ବ୍ୟବସାୟ ଏଭଳି ଏକ କ୍ଷେତ୍ର ଯେଉଁଠି ସମସ୍ତ ଚାହାନ୍ତି ନିଜ ଜିନିଷକୁ ସୁରକ୍ଷିତ ରଖିବାକୁ । ତେଣୁ ଦେଖିବେ ସମସ୍ତେ ନିଜ ଦୋକାନ ହେଉ କିମ୍ବା ଅଫିସ୍କୁ ଚାବି ପକାଇ ରଖନ୍ତି । ହେଲେ ନାଗାଲାଣ୍ଡ୍ର ଏଭଳି ଏକ ଗାଁ ରହିଛି ଯେଉଁଠାରେ ଦୋକାନରେ ଚାବି ପଡୁନଥିବା ସୂଚନା ମିଳିଛି । ଏହି ଗାଁର ନାଁ ରହିଛି ଖୋନୋମା ଗ୍ରାମ, ଯେଉଁଠାରେ ଦୋକାନରେ ଚାବି ପଡିବା ତ ଦୂରର କଥା ଦୋକାନରେ କୋଦାନୀ ମଧ୍ୟ ନଥାଆନ୍ତି । ଜଣେ ବ୍ଲଗର ଏନେଇ ସୋସିଆଲ ମିଡିଆରେ ପୋଷ୍ଟ କରିବା ପରେ ଏହା ଖୁବ ଅଧିକ ମାତ୍ରାରେ ଭାଇରାଲ ହେବାରେ ଲାଗିଛି । ପ୍ରତିଟି କିଣାବିକା ସେଠାରେ ବିଶ୍ୱାସରେ ହୋଇଥାଏ, ବ୍ୟବସାୟ ବିଶ୍ୱାସରେ ପରିଚାଳିତ ହୋଇଥାଏ । ସେଠାରେ ଆପଣଙ୍କର ଯାହା ଦରକାର ଆପଣ ଦୋକାନରୁ ଆଣିବା ପରେ ସେଠାରେ ଥିବା ବାକ୍ସରେ ପଇସା ପକାଇ ଆସିପାରିବେ । ସେହିଭଳି ଏଠାରେ ଲୋକମାନେ ମଧ୍ୟ ନିଜ ଘର ଚାବି ପକାନ୍ତି ନାହିଁ, ହେଲେ କୌଣସି ଦିନ ଚୋରି ହୋଇଥିବାର ସୂଚନା ନାହିଁ । ତେବେ ଏଠାରେ ଗୋଟିଏ ପ୍ରାଚୀନ ଆଦିବାସୀ ସମ୍ପ୍ରଦାୟର ଲୋକ ବସବାସ କରନ୍ତି ଯାହାଙ୍କର ଏହା ହେଉଛି ପରମ୍ପରା ବୋଲି ଏହି ଭିଡିଓରେ ସୂଚନା ଦିଆଯାଇଛି । ସେହିଭଳି ଏଠାର ଲୋକମାନେ ମଧ୍ୟ ଖୁବ ପ୍ରକୃତି ପ୍ରିୟ । ସମସ୍ତେ ଘରେ ନିଜ ବାଡିରେ ଚାଷ କରି ଖାଦ୍ୟ ସଂଗ୍ରହ କରିଥାଆନ୍ତି । ଏହାକୁ ସୋସିଆଲ ମିଡିଆରେ ଗ୍ରୀନ ଭିଲେଜ ବା ସବୁଜ ଗ୍ରାମର ଆଖ୍ୟା ମଧ୍ୟ ଦିଆଯାଇଛି ।
Comments are closed.