କଥାରେ ଅଛି ସ୍ବାସ୍ଥ୍ୟ ହିଁ ସମ୍ପଦ । ଏହି ସ୍ବାସ୍ଥ୍ୟ ଭିତରେ କେବଳ ଶାରିରୀକ ସ୍ବାସ୍ଥ୍ୟ ନୁହେଁ ମାନସିକ ସ୍ବାସ୍ଥ୍ୟ ମଧ୍ୟ ଅନ୍ତର୍ଭୁକ୍ତ । ଜଣେ ବ୍ୟକ୍ତି ମାନସିକ ସ୍ତରରେ ଯେତେ ସୁସ୍ଥ ତାଙ୍କର ଜୀବନ ସେତେ ସରଳ ଓ ସଫଳ ବୋଲି ବିବେଚନା କରାଯାଇଥାଏ । ତେବେ ବର୍ତ୍ତମାନର ଯୁବପିଢି ମାନସିକ ସ୍ତରରେ ଭାଙ୍ଗି ପଡୁଥିବାର ଅନେକ ଉଦାହରଣ ସାମନାକୁ ଆସୁଛି, ଯାହା ଏବେ ସମାଜରେ ଏକ ଗୁରୁତର ସମସ୍ୟାରୂପେ ଉଭା ହୋଇଛି ।
ପ୍ରତିଦିନ ସକାଳୁ ଖବର କାଗଜ ହେଉ କିମ୍ବା ଗଣମାଧ୍ୟମରେ ଆତ୍ମାହୁତି ଖବର ଶୁଣିବାକୁ ମିଳୁଛି । କିଏ ବିଷ ପିଇ ଆତ୍ମହତ୍ୟା କରୁଛନ୍ତି ତ କିଏ ଦେହରେ ନିଆଁ ଲଗାଉଛନ୍ତି । ସେହିଭଳି କେଉଁଠି କିଏ ବେକରେ ରସି ଲଗାଇ ଝୁଲି ପଡୁଛନ୍ତି । ସବୁଠାରୁ ଚିନ୍ତାର ବିଷୟ ଏହି ମୃତ୍ୟୁ ତାଲିକାରେ ସବୁଠାରୁ ଅଧିକ ଯୁବପିଢିଙ୍କର ନାଁ ସାମନାକୁ ଆସୁଛି । ରିପୋର୍ଟ ଅନୁସାରେ ଭାରତରେ ଏହି ସମସ୍ୟା ଧୀରେଧୀରେ ବଢିଚାଲିଛି । ପ୍ରତିଦିନ ଏକାଧିକ ଏଭଳି ଘଟଣା ସାମନାକୁ ଆସୁଛି ଯେଉଁଥିରେ ପାଠ ପଢୁଥିବା କମ ବୟସର ପିଲାମାନେ ଜୀବନ ହାରୁଛନ୍ତି । ଏହାକୁ ନେଇ ବିଭିନ୍ନ ସଂସ୍ଥା ପକ୍ଷରୁ ବିଭିନ୍ନ ପ୍ରକାର ଗବେଷଣା ଜାରି ରହିଛି । ଯେଉଁଥିରେ ସମସ୍ତେ ଯୁବପିଢିଙ୍କର ମାନସିକତାରେ ଆସିଥିବା ପରିବର୍ତ୍ତନ ଉପରେ ଆଲୋଚନା କରାଯାଉଛି ଏବଂ କାରଣ ଖୋଜା ଯାଉଛି । କିଛି ଦଶନ୍ଧି ତଳେ ଆତ୍ମହତ୍ୟାର ବହୁତ ନଗଣ୍ୟ ଘଟଣା ସାମନାକୁ ଆସୁଥିଲା । ହେଲେ ବର୍ତ୍ତମାନ ଏହିସଂଖ୍ୟା ବଢିବାରେ ଲାଗିଛି । ତେବେ ଏହା ପଛରେ ମୂଳତଃ ମାନସିକ ସ୍ତରରେ ଅସୁସ୍ଥତାକୁ ଦାୟୀ କରାଯାଉଛି । ଆଜିକାଲିର ଯୁବପିଢିଙ୍କ ମଧ୍ୟରେ ଧୈର୍ଯ୍ୟର ଅଭାବ ଏହାର ପ୍ରାଥମିକ କାରଣ ବୋଲି ଅନେକ ମନସ୍ତ୍ବତବିଦ୍ ମତ ଦେଉଛନ୍ତି । ତେବେ କାରଣ ଯାହା ବି ହୋଇଥାଉ ବର୍ତ୍ତମାନ ଏହାର ସମାଧାନଭାବେ କେବଳ କାଉଂସିଲିଂକୁ ବିକଳ୍ପ ଭାବେ ନିଆଯାଉଛି । ଏକ୍ସପର୍ଟଙ୍କ ମତରେ ବର୍ତ୍ତମାନ ଯୁବପିଢିଙ୍କର ମାନସିକ ସ୍ବାସ୍ଥ୍ୟ ସଙ୍କଟରେ ରହିଛି, ଯାହାକୁ ବୁଝାସୁଝା କରି ବଦଳାଯାଇପାରିବ । ଯେଉଁଥିପାଇଁ ସେମାନଙ୍କ ଅଭିଭାବକଙ୍କ ସହିତ ତାଙ୍କ ଆଖପାଖରେ ରହୁଥିବା ସମସ୍ତ ଲୋକଙ୍କୁ ଧ୍ୟାନ ଦେବାକୁ ହେବ ।
