ଆଜିକାଲି ଉଭୟ ମାତାପିତା ଚାକିରି କରୁଥିବାରୁ ପିଲାଙ୍କ ପାଇଁ ସମୟ କାଢିବା କଷ୍ଟ ହୋଇ ପଡୁଛି । ତେଣୁ ସମସ୍ତେ ଏହାର ଏକ ବିକଳ୍ପ ଭାବେ ଡେକେୟାର ସେଣ୍ଟରକୁ ବାଛୁଛନ୍ତି । ଏଠାରେ ପିଲାକୁ ଛାଡି ସମସ୍ତେ ନିଜନିଜର କର୍ମ କ୍ଷେତ୍ରକୁ ଜାଉଛନ୍ତି ଏବଂ ଏଠାରୁ ଫେରିବାପରେ ପିଲାକୁ ଘରକୁ ଆଣୁଛନ୍ତି । ହେଲେ ଏହି ଡେ କେୟାର ସେଣ୍ଟର ପିଲାଙ୍କ ପାଇଁ କେତେ ସୁରକ୍ଷିତ ସେ ନେଇ ବାରମ୍ବାର ପ୍ରଶ୍ନ ଉଠିଥାଏ । ଏଭଳି ଅନେକ ଘଟଣା ସାମନାକୁ ଆସିଥାଏ ଯେଉଁଥିରେ ଦେଖିବାକୁ ମିଳିଥାଏ ସେମାନେ ପିଲାଙ୍କ ଉପରେ ଅତ୍ୟାଚାର କରୁଛନ୍ତି । ଛୋଟଛୋଟ ପିଲାଙ୍କୁ ମାଡ ମାରିବା ସହିତ ସେମାନଙ୍କୁ ହଇରାଣ କରୁଥିବାର ସିସି ଟିଭି ଫୁଟେଜ ଭାଇରାଲ ହେଉଛି । ତେଣୁ ଗୋଟିଏ ଭଲ ଡ଼େ କେୟାର ସେଣ୍ଟର ଚୟନ କରିବା ବର୍ତ୍ତମାନ ଅନେକଙ୍କ ପାଇଁ ଏକ ଚାଲେଞ୍ଜ ପାଲଟିଛି । ତେବେ ଯଦି ଆପଣ ଏକ ଡେ କେୟାରରେ ପିଲାକୁ ଛାଡିବାକୁ ଚାହୁଁଛନ୍ତି ତେବେ ଏହା ପୂର୍ବରୁ କିଛି କଥା ପ୍ରତି ଧ୍ୟାନ ଦିଅନ୍ତୁ । ଏହି ପଏଣ୍ଟ ଗୁଡିକ ଆପଣଙ୍କୁ ଏକ ଭଲ ସୁରକ୍ଷିତ ଡେ କେୟାର ଚୟନ କରିବାରେ ସହାୟତା କରିପାରେ । ତେବେ ଏହି ସମସ୍ତ ପଏଣ୍ଟକୁ ଅନୁକରଣ କରିବା ସତ୍ତେ୍ୱ ଡେ କେୟାର ବାଛୁଥିଲେ ଅଧିକ ସତର୍କତାର ସହ ବାଛନ୍ତୁ । ପିଲାଙ୍କ ଉପରେ ପିଲାବେଳେ ହୋଇଥିବା ଅତ୍ୟାଚାରର ଖୁବ ଅଧିକ ନକାରାତ୍ମକ ପ୍ରଭାବ ରହିଥାଏ । ଯାହା ବଡହେଲେ ଅନେକ ସମସ୍ୟାର କାରଣ ସାଜିଥାଏ । ସେହିଭଳି ଆମ ଦେଶରେ ପିଲାଙ୍କ ପାଇଁ ଅନେକ ନିୟମର ବ୍ୟବସ୍ଥା ରହିଛି ତାହାକୁ ଆଗ ନିଜେ ଭଲକରି ବୁଝନ୍ତୁ । ତେବେ ଆସନ୍ତୁ ଜାଣିବା ଡେକେୟାରରେ ପିଲାକୁ ଛାଡିବା ଆଗରୁ କଣ ସବୁ ଦିଗ ପ୍ରତି ଧ୍ୟାନ ଦେବେ
– ପ୍ରଥମେ ଦେଖନ୍ତୁ ସେଠାରେ ପ୍ରତିଟି ସ୍ଥାନରେ ସିସି ଟିଭି ଅଛି କି ନାହିଁ । ସବୁଠାରେ କ୍ୟାମେରା ଲାଗିବା ସହିତ ଯେପରି ଏହା କାର୍ଯ୍ୟକ୍ଷମ ହୋଇଥିବ ଏବଂ ଏହାର ଫୁଟେଜ୍ ସୁରକ୍ଷିତ ରହୁଥିବ ସେଥିପ୍ରତି ଧ୍ୟାନ ଦିଅନ୍ତୁ ।
– ମାତା ପିତାଙ୍କୁ ସିସି ଟିଭି ଫୁଟେଜ ଦେଖିବାର ଅନୁମତି ଅଛି କି ନାହିଁ ସେ ନେଇ ମଧ୍ୟ ବୁଝନ୍ତୁ । ଏପରି ନଥିଲେ ପ୍ରଶ୍ନ କରନ୍ତୁ । ଏହି ସୁବିଧା ପ୍ରଦାନ କରିବାକୁ ଦାବି କରନ୍ତୁ ନହେଲେ ସମ୍ପୃକ୍ତ ଡେ କେୟାରକୁ ଚୟନ କରିବାରୁ ନିବୃତ୍ତ ରୁହନ୍ତୁ ।
– ସମସ୍ତ କର୍ମଚାରୀଙ୍କ ପୋଲିସ ଭେରିଫିକେସନ ହୋଇଛି କି ନାହିଁ ଦେଖନ୍ତୁ ଯଦି ହୋଇ ନଥିବ ତେବେ କରାଇବାକୁ କୁହନ୍ତୁ । ଏହା ଆପଣଙ୍କ ପିଲାର ସୁରକ୍ଷା ପାଇଁ ଆବଶ୍ୟକ ।
– କର୍ମଚାରୀଙ୍କୁ ପିଲାଙ୍କୁ ବିଭିନ୍ନ ବିପଦ ସଙ୍କୁଳ ଅବସ୍ଥାରେ କିଭଳି ସୁରକ୍ଷା ଦେଇହେବ ସେ ନେଇ ଡେ କେୟାର ସେଣ୍ଟର ମାଲିକଙ୍କ ସହିତ କଥା ହୁଅନ୍ତୁ ।
– ସେଣ୍ଟରରେ ସମସ୍ତ ଚିକିତ୍ସା ସୁବିଧା ରହିଛି କି ନାହିଁ ଦେଖନ୍ତୁ । ଚିକିତ୍ସା ସୁବିଧା ଅର୍ଥାତ ପ୍ରାଥମିକ ଚିକିତ୍ସାର ସୁବିଧା ।
– ସେହିଭଳି ସୁରକ୍ଷା କିଭଳି ଅଛି ବୁଝନ୍ତୁ । ଯେପରି କେହି ବାହାର ଲୋକ ବିନା ଅନୁମତିରେ ଭିତରକୁ ଯାଇପାରିବେ ନାହିଁ ସେ ନେଇ ବୁଝନ୍ତୁ ।
