ନେଲସନ୍ ମଣ୍ଡେଲା ଦକ୍ଷିଣ ଆଫ୍ରିକାର ପ୍ରଥମ ଅଣଶେ୍ୱତାଙ୍ଗ ବା କୃଷ୍ଣକାୟ ରାଷ୍ଟ୍ରପତି ଥିଲେ । ରାଷ୍ଟ୍ରପତି ହେବା ପୂର୍ବରୁ ସେ ଦକ୍ଷିଣ ଆଫ୍ରିକାରେ ଅନେକ ଦିନ ଧରି ଚାଲି ଆସିଥିବା ବର୍ଣ୍ଣବୈଷ୍ଣମ୍ୟବାଦ ବିରୋଧରେ ଦୀର୍ଘ ଦିନ ଧରି ସଂଗ୍ରାମ କରିଥିଲେ । ମଣ୍ଡେଲା ମହାତ୍ମା ଗାନ୍ଧୀଙ୍କ ଦ୍ୱାରା ପ୍ରଭାବିତ ଥିଲେ । ଆଫ୍ରିକା ନ୍ୟାସନାଲ କଂଗ୍ରେସ ଓ ଏହାର ସଶସ୍ତ୍ର ବାହିନୀ ଉମଖେତୋ ବେ ସିଜେଓ୍ୱର ଅଧ୍ୟକ୍ଷ ଥିଲେ । ବର୍ଣ୍ଣବୈଷମ୍ୟବାଦ ବିରୋଧରେ ସଂଗ୍ରାମ ଯୋଗୁଁ ତାଙ୍କୁ ୨୭ ବର୍ଷ ରୋବେନ୍ ଦ୍ୱୀପ କରାଗାରରେ କଟାଇବାକୁ ପଡ଼ିଥିଲା । ସେଠାରେ ତାଙ୍କୁ କୋଇଲା ଖଣିରେ ବି କାମ କରିବାକୁ ପଡ଼ିଥିଲା । ୧୯୯୦ରେ ଶେ୍ୱତାଙ୍ଗ ସରକାର ସହିତ ବୁଝାମଣା ପରେ ସେ ଆଧୁନିକ ଦକ୍ଷିଣ ଆଫ୍ରିକା ନିର୍ମାଣ କରିଥିଲେ । ତାଙ୍କର ଏହି ସଂଘର୍ଷ ଯୋଗୁଁ ସାରା ବିଶ୍ୱରେ ସେ ବର୍ଣ୍ଣ ବୈଷମ୍ୟବାଦ ବିରୋଧ ସଂଗ୍ରାମର ପ୍ରତୀକ ପାଲଟି ଯାଇଥିଲେ । ଜାତିସଂଘ ତାଙ୍କ ଜନ୍ମ ଦିବସକୁ ନେଲସନ ମଣ୍ଡେଲା ଦିବସ ଭାବେ ପାଳିବାକୁ ନିଷ୍ପତ୍ତି ନେଇଛି । ମଣ୍ଡେଲା ୧୮ ଜୁଲାଇ ୧୯୧୮ରେ ଦକ୍ଷିଣ ଆଫ୍ରିକାର ଇଷ୍ଟର୍ଣ୍ଣ କେପ୍ ଅନ୍ତର୍ଗତ ମୁଏଜୋରେ ଜନ୍ମ ଗ୍ରହଣ କରିଥିଲେ । ମଣ୍ଡେଲା ତାଙ୍କ ଜାତିର ନାମାନୁଯାୟୀ ମାଡ଼ିବା ନାମରେ ପରିଚିତ ଥିଲେ । ନୋବେଲ ଶାନ୍ତି ପୁରସ୍କାର, ଲେନିନ୍ ଶାନ୍ତି ପୁରସ୍କାରକୁ ମିଶାଇ ସେ ୨୫୦ରୁ ଅଧିକ ପୁରସ୍କାର ଓ ସମ୍ମାନ ପାଇଥିଲେ । ୫ ଡିସେମ୍ବର ୨୦୧୩ରେ ୯୫ ବର୍ଷ ବୟସରେ ତାଙ୍କର ପରଲୋକ ଘଟିଥିଲା । ଗାଣତନ୍ତ୍ରିକ ପଦ୍ଧତିରେ ନିର୍ବାଚିତ ରାଷ୍ଟ୍ରପତି ମଣ୍ଡେଲା ଦୀର୍ଘ ୬୭ ବର୍ଷ କାଳ ମାନବ ଅଧିକାର ଏବଂ ସାମାଜିକ ନ୍ୟାୟ ପାଇଁ ଲଢ଼ି ଦକ୍ଷିଣ ଆଫ୍ରିକାକୁ ସ୍ୱାଧୀନତା ଦେଇଥିବା ପ୍ରଥମ ରାଷ୍ଟ୍ରପତି । ତେଣୁ ତାଙ୍କ ଜନ୍ମ ଦିବସଟିକୁ ସମସ୍ତେ ଆନନ୍ଦ ଉଲ୍ଲାସରେ ପାଳନ କରିଥାନ୍ତି ।
ଡ଼ଃ.ଅରୁନ୍ଧତୀ ଦେବୀ
ଦୂରଭାଷ : ୯୯୩୭୧୭୨୮୧୦
Comments are closed.