ୍ୟ କାରଣ ରହୁଛି ପାଠପଢାର ଚାପ । ଆଜିକାଲି ପାଠପଢାର ମାହୋଲ ବଦଳିଛି । ସବୁପ୍ରକାର କୋର୍ସ ପାଇଁ ହେଉ କିମ୍ବା ଚାକିରି ପାଇଁ ପ୍ରତିଯୋଗିତା ବଢିଛି । ସେହିଭଳି ପ୍ରତିଯୋଗୀଙ୍କ ସଂଖ୍ୟା ମଧ୍ୟ ବଢିବାରେ ଲାଗିଛି ଯେଉଁ କାରଣରୁ ବିଭିନ୍ନ ପରୀକ୍ଷାରେ ସଫଳ ହେବାର ହାର କମିଛି । ସଫଳ ହେବା ପାଇଁ ସେମାନଙ୍କୁ ଖୁବ ଅଧିକ ପରିଶ୍ରମ କରିବାକୁ ପଡୁଛି । ଯାହାଫଳରେ ଚାପ ମଧ୍ୟ ବଢିବାରେ ଲାଗିଛି । ଯେତେବେଳେ ସେମାନେ ଖୁବ ଅଧିକ ପରିଶ୍ରମ କରି ମଧ୍ୟ ସଫଳ ହେଉନାହାନ୍ତି, ସେତେବେଳେ ମାନସିକ ସ୍ତରରେ ହାରି ଯାଉଛନ୍ତି । ସେମାନଙ୍କ ଧୈର୍ଯ୍ୟର ଅନ୍ତ ଘଟୁଛି । ଯାହା ଆତ୍ମହତ୍ୟାର ରୂପ ନେଉଛି । ମାନସିକସ୍ତରରେ ଭାଙ୍ଗି ପଡିଥିବା ଏହି ଯୁବଗୋଷ୍ଠୀଙ୍କୁ କେହି ବୁଝାଇବା ଆଗରୁ ସେମାନେ ଚରମ ନିଷ୍ପତ୍ତି ନେଇ ଯାଉଛନ୍ତି ।
ବେରୋଜଗାରୀ
ଆଜିକାଲି ସମାଜରେ ବେରୋଜଗାରୀ ଏକ ପ୍ରମୁଖ ସମସ୍ୟାରେ ପରିଣତ ହୋଇଛି । ଏହା ମାନସିକ ସ୍ତରରେ ମଧ୍ୟ ଲୋକଙ୍କୁ ଦୁର୍ବଳ କରିବାରେ ଲାଗିଛି । ଲୋକମାନେ ରୋଜଗାର ନପାଇ ବିଭିନ୍ନ ପ୍ରକାର ଆର୍ଥିକ ସମସ୍ୟା ଦେଇ ଗତି କରୁଛନ୍ତି । ଯାହା ସେମାନଙ୍କର ମାନସିକ ସମସ୍ୟାକୁ ବଢାଉଛି । ଅଧିକ ଦିନ ବେରୋଜଗାର ରହିବା ସହିତ ଆର୍ଥିକ ସମସ୍ୟାକୁ ହ୍ୟାଣ୍ଡେଲ କରିବା ସେମାନଙ୍କ ପକ୍ଷେ କଷ୍ଟକର ହେଉଛି । ଏଭଳି ସମସ୍ୟାରୁ ମୁକୁଳିବା ପାଇଁ ସେମାନେ ଆତ୍ମହତ୍ୟା ଭଳି ଚରମ ପଦକ୍ଷେପ ନେଉଥିବାର ଉଦାହରଣ ଦେଖିବାକୁ ମିଳୁଛି । ସେହିଭଳି ଆଜିକାଲି ଛାତ୍ରଛାତ୍ରୀମାନେ ବିଭିନ୍ନ ପ୍ରକାର କୋର୍ସ କରିବା ପାଇଁ ଖୁବ ଅଧିକ ଅର୍ଥ ଖର୍ଚ୍ଚ କରୁଛନ୍ତି । ଏହାପରେ ସେମାନଙ୍କୁ ଚାକିରି ମିଳିବ କି ନାହିଁ ତାହାକୁ ନେଇ ମଧ୍ୟ କୌଣସି ନିର୍ଦ୍ଧିଷ୍ଟତା ରହୁନାହିଁ । ତେଣୁ ସେମାନେ ନିରୁତ୍ସାହିତ ହେଉଥିବା ନଜରକୁ ଆସୁଛି ।
ସମ୍ପର୍କରେ ପାଠ
ଆଜିକାଲି ମାନସିକ ସ୍ବାସ୍ଥ୍ୟ ନଷ୍ଟ ହେବାର ଆଉ ଏକ କାରଣ ସାଜିଛି ସମ୍ପର୍କରେ ଫାଟ । ଅନେକ ସମୟରେ ଦାମ୍ପତ୍ୟ ହେଉ କିମ୍ବା ପ୍ରେମ ସମ୍ପର୍କରେ ଫାଟ ଦେଖିବାକୁ ମିଳୁଛି । ତେବେ ଯେତେବେଳେ ଗୋଟିଏ ସମ୍ପର୍କରେ ଆମେ ଅଧିକ ଦିନ ଧରି ଭାବନାତ୍ମକ ଭାବେ ଯୋଡି ହୋଇରହୁ ତାହା ଭାଙ୍ଗିଲେ ଆମକୁ କଷ୍ଟ ହୋଇଥାଏ । ଏହି କଷ୍ଟକୁ ସହି ଧୈର୍ଯ୍ୟଧରି ଆଗକୁ ବଢିବା ଏକ ଚାଲେଞ୍ଜପୂର୍ଣ୍ଣ କାର୍ଯ୍ୟ । ଯେଉଁଥିରେ ସମସ୍ତେ ସଫଳ ହୋଇପାରୁ ନାହାନ୍ତି । ବିଶେଷଭାବେ ଯୁବପିଢି ଏହି ଅବସ୍ଥାରେ ନିଜକୁ ସମ୍ଭାଳି ନପାରି ଚରମ ପଦକ୍ଷେପ ନେଉଛନ୍ତି ।
