କଥାରେ ଅଛି ସ୍ବାସ୍ଥ୍ୟ ଠାରୁ ଅଧିକ ମୂଲ୍ୟବାନ ସମ୍ପତ୍ତି ନାହିଁ । ଯିଏ ଯେତେ ସୁସ୍ଥ ସିଏ ସେତେ ଧନୀ । ତେବେ ସବୁବେଳେ ସମସ୍ତେ ଚାହାନ୍ତି ସୁସ୍ଥ ରହିବା ପାଇଁ , ହେଲେ ଏଭଳି କିଛି ସ୍ବାସ୍ଥ୍ୟ ସମସ୍ୟା ରହିଛି ଯେଉଁଥିରେ ଭାରତୀୟମାନେ ଆଗରେ ରହିଥାଆନ୍ତି । ସେହିଭଳି ଭାରତରେ ଅଧିକ ଦେଖିବାକୁ ମିଳୁଥିବା କିଛି ସ୍ବାସ୍ଥ୍ୟ ସମସ୍ୟାକୁ ନେଇ ସ୍ବତନ୍ତ୍ର ଉପସ୍ଥାପନା
ଶ୍ବାସକ୍ରିୟା ଜନିତ ସମସ୍ୟା
ଭାରତରେ ଦେଖିବାକୁ ମିଳୁଥିବା ବିଭିନ୍ନ ସ୍ବାସ୍ଥ୍ୟ ସମସ୍ୟାରେ ଶ୍ବାସକ୍ରିୟା ଜନିତ ସମସ୍ୟା ମଧ୍ୟ ରହିଛି, ଯାହାର ପ୍ରଭାବ ଅଧିକ ଦେଖିବାକୁ ମିଳେ । ଏଥିରେ ସବୁଠାରୁ ଗୁରୁତର ହୋଇଥାଏ ଲୋୟର ରେସ୍ପିରୋଟାରୀ ଇନଫେକସନ୍ । ଏହା ଅଧୀନରେ ନ୍ୟୁମୋନିଆ, ବ୍ରୋଙ୍କିଟସ୍ ଭଳି ସମସ୍ୟା ରହିଛି । ଏହି ସମସ୍ୟା ହେଲେ ବିଶେଷଭାବେ ଫୁସଫୁସ୍ ପ୍ରଭାବିତ ହୋଇଥାଏ । ଏହା ପ୍ରାୟତଃ ବ୍ୟାକ୍ଟେରିଆ, ଭାଇରସ କିମ୍ବା କବକ ଦ୍ବାରା ସଂକ୍ରମିତ ହୋଇଥାଏ । ଏହାର ଲକ୍ଷଣ ଭାବେ କାସ, ଛାତିରେ ଯନ୍ତ୍ରଣା, ଜ୍ବର, ନିଃଶ୍ବାସ ନେବାରେ ସମସ୍ୟା, ଫଟିଗୋ ଆଦି ଦେଖିବାକୁ ମିଳିଥାଏ । ଏହାର କାରଣ ଭାବେ ପ୍ରଦୂଷଣ, ଦୁର୍ବଳ ରୋଗପ୍ରତିରୋଧକ ଶକ୍ତି, ଧୂମପାନ ଆଦି ହୋଇଥାଏ । ତେବେ ଯଦି ଏଭଳି କୌଣସି ଲକ୍ଷଣ ଦେଖୁଛନ୍ତି ତେବେ ତୁରନ୍ତ ଡାକ୍ତରଙ୍କ ପରାମର୍ଶ ନିଅନ୍ତୁ । ଏହା ସହିତ ନିଜର ଦୌନନ୍ଦିନ ଜୀବନଶୈଳୀ ବଦଳାନ୍ତୁ । ସବୁବେଳେ ପ୍ରଥମେ କାରଣ ବୁଝି ଏହାପରେ ଏଗୁଡିକର ସମାଧାନ କାଢନ୍ତୁ । ଘର ପରିବେଶ ପରିଷ୍କାର ରଖନ୍ତୁ । ଧୂମପାନଠୁ ଦୂରରେ ରୁହନ୍ତୁ । ସବୁବେଳେ ଘରକୁ ଉପଯୁକ୍ତ ଭେଣ୍ଟିଲେସନ୍ ଦିଅନ୍ତୁ । ପ୍ରଦୂଷଣରୁ ଦୂରେଇ ରୁହନ୍ତୁ । ବାହାରକୁ ଯିବା ସମୟରେ ମାସ୍କ ପିନ୍ଧନ୍ତୁ । ସବୁଠାରୁ ଗୁରୁତ୍ବପୂର୍ଣ୍ଣ ଡାକ୍ତରଙ୍କ ପରାମର୍ଶରେ ଚିକିତ୍ସିତ ହୁଅନ୍ତୁ ।
ମଧୁମେହ
