ଟ୍ରିପରେ ଯିବାର ପୂର୍ବପ୍ରସ୍ତୁତି
ଅନେକ ସମୟରେ ଆମେ ଛୁଟି କାଟିବା ପାଇଁ ଡ୍ରାଇଭିଂକୁ ଏକ ଅପସନ୍ ଭାବେ ରଖିଥାଆନ୍ତି । ସାଙ୍ଗସାଥୀ ହେଉ କିମ୍ବା ପରିବାର ଲୋକଙ୍କ ସହିତ ଗାଡି ଧରି ଏମାନେ ବୁଲିବାକୁ ବାହାରି ଯାଆନ୍ତି । ତେବେ କୌଣସି ରୋଡଟ୍ରିପ୍ରେ ଯିବା ଆଗରୁ ଅନେକ କଥା ରହିଛି, ଯାହା ଉପରେ ଧ୍ୟାନ ଦେବାକୁ ହୋଇଥାଏ ।
ଗାଡିକୁ କରନ୍ତୁ ପ୍ରସ୍ତୁତ
ପ୍ରଥମେ କୌଣସି ରୋଡ ଟ୍ରିପରେ ବାହାରିବା ଆଗରୁ ନିଜର ଗାଡିକୁ ଏଥିପାଇଁ ପ୍ରସ୍ତୁତ କରନ୍ତୁ । ଗାଡିର ଇଞ୍ଜିନ ଅଏଲ୍, ବ୍ରେକ୍, ଗାଡିର ଅନ୍ୟାନ ଯନ୍ତ୍ରାଂଶ ସଠିକ୍ ଅବସ୍ଥାରେ ଅଛି କି ନାହିଁ ସେ ନେଇ ଧ୍ୟାନ ଦିଅନ୍ତୁ । ଗାଡି ବାହାରକୁ ନେବା ଆଗରୁ ସମସ୍ତ କଥା ଦେଖି ଏହାପରେ ନିଜର ଜର୍ଣ୍ଣି ଆରମ୍ଭ କରନ୍ତୁ । ଚାହିଁବେ ଯଦି ଗାଡିକୁ ଥରେ ମେକାନିକ୍କୁ ମଧ୍ୟ ଦେଖାଇପାରିବେ, ଯାହା ଫଳରେ ଯଦି କୌଣସି ଅସୁବିଧା ଥିବ ତେବେ ଜଣାପଡିବ । ବିଶେଷ ଭାବେ ଲାଇଟ୍ ଓ ବ୍ରେକ ଉପରେ ଧ୍ୟାନ ଦିଅନ୍ତୁ ।
ଏମରଜେନ୍ସି କିଟ୍ ରଖନ୍ତୁ
ଡ୍ରାଇଭିଂରେ ଯିବା ସମୟରେ ପାଖରେ ଏମରଜେନ୍ସି କିଟ୍ ରଖନ୍ତୁ । ପାଖରେ ଫାଷ୍ଟଏଡ୍ କିଟ୍, ଟର୍ଚ୍ଚ, ଜମ୍ପର କେବଲ, ଅନ୍ୟାନ ଯନ୍ତ୍ରପାତି ଯାହା ଗାଡିକୁ ମରାମତି କରିବାରେ ଆବଶ୍ୟକ ପଡିପାରେ ସେ ସବୁକୁ ପାଖରେ ରଖନ୍ତୁ । ଯଦି ରାସ୍ତାରେ କୌଣସି ଯାନ୍ତ୍ରିକ ତ୍ରୁଟି ଦେଖିବାକୁ ମିଳିବ ଏଗୁଡିକ ଆପଣଙ୍କୁ ସହାୟତା କରିବ ।
ଟ୍ରାଫିକ୍କୁ ବୁଝନ୍ତୁ
ଯେଉଁ ସ୍ଥାନକୁ ଯାଉଛନ୍ତି ସେହି ସ୍ଥାନ ବିଷୟରେ ପ୍ରଥମେ ଜାଣନ୍ତୁ । ଏହି ସ୍ଥାନର ଟ୍ରାଫିକ୍ ଅବସ୍ଥା କଣ । କେଉଁ ସମୟରେ ଟ୍ରାଫିକ୍ ଅଧିକ ରହିଥାଏ, କେଉଁ ସମୟରେ କମ ଥାଏ । ସେ ନେଇ ସବିଶେଷ ବିବରଣୀ ପାଖରେ ରଖନ୍ତୁ, ଯାହା ଫଳରେ ସହଜରେ ଯାତ୍ରା କରିପାରିବେ ।
ପାଖରେ ରଖନ୍ତୁ ସମସ୍ତ ପ୍ରମାଣ ପତ୍ର
ପାଖରେ ଡ୍ରାଇଭିଂରେ ଯିବା ଆଗରୁ ସମସ୍ତ ପ୍ରମାଣ ପତ୍ର ଯେପରି ଡ୍ରାଇଭିଂ ଲାଇସେନ୍ସ, ଗାଡି ରେଜିଷ୍ଟ୍ରେସନ୍ ସାର୍ଟିଫିକେଟ, ଗାଡିର ଫିଟ୍ନେସ ସାର୍ଟିଫିକେଟ, ଇନ୍ସìରାନ୍ସ ସାର୍ଟିଫିକେଟ୍, ପଲ୍ୟୁସନ ସାର୍ଟିଫିକେଟ ସମସ୍ତକୁ ପାଖରେ ରଖନ୍ତୁ । ଏସବୁ କେତେବେଳେ ବି ଦରକାର ଆସିପାରେ । ନିଜ ବିଷୟରେ ମଧ୍ୟ ଏକ ବିବରଣୀ ଚିଠା ଅର୍ଥାତ ଏଥିରେ ନିଜର ସମ୍ପର୍କୀୟଙ୍କ ନମ୍ବର, ବ୍ଲଡଗ୍ରୁଫ, ଠିକଣା ଆଦି ଲେଖି ରଖିପାରିବେ ।
ପାଣିପାଗ ତଥ୍ୟ
କୌଣସି ରୋଡଟ୍ରିପରେ ଯିବା ଆଗରୁ ଯେଉଁଠାକୁ ଯାଉଛନ୍ତି ଏବଂ ଯେଉଁଠାରୁ ଯିବେ ସେଠିକାର ପାଣିପାଗ ସମ୍ପର୍କରେ ତଥ୍ୟ ରଖନ୍ତୁ । ନଚେତ୍ ଆପଣ ସମସ୍ୟାରେ ପଡିବାର ସମ୍ଭାବନା ରହିଛି । ଯଦି ବର୍ଷା ହେବାର ଥାଏ ତେବେ ସେ ନେଇ ବ୍ୟବସ୍ଥା କରିବା ପରେ ରୋଡ ଟ୍ରିପ୍ରେ ଯିବା ଆବଶ୍ୟକ ।
