ଆମ ତ୍ରିରଙ୍ଗା କେବଳ ତିନୋଟିି ରଙ୍ଗ ନୁହେଁ । ଏହି ତିନିଟି ରଙ୍ଗ ଆମ ଦେଶର ତିନି ଶକ୍ତି । କେଶର ରଙ୍ଗ ହେଉଛି ଆମ ଦେଶର ଶକ୍ତି ଓ ସାହାସର ପ୍ରତୀକ, ଧଳା ରଙ୍ଗ ଶାନ୍ତି ତଥା ସତ୍ୟର ଚିହ୍ନ ଏବଂ ସବୁଜ ରଙ୍ଗ ହେଉଛି ଆମ ମାଟିର ସବୁଜିମା ବୃଦ୍ଧି, ଉର୍ବରତା ଓ ସଫଳତାକୁ ସୂଚାଇଥାଏ । ଅଶୋକ ଚକ୍ର ନ୍ୟାୟ ଓ ଧର୍ମର ଚକ୍ର ବା ପ୍ରତୀକ । ଆମ ଦେଶ ଚଳିତଥର ପାଳନ କରୁଛି ସ୍ୱାଧୀନତାର ୭୯ ବର୍ଷ । ଗତ ବର୍ଷ ଠାରୁ ଏହା “ଅମୃତ ମହୋତ୍ସବ’ ରୂପେ ସାରା ଦେଶରେ ଉତ୍ସାହର ସହ ପାଳିତ କରାଯାଉଛି । ଏଥିପାଇଁ “ହର୍ ଘର୍ ତିରଙ୍ଗା’ ର ଆହ୍ୱାନ ଦିଆଯାଇଛି ।
ଜାତୀୟ ପତାକା ପ୍ରତ୍ୟେକ ସାର୍ବଭୌମ ସ୍ୱାଧୀନ ରାଷ୍ଟ୍ରର ପ୍ରତୀକ, ରାଷ୍ଟ୍ର ମର୍ଯ୍ୟାଦାର ପରିଚୟ । ଆମ ଜାତୀୟ ପତାକାର ନିର୍ମାଣକର୍ତ୍ତା ହେଉଛନ୍ତି ପିଙ୍ଗାଳି ଭେଙ୍କେୟାନନ୍ଦ । ଏହାକୁ ୧୯୪୭ ଜୁଲାଇ ୨୨ ତାରିଖରେ ଭାରତୀୟ ସମ୍ବିଧାନ ସ୍ୱୀକୃତି ଦେଇଥିଲା । ଏହାର ଅନେକ ବ୍ୟାଖ୍ୟା ମଧ୍ୟରୁ ଗୋଟିଏ ହେଉଛି ଆମ ଜାତୀୟ ପତାକାର ନିମ୍ନଭାଗରେ ଥିବା ସବୁଜ ରଙ୍ଗ ଧରିତ୍ରୀ ବା ଭୂମିର ପ୍ରତୀକ ହୋଇଥିବାବେଳେ, ଉଦ୍ଧ୍ୱର୍ରେ ନାରଙ୍ଗି ରଙ୍ଗ ଭୂମା ବା ଆଧ୍ୟାତ୍ମିକ ଉତ୍କର୍ଷର ପ୍ରତୀକ । ଏହାର ମଧ୍ୟଭାଗରେ ଥିବା ଧଳାରଙ୍ଗ ଶାନ୍ତି, ସତ୍ୟ ଓ ଶୁଦ୍ଧତାର ପ୍ରତୀକ । ସେହି ଶାନ୍ତି, ସତ୍ୟ ଓ ଶୁଦ୍ଧତା ସହିତ ଜୀବନର ଅଗ୍ରଗତିର ପ୍ରତୀକ ହେଉଛି ଚକ୍ର । ଗୌତମ ବୁଦ୍ଧ ବୋଧିପ୍ରାପ୍ତ ହେବା ପରେ ଯେଉଁ ମୃଗବନ ଠାରେ ତାଙ୍କର ପ୍ରଥମ ଧର୍ମୋପଦେଶ ପ୍ରଦାନ କରିଥିଲେ, ତାହା ଏବେ ସାରନାଥ ଭାବରେ ପ୍ରସିଦ୍ଧ । କଳିଙ୍ଗ ଯୁଦ୍ଧ ପରେ ଅଶୋକ ଚଣ୍ଡାଶୋକରୁ ଧର୍ମାଶୋକରେ ପରିଣତ ହୋଇଥିଲେ । ତାହା ପରେ, ସେହି ସ୍ଥାନକୁ ସ୍ମରଣୀୟ କରି ରଖିବା ପାଇଁ ସେ ସେଠାରେ ଏକ ସ୍ତମ୍ଭ ନିର୍ମାଣ କରିଥିଲେ । ସେହି ସ୍ତମ୍ଭରେ ଏହି ଚକ୍ର ସ୍ଥାନ ପାଇଥିଲା । ତାହା ଥିଲା ୨୪ଟି ପହି ବା ଅର ବିଶିଷ୍ଟ ଚକ୍ର, ସେହି ଚକ୍ର ଆମ ଜାତୀୟ ପତାକାରେ ସ୍ଥାନ ପାଇଛି । ତାହା ରାତି ଓ ଦିନର ୨୪ ଘାର ପ୍ରତୀକ ବୋଲି କୁହାଯିବା ବେଳେ, ଏହାର ବିଭିନ୍ନ ବ୍ୟାଖ୍ୟା ରହିଛି ।
ଡ଼ଃ.ଅରୁନ୍ଧତୀ ଦେବୀ
ଦୂରଭାଷ : ୯୯୩୭୧୭୨୮୧୦
