ପ୍ରଦୂଷଣ ବର୍ତ୍ତମାନ ବିଶ୍ୱର ସବୁଠାରୁ ବଡ ସମସ୍ୟା ଭାବେ ଉଭା ହୋଇଛି । ଏଥିପାଇଁ ସବୁ ଦେଶ ଚିନ୍ତା ପ୍ରକଟ କରୁଥିବାବେଳେ ଅଷ୍ଟ୍ରେଲିଆର ବୈଜ୍ଞାନିକମାନେ ଦେଇଥିବା ରିପୋର୍ଟ ବର୍ତ୍ତମାନ ଚର୍ଚ୍ଚାକୁ ଖୋରାକ ଯୋଗାଇଛି । ଅଷ୍ଟ୍ରେଲିଆର ନ୍ୟାସନାଲ ସାଇନ୍ସ ଏଜେନ୍ସିର ରିପୋର୍ଟ ଅନୁସାରେ ବର୍ତ୍ତମାନ ସମୁଦ୍ରରେ ପାଖାପାଖି ୧୧ ମିଲିଅନ ଟନ୍ ପ୍ଲାଷ୍ଟିକ ରହିଛି, ଯାହା ଧୀରେଧୀରେ ବଢୁଛି ମଧ୍ୟ । ତେଣୁ ବର୍ତ୍ତମାନ ସମୁଦ୍ରଜୀବଙ୍କର ସ୍ୱାସ୍ଥ୍ୟ ପ୍ରତି ଏହା ବଡ ବିପଦ ସାଜିଛି । ସେହିଭଳି ୨୦୪୦ ସୁଦ୍ଧା ଏହି ପ୍ଲାଷ୍ଟିକର ମାତ୍ରା ଡବଲ୍ ହେବାର ଆକଳନ ଏହି ରିପୋର୍ଟରେ କରାଯାଇଛି । ତେଣୁ ବର୍ତ୍ତମାନ ସାରା ବିଶ୍ୱକୁ ଏନେଇ ସତର୍କ ହେବାର ଆବଶ୍ୟକତା ରହିଛି, ନଚେତ୍ ପରିସ୍ଥିତି ଭୟଙ୍କର ହେବ ବୋଲି ବୈଜ୍ଞାନିକ ମତ ଦେଇଛନ୍ତି । ସମୁଦ୍ର ତଳେ ପଡିରହିଥିବା ଏହି ପ୍ଲାଷ୍ଟିକ ସମୁଦ୍ର ଉପରେ ଭାସୁଥିବା ପ୍ଲାଷ୍ଟିକ୍ ଠାରୁ ପାଖାପାଖି ୧୦ ଗୁଣ ଅଧିକ । ତେଣୁ ବର୍ତ୍ତମାନ ସ୍ଥଳ ଭାଗ ସହିତ ଜଳ ଭାଗ ପ୍ରଦୂଷଣ ଉପରେ ମଧ୍ୟ ଧ୍ୟାନ ଦେବାର ଆବଶ୍ୟକତା ରହିଛି ବୋଲି ଏହି ବୈଜ୍ଞାନିକ ମତ ଦେଇଛନ୍ତି ।
