ଟୁଆଁ ଟୁଇଁ

ନବେ ଦଶକ ଓ ତାଙ୍କ ପୂର୍ବରୁ ଜନ୍ମିତ ସମସ୍ତ ଶିଶୁଙ୍କର ପିଲାଦିନ ଆଈ ମାଆଙ୍କ ଠାରୁ କାହାଣୀ ଶୁଣିଶୁଣି କଟିଛି । ଏହି ସମୟରେ ବିଭିନ୍ନ ପ୍ରକାରର କାହାଣୀ ଓ ଗୀତ ଶୁଣିବାକୁ ମିଳିଥାଏ । ସେଥିରୁ ଗୋଟିଏ କାହାଣୀ ହେଲା ଟୁଆଁ ଟୁଇଁର ଗପ, ଯାହା ଖୁବ ପରିଚିତ ।

ଧୀରେ ଧୀରେ ଆମ ପିଲାଦିନ ଯେପରି ହଜିଯାଉଛି । ଅନେକ ଆଈମାଆ କାହାଣୀ ଆଜି ଆଉ ଶୁଣିବାକୁ ମିଳୁନି । ସେହିଭଳି ଏକ କାହାଣୀ ହେଲା ଟୁଆଁ ଟୁଇଁ । ଯାହାକୁ ଶୁଣିବାକୁ ସେତେବେଳେ ନିଜ ଜେଜେ,ମା, ଆଈ ଓ ଅଜାଙ୍କ ପାଖରେ ନାତି ନାତୁଣୀମାନେ ଲାଇନ୍‌ ଲଗାଉଥିଲେ । ବେସ୍‌ ମଜାଦାର ଏହି କାହାଣୀ ଯାହା ଆମ ପିଲାଦିନକୁ ଖୁବ ରୋମାଞ୍ଚିତ କରିଥିଲା । ବର୍ତ୍ତମାନ କିଛି ଆନିମେସନ ଜରିଆରେ ଏହି କାହାଣୀକୁ ମନେ ରଖିବା ପାଇଁ ଚେଷ୍ଟା ମଧ୍ୟ କରାଯାଉଛି । ବିଭିନ୍ନ ଗପର ଆନିମସନ ଭିଡିଓ ସୋସିଆଲ ମିଡିଆରେ ଘୁରିବୁଲୁଛି । ଏଗୁଡିକ ଭଏସ୍‌ ଓଭର ଦିଆଯାଇ କାର୍ଟୁନ ମାଧ୍ୟରେ ପ୍ରସ୍ତୁତ କରାଯାଉଛି । ତେବେ ବର୍ତ୍ତମାନ ପିଲାଙ୍କ ପାଇଁ ଏହା କିନ୍ତୁ ନୂଆ କାହାଣୀ । ମୋବାଇଲ ଦୁନିଆରେ ସେହି ଆଈମାଆ କାହାଣୀ ଖୁବ କମ ପିଲା ଶୁଣିବାକୁ ପାଉଛନ୍ତି । ଆସନ୍ତୁ ମନେପକାଇବା ସେହି ଟୁଆଁ ଟୁଇଁ କହାଣୀକୁ ।
କାହାଣୀର ଆରମ୍ଭ ହୁଏ ଦୁଇଟି ଚରିତ୍ର ଯାହାଙ୍କର ନାଁ ଥାଏ ଟୁଆଁ ଓ ଟୁଇଁ । ଏମାନେ ସମ୍ପର୍କରେ ଭାଇ ଭଉଣୀ ହୋଇଥାଆନ୍ତି । ଉଭୟ ଦିନେ ଘରେ ଏକୁଟିଆ ଥାଆନ୍ତି, ସେମାନଙ୍କ ବାପା ବୋଉ ମାମୁଁ ଘରକୁ ଯାଇଥାଆନ୍ତି । ଏହି ସମୟରେ ଟୁଆଁ ଯିଏ କି ଭାଇ ତାର ପିଠା ଖାଇବାକୁ ବହୁତ ଇଚ୍ଛା ହୁଏ । ଭାଇର ପିଠା ଖାଇବାର ଇଚ୍ଛା ହେଉଥିବା ଦେଖି ଭଉଣୀ ଟୁଇଁ ପିଠା ପାଇଁ ଯୋଗାଡ ଆରମ୍ଭ କରିଥାଏ । ଉଭୟ ଚକୁଳି ପିଠା ଖାଇବା ପାଇଁ ଚାଉଳ, ବିରି ଯୋଗାଡ କରିବାପରେ ଜଣା ପଡେ ଘରେ କାଠ ନାହିିଁ । ତେଣୁ ଭାଇ ଟୁଆଁ ବାହାରିପଡେ ଜଙ୍ଗଲକୁ କାଠ ଆଣିବାକୁ । ଏପଟେ ଟୁଇଁ ବିରି ଚାଉଳ ବାଟି ଟୁଆଁକୁ ଅପେକ୍ଷା କରି ବସିଥାଏ । ସେପଟେ ଜଙ୍ଗଲରେ ଟୁଆଁ କାଠ ସଂଗ୍ରହ କରି ଫେରିବା ସମୟରେ ବାଘମାମୁଁ ହାବୁଡରେ ପଡେ । ବାଘମାମୁଁ ଯେତେବେଳେ ଟୁଆଁକୁ ଧରି ମାରି ଖାଇବାକୁ ବାହାରେ ସେତେବେଳେ ଟୁଆଁ ତାକୁ ଅପେକ୍ଷା କରିବାକୁ କୁହେ । ସେ କୁହେ ଯଦି ବାଘମାମୁଁ ଟୁଆଁକୁ ଛାଡିଦବ ତେବେ ଟୁଆଁ ତାକୁ ଚକୁଳି ପିଠା ଖାଇବାକୁ ଦେବ । ଏହାଶୁଣି ବାଘ ମାମୁଁର ଚକୁଳି ପିଠା ଖାଇବାକୁ ଲୋଭ ଆସେ ତେଣୁ ସେ ଟୁଆଁକୁ ଛାଡିଦିଏ ଏବଂ ସନ୍ଧ୍ୟାବେଳେ ଯାଇ ତା ଘର ପାଖେ ପହଞ୍ଚିବ ବୋଲି ଚେତାବନି ଦିଏ । ଟୁଆଁ ଏହାପରେ ଖୁସି ମନରେ ଘରକୁ ଫେରେ । ଏହାପରେ ଉଭୟ ମିଶି ପିଠା ପ୍ରସ୍ତୁତ କରନ୍ତି । ଟୁଇଁ ପିଠା କରୁଥାଏ ଟୁଆଁ ଖାଉଥାଏ, ଟୁଆଁ ପିଠା କରୁଥାଏ ଟୁଇଁ ଖାଉଥାଏ । ଏପରି ଖାଇ ଖାଇ ସେମାନେ ସବୁ ପିଠା ଖାଇଦେଲେ । ତାପରେ ଟୁଆଁର ବାଘ ମାମୁଁ କଥା ମନେ ପଡିଲା । ସେ ଟୁଇଁକୁ ସବୁ କଥା କହିଲା । ଏହାପରେ ସେମାନେ ଏକ ଉପାୟ ବାହାର କରି ଗୋବର, ଗୋଡି ମିଶାଇ କିଛି ପିଠା ପ୍ରସ୍ତୁତ କଲେ । ଏହାପରେ ବଳକା ଗୋଟିଏ ଭଲ ପିଠାକୁ ଉପରେ ରଖି ତଳେ ସେହି ଗୋବର ପିଠାକୁ ରଖିଦେଲେ । ଏହାସହ ପାଖରେ ଏକ ମାଠିଆରେ ଲଙ୍କାଗୁଣ୍ଡ ମିଶା ପାଣି ମଧ୍ୟ ରଖିଦେଲେ । ବାଘ ରାତିରେ ଆସି ଭଲ ପିଠା ଖାଇବା ପରେ ଗୋଡି ପିଠା ଖାଇ ତାର ଦାନ୍ତ ଭାଙ୍ଗି ଗଲା । ଏହାପରେ ସେ ପାଣି ବଦଳରେ ସେ ଲଙ୍କା ପାଣି ପିଇ ରାଗିଗଲା । ତାପରେ ସେ ରାଗି ଉଭୟଙ୍କୁ ଖୋଜିଲା । ଗୋଟିଏ ମାଠିଆରେ ଉଭୟ ଲୁଚିଥିବା ଜାଣି ସେ ମାଠିଆକୁ ଧରି ବାଘ ଜଙ୍ଗଲ ମଧ୍ୟକୁ ଦୌଡିଲା । ବାଟରେ ଟୁଇଁଁକୁ ପାଡ ଲାଗିଲା, ସେ ଧୀରେ କରି ପାଡିଲା । ହେଲେ ପରେ ଟୁଆଁକୁ ପାଡ ଲାଗିଲା, କିନ୍ତୁ ଟୁଆଁ ବହୁତ ଜୋରରେ ପାଡି ଦେଲା । ଏହାପରେ ବାଘ ମାମୁଁ ଭାବିଲା ଘଡଘଡି ମାରିଲା । ସେ ଡରି ଯାଇ ମାଠିଆକୁ ସେଠାରେ ଫୋପାଡି ଜଙ୍ଗଲ ଭିତରକୁ ପଳାଇଲା । ଉଭୟ ଟୁଆଁ ଟୁଇଁ ସେମାନଙ୍କ ଘରକୁ ଫେରି ଆସିଲେ ।