ରାମାୟଣ, ମହାଭାରତ ଭଳି ପୁରାଣଗୁଡିକର ଆଦର ସବୁବେଳେ ରହିଥାଏ । ଏଥିରେ ଥିବା କାହାଣୀ ଶୁଣିଶୁଣି ଶିଶୁମାନେ ବଡ ହୋଇଥାଆନ୍ତି । ଏହି କାହାଣୀ ଯେ କେବଳ ପୁସ୍ତକରେ ସୀମିତ ହୋଇ ରହିଛି ତାହା ନୁହେଁ, ଏହାକୁ ନେଇ ଭାରତରେ ନିର୍ମାଣ ହୋଇଛି ଅନେକ ସିନେମା ଓ ଧାରାବାହିକ । ସେହି ସିନେମା ଓ ଧାରାବାହିକକୁ ନେଇ ସ୍ୱତନ୍ତ୍ର ଆଲୋଚନା…
ରାମାୟଣର କାହାଣୀକୁ ନେଇ ଆଲୋଚନା ଆରମ୍ଭ ହୁଏ, ଯେତେବେଳେ ଓମ୍ ରାଓ୍ୱତଙ୍କ ନିର୍ଦ୍ଦେଶିତ ଆଦିପୁରୁଷ ରିଲିଜ୍ ହୁଏ । ଏହି ଫିଲ୍ମର ବିଭିନ୍ନ କ୍ୟାରେକ୍ଟରଙ୍କର ଡାଇଲଗକୁ ନେଇ ଚାରିଆଡେ ଚର୍ଚ୍ଚା ଜାରି ରହିଛି । ଏହି ଫିଲ୍ମକୁ ନେଇ ଅନେକ ଅଭିଯୋଗ ଉଠିଛି । କିଏ ଏହାର ଡାଇଲଗକୁ ନେଇ ଅଭିଯୋଗ କରୁଛି ତ ଆଉ କିଏ ଏହାର ଭିଏଫ୍ଏକ୍ସକୁ ନେଇ ସମାଲୋଚନା କରୁଛି । ପୂର୍ବରୁ ହୋଇଥିବା ସମସ୍ତ ରାମାୟଣ ସିନେମା ଓ ଧାରାବାହିକ ସହିତ ଆଦିପୁରୁଷର ତୁଳନା କରାଯିବା ଫଳରେ ଏହାର ଅସଫଳତା ସାମ୍ନାକୁ ଆସିଛି । ୫୦୦ କୋଟି ବଜେଟ୍ରେ ପ୍ରସ୍ତୁତ ହୋଇଥିବା ଏହି ଫିଲ୍ମ ଦର୍ଶକଙ୍କୁ ଆକୃଷ୍ଟ କରିବାରେ ସଫଳ ହୋଇପାରି ନାହିଁ । ଏହାର ସ୍କ୍ରିପଫ ରାଇଟରଙ୍କ ଲେଖାଶୈଳୀ ହିନ୍ଦୁ ଧର୍ମାବଲମ୍ବୀଙ୍କ ଧର୍ମୀୟ ଭାବନାକୁ କୁଠାରଘାତ କରିଛି । ଏହି ଫିଲ୍ମରେ ଅତି ଅଜବ ଢଙ୍ଗରେ ଆମ ପ୍ରିୟ ରାମାୟଣର କାହାଣୀକୁ ବର୍ଣ୍ଣନା କରାଯିବା ନେଇ ସବୁଆଡୁ ଅଭିଯୋଗ ଆସୁଛି । ଫିଲ୍ମଟି ରିଲିଜ୍ ହେବାପରେ ଏହାର ଷ୍ଟାର୍ ପ୍ରଭାସ, କ୍ରିତି ସାନନ, ସୈଫ ଅଲ୍ଲୀ ଖାନ ଆଦିଙ୍କ ଅଭିନୟ ଉପରେ ମଧ୍ୟ ତାଙ୍କ ଫ୍ୟାନମାନେ ପ୍ରଶ୍ନ କରିବା ଆରମ୍ଭ କରିଦେଇଛନ୍ତି । ସେହିଭଳି ହନୁମାନ ଚରିତ୍ର ଓ ଏହାର ଡାଇଲଗକୁ ନେଇ ମଧ୍ୟ ଆଲୋଚନା ଜାରି ରହିଛି । ସେହିଭଳି ଏହି ସିନେମାରେ ରାବଣଙ୍କୁ ଯେଉଁଭଳି ଚିତ୍ରଣ କରାଯାଇଛି, ତାକୁ ନେଇ ଫିଲ୍ମ ସମୀକ୍ଷକଙ୍କ ଠାରୁ ଆରମ୍ଭ କରି ଦର୍ଶକମାନେ ବି ପ୍ରଶ୍ନ ଉଠାଇଛନ୍ତି । ଏହି ଫିଲ୍ମର ଡାଇଲଗକୁ ନେଇ ସବୁଠାରୁ ବେଶି ଅଭିଯୋଗ କରିଛନ୍ତି ପୂର୍ବରୁ ରାମାୟଣ ଧାରାବାହିକରେ ଅଭିନୟ କରିଥିବା ଅଭିନେତାମାନେ । ତେଣୁ ଏଭଳି ଆଲୋଚନା ହେଉଥିବାରୁ ଫିଲ୍ମଟି ରିଲିଜ ପରେ ଏହାର କେତେକ ଡାଇଲଗକୁ ମେକର୍ସମାନେ ଚେଞ୍ଜ୍ ମଧ୍ୟ କରିଦେଇଛନ୍ତି । ପୁରାତନ କାଳରେ ଜ୍ଞାନକୌଶଳର ଅଭାବ ଥାଇ ମଧ୍ୟ ରାମାୟଣ ଓ ମହାଭାରତ ଭଳି ପୌରାଣିକ କାହାଣୀକୁ ନିର୍ଦ୍ଦେଶକମାନେ ସୁନ୍ଦରଭାବେ ଉପସ୍ଥାପନ କରିପାରୁଥିଲେ । ଯାହା ଦର୍ଶକଙ୍କ ମନକୁ ଛୁଇଁବା ସହିତ ଆଜି ବି ସେମାନଙ୍କ ସ୍ମୃତିରେ ଜୀବନ୍ତ ହୋଇରହିଛି । ସେହିଭଳି ସେତେବେଳର ଅଭିନେତାଙ୍କ ଅଭିନୟ ଏତେ ଜୀବନ୍ତ ଥିଲା ଯେ ସେମାନଙ୍କୁ ଦର୍ଶକ ସତରେ ପ୍ରଭୁ ଶ୍ରୀରାମ ଓ କୃଷ୍ଣ ବୋଲି ଭାବୁଥିଲେ । ହେଲେ ଆଦିପୁରୁଷରେ ଡାଇଲଗ, ଅଭିନୟ, ଭିଏଫ୍ଏକ୍ସ ସମସ୍ତ ବିଷୟରେ ଦର୍ଶକ ପ୍ରଶ୍ନ ଉଠାଇଛନ୍ତି । ସୋସିଆଲ ମିଡିଆଠାରୁ ଆରମ୍ଭ କରି ବିଭିନ୍ନ ଗଣମାଧ୍ୟମ ସବୁସ୍ଥାନରେ ଏହି ଫିଲ୍ମକୁ ନେଇ ନକରାତ୍ମକ ଆଲୋଚନା ଜାରି ରହିଛି । ଏହାରି ମଧ୍ୟରେ ଫିଲ୍ମର ଡାଇଲଗ ରାଇଟରଙ୍କ ଅଯଥା ଉତ୍ତର ମଧ୍ୟ ସମସ୍ତଙ୍କୁ ବିରକ୍ତ କରାଇଛି । ଏହାର ଡାଇଲଗ ରାଇଟର ମନୋଜ ମୁଣ୍ଟାସିରଙ୍କ ମତରେ ଏହା ଏକ କାଳ୍ପନିକ କାହାଣୀ, ରାମାୟଣରେ ବର୍ଣ୍ଣିତ ହନୁମାନ ଜୀ କୌଣସି ଭଗବାନ ନଥିଲେ, ସେ ଥିଲେ ଜଣେ ବଳିଷ୍ଠ ଭକ୍ତ । ଯାହାଙ୍କର ଭକ୍ତିରେ ଥିଲା ଅପାର ଶକ୍ତି, ତେଣୁ ତାଙ୍କୁ ଲୋକ ପୂଜା କରୁଛନ୍ତି । ତେବେ ଏଭଳି ଯୁକ୍ତିକୁ ଦର୍ଶକ ଗ୍ରହଣ କରିପାରି ନଥିଲେ । ଏହା ସମସ୍ତଙ୍କ ମନକୁ ଆଘାତ ପହଞ୍ଚାଇଥିଲା । ଏହାର ତୀବ୍ର ବିରୋଧ ମଧ୍ୟ କରାଯାଇଥିଲା । କେବଳ ମନୋଜ ନୁହେଁ, ଏହି ବିବାଦ ଭିତରକୁ ସେନ୍ସର ବୋର୍ଡ, ଆଦିପୁରଷର ପୂରା ମେକର୍ସ ଟିମ୍ ଟାଣି ହୋଇ ଆସିଥିଲେ । ଅନେକ ସ୍ଥାନରେ ଆଦିପୁରୁଷ ମେକର୍ସଙ୍କ ନାମରେ ଏଫ୍ଆଇଆର୍ ରୁଜୁ ପାଇଁ ଦାବି କରାଯାଇଥିଲା । ସେହିଭଳି ଏହି ବିବାଦରେ ଆହ୍ଲାବାଦ ହାଇକୋର୍ଟ ଉଭୟ ସେନ୍ସର ବୋର୍ଡ ଓ ଆଦିପୁରୁଷ ମେକର୍ସଙ୍କ ଉପରେ ବର୍ଷିଥିଲେ । ଆମର ଆଗାମୀ ପିଢିକୁ ଏଭଳି ଭୁଲ ଶିକ୍ଷା ଦେବାକୁ ଚାହୁଁଥିବାରୁ ଉଭୟଙ୍କୁ କୋର୍ଟ ଭତ୍ସନା କରିଥିଲେ । ତେବେ ଏହି ଆଦିପୁରୁଷ ବିବାଦରୁ ଅନ୍ୟ ମେକର୍ସ ଯେଉଁମାନେ ଆଗକୁ ରାମାୟଣ କିମ୍ବା ମହାଭାରତ ଭଳି ପୌରାଣିକ ବିଷୟକୁ ନେଇ ଫିଲ୍ମ ନିର୍ମାଣ କରିବାକୁ ଚାହିଁବେ କିଛି ଶିକ୍ଷା ପାଇବେ ବୋଲି ସମସ୍ତେ ଆଶା କରିଛନ୍ତି । ସେହିଭଳି ଆଦିପୁରୁଷ ବିବାଦରେ ବିଭିନ୍ନ ସେଲିବ୍ରିଟି ମାନେ ମେକର୍ସ ଓ ଡାଇଲଗ୍ ରାଇଟରଙ୍କୁ ଟ୍ରୋଲ୍ କରିଛନ୍ତି । ସେମାନେ ରାମାୟଣର ମୂଳ କାହାଣୀକୁ ପରିବର୍ତ୍ତନ କରିବାକୁ ଚାହିଁଛନ୍ତି, ଯାହା କେବେ ବି ଗ୍ରହଣଯୋଗ୍ୟ ନୁହେଁ ବୋଲି ବିଭିନ୍ନ ବଡବଡ ସେଲିବ୍ରିଟି ମତ ଦେଇଛନ୍ତି ।ରାମାୟଣର କାହାଣୀକୁ ନ ବଦଳାଯାଇ ମଧ୍ୟ ଏହାକୁ ସୁନ୍ଦର ଭାବରେ ଦର୍ଶକଙ୍କ ସମ୍ମୁଖରେ ପ୍ରସ୍ତୁତ କରାଯାଇପାରିବ ବୋଲି ସେମାନେ ପରାମର୍ଶ ଦେଇଛନ୍ତି ।
