ବର୍ତ୍ତମାନ ବିଭିନ୍ନ ସ୍ଥାନରେ ବାର୍ଡ ଫ୍ଲୁର ଆତଙ୍କ ଦେଖିବାକୁ ମିଳୁଛି । ଯେଉଁଥିପାଇଁ କିଛି ସ୍ଥାନରେ ଚିକେନ୍ ଖାଇବାକୁ ବାରଣ ମଧ୍ୟ ହେଉଛି । ତେବେ ଆସନ୍ତୁ ଜାଣିବା କଣ ଏହି ବାର୍ଡ ଫ୍ଲୁ ଏବଂ ଏହା କିଭଳି ବ୍ୟାପିଥାଏ ।
ବାର୍ଡ ଫ୍ଲୁର ଅନ୍ୟନାମ ହେଉଛି ଏଭିଆନ୍ ଫ୍ଲୁ । ତେବେ ଏହି ବିଶେଷଭାବେ ପାଣିରେ ରହୁଥିବା ପକ୍ଷୀଙ୍କୁ ହୋଇଥାଏ, କିନ୍ତୁ ଏହା ଘରେ ରହୁଥିବା ପୋଷା ପକ୍ଷୀଙ୍କୁ ହେବାର ନଜିର ରହିଛି । ଏଥିରେ ଆମ ଆଖପାଖରେ ରହୁଥିବା ପାରା, କୁକୁଡା ଭଳି ପକ୍ଷୀ ପ୍ରଭାବିତ ହେବାର ଦେଖିବାକୁ ମିଳିଥାଏ । ଏହି ରୋଗର ଜୀବାଣୁ ଇନ୍ଫ୍ଲୁଏଞ୍ଜା ଏ ଟାଇପ୍ର ଭାଇରସ । ତେବେ ଏହି ରୋଗ ଯେ କେବଳ ପକ୍ଷୀଙ୍କୁ ହୋଇଥାଏ ତାହା ନୁହେଁ ଏହା ସେମାନଙ୍କ ଠାରୁ ମଣିଷମାନଙ୍କୁ ହେବା ମଧ୍ୟ ଦେଖିବାକୁ ମିଳିଥାଏ । ଏହି ଭାଇରସର ଏ(ଏଚ୍୫ଏନ୍୧), ଏ(ଏଚ୍୭ଏନ୍୯) ଏବଂ ଏ(ଏଚ୍୯ଏନ୍୨) ଏହି ପ୍ରକାର ଗୁଡିକ ମଣିଷଙ୍କୁ ପ୍ରଭାବିତ କରିବାର ଆଶଙ୍କା ରହିଛି ।
କାହାକୁ କରିପାରେ ପ୍ରଭାବିତ
ବାର୍ଡ ଫ୍ଲୁ ଭାଇରସ ବିଶେଷ ଭାବେ ଯେଉଁ ବ୍ୟକ୍ତି ଏହି ରୋଗରେ ପୀଡିତ ପକ୍ଷୀଙ୍କର ସଂସ୍ପର୍ଶରେ ଆସିଥାଆନ୍ତି, ସେମାନଙ୍କୁ ହୋଇଥାଏ । ଏହି ପକ୍ଷୀ ତାଲିକାରେ କୁକୁଡା, ବତକ, ପାରା ଆଦି ସାମିଲ ଅଛନ୍ତି । ସେହିଭଳି କୌଣସି ପୀଡିତ ବ୍ୟକ୍ତିଙ୍କ ସଂସ୍ପର୍ଶରେ ଆସିଲେ ମଧ୍ୟ ଏହା ହେବାର ସମ୍ଭାବନା ରହିଛି । ବିଶେଷଭାବେ ଗର୍ଭବତୀ, ରୋଗପ୍ରତିରୋଧକ ଶକ୍ତି ଦୁର୍ବଳ ଥିବା ବ୍ୟକ୍ତି ଏବଂ ବୟସ୍କଙ୍କ କ୍ଷେତ୍ରରେ ଏହି ସଂକ୍ରମଣ ହେବାର ସମ୍ଭାବନା ରହିଛି ।
ଯଦି ଏହି ସମସ୍ୟାର କୌଣସି ଲକ୍ଷଣ ଦେଖୁଛନ୍ତି, ତେବେ ତୁରନ୍ତୁ ଡାକ୍ତରଙ୍କ ପରାମର୍ଶ ନିଅନ୍ତୁ । ସେହିଭଳି ଯେତେବେଳେ ବି ଚିକେନ୍ ଖାଉଛନ୍ତି ତେବେ ଭଲ କରି ରାନ୍ଧି ଖାଆନ୍ତୁ । ଚେଷ୍ଟା କରନ୍ତୁ ଭଲ ସ୍ଥାନରୁ ମାଂସ ଆଣି ଖାଇବାକୁ । ମଲା ପକ୍ଷୀ ଖାଇବାରୁ ନିବୃତ୍ତ ରୁହନ୍ତୁ । ଯେଉଁ ସମୟରେ ଆପଣଙ୍କ ଅଞ୍ଚଳରେ ବାର୍ଡ ଫ୍ଲୁ ଦେଖିବାକୁ ମିଳୁଛି, ସେହି ସମୟରେ ଚିକେନ୍ ଓ ଅଣ୍ଡା ଖାଆନ୍ତୁ ନାହିଁ । ଯଦି ଖାଉଛନ୍ତି ତେବେ ଘରେ ଭଲ କରି ରାନ୍ଧି କିମ୍ବା ଡାକ୍ତରଙ୍କ ପରାମର୍ଶ ନେଇ ଖାଆନ୍ତୁ ।