ଆଜିକାଲି ଘରେଘରେ ମଧୁମେହ ରୋଗୀ ଦେଖିବାକୁ ମିଳୁଛନ୍ତି । ମଧୁମେହ ଗୋଟିଏ ରୋଗ ନୁହେଁ ବରଂ ରୋଗର ସମାହାର ହୋଇଥାଏ । ଛୋଟ ହେଉ କି ବଡ ପ୍ରତ୍ୟେକ ବର୍ଗର ଲୋକଙ୍କ ନିକଟରେ ମଧୁମେହ ସମସ୍ୟା ଦେଖିବାକୁ ମିଳୁଛି । ଜନ୍ମ ହେଲା ଶିଶୁଙ୍କ ନିକଟରେ ମଧ୍ୟ ମଧୁମେହ ସମସ୍ୟା ରହୁଛି । ତେବେ ଏହାର ବିଭିନ୍ନ ପ୍ରକାର ରହୁଛି ଯେପରି ଟାଇପ୍ ୧, ଟାଇପ୍ ୨ ଆଦି । ସେହିଭଳି ଏହା ହେବାର କାରଣ ମଧ୍ୟ ବିଭିନ୍ନ ପ୍ରକାରର ଅଛି । କିଛି କ୍ଷେତ୍ରରେ ଏହା ଜେନେଟିକ୍ ହେଉଥିବାବେଳେ କିଛି କ୍ଷେତ୍ରରେ ଆମ ଶରୀରରେ ଇନ୍ସୁଲିନ୍ ଉତ୍ପାଦନ କରୁଥିବା ସେଲ ନଷ୍ଟ ହୋଇଯିବା କାରଣରୁ ଏହା ହୋଇଥାଏ । ତେବେ ମୁଖ୍ୟତଃ ଆମର ଜୀବନ ଶୈଳୀର ପ୍ରଭାବ ବେଶି ରହିଥାଏ । ଖାଦ୍ୟରେ ପୋଷକ ତତ୍ବର ଅଭାବ ରହିଲେ ମଧ୍ୟ ଏହା ହେବାର ସମ୍ଭାବନା ରହିଛି । ଏହାକୁ ଦୂରେଇବା ପାଇଁ ଏହାର ଲକ୍ଷଣ ଚିହ୍ନିବାର ଆବଶ୍ୟକତା ରହିଛି । ଯାହାଫଳରେ ଚିକିତ୍ସା କରାଇବା ଫଳରେ ଏଥିରୁ ମୁକ୍ତି ମିଳିବ । ଏହାର ଲକ୍ଷଣ ଭାବେ ବାରମ୍ବାର ପରିସ୍ରା ଲାଗିବା, ଅତ୍ୟଧୀକ ଶୋଷ ହେବା, ଫଟିଗୋ, ଦୁର୍ବଳ ଲାଗିବା, ଦୃଷ୍ଟି ଶକ୍ତି କମିବା, ଶରୀରରେ ସୃଷ୍ଟି ହେଉଥିବା କ୍ଷତ ଧୀରେଧୀରେ ଭଲହେବା ଆଦି । ସବୁବେଳେ ଡାକ୍ତରଙ୍କ ପରାମର୍ଶରେ ଔଷଧ ଓ ଖାଦ୍ୟ ଖାଆନ୍ତୁ । ଓଜନକୁ ନିୟନ୍ତ୍ରଣରେ ରଖନ୍ତୁ । ଖାଦ୍ୟରେ ସନ୍ତୁଳନ ରଖନ୍ତୁ, ବ୍ୟାୟାମ କରନ୍ତୁ । ସୁଗାର ଲେବଲ ଚେକ୍ ରଖନ୍ତୁ । ମିଠା ଓ ନିଶା ଦ୍ରବ୍ୟ ଠାରୁ ଦୂରରେ ରୁହନ୍ତୁ । ବ୍ୟାୟାମକୁ ନିଜ ଜୀବନର ଏକ ଅବିଚ୍ଛନ୍ନ ଅଙ୍ଗଭାବେ ସାମିଲ କରନ୍ତୁ ।
ଆଲ୍ଜିମର
ଅନେକ ଲୋକଙ୍କ ବୃଦ୍ଧା ଅବସ୍ଥାକୁ ଏହି ରୋଗ ବିଭିନ୍ନ ସମସ୍ୟାରେ ଭରି ଦଉଛି । ଏହି ରୋଗ ହେଲେ ରୋଗୀ ଅନେକ କଥା ଭୁଲିବାକୁ ଲାଗିଥାଆନ୍ତି । ଏପରିକି କିଛି ଗୁରୁତର କ୍ଷେତ୍ରରେ ସେମାନେ ମଣିଷ ସହିତ ଜୀବନର କିଛି ସ୍ମୃତିକୁ ମଧ୍ୟ ପାଶୋରି ଦେଇଥାଆନ୍ତି । ଯାହାଫଳରେ ତାଙ୍କୁ ସାମାଜିକ ଜୀବନ ବଞ୍ଚିବାରେ ଖୁବ ଅସୁବିଧା ହୋଇଥାଏ । ଏହାର ଲକ୍ଷଣ ଭାବେ ମେମୋରୀ ଲସ୍, ସମସ୍ତ କ୍ଷେତ୍ରରେ ଦ୍ବନ୍ଦ୍ବ, କଥାବାର୍ତ୍ତାରେ ଅସୁବିଧା, ମୁଡ ସୁଇଂ, ନିଜର ଦୈନନ୍ଦିନ କାର୍ଯ୍ୟ କରିବାରେ ଅସମର୍ଥ ହେବା ଭଳି ସମସ୍ୟା ଦେଖିବାକୁ ମିଳିଥାଏ । ଆଜି ପର୍ଯ୍ୟନ୍ତ ଏହାର ପ୍ରକୃତ ନିର୍ଦ୍ଧିଷ୍ଟ କାରଣ ସମ୍ପର୍କରେ ଜଣା ପଡିନାହିଁ । ଏହାର ପ୍ରାଥମିକ କାରଣ ଭାବେ ବୟସକୁ ନିଆଯାଇଥାଏ । କିଛି କିଛି ବିରଳ କେସ୍ ମଧ୍ୟ ରହିଛି ଯେଉଁଠାରେ କମ ବୟସରେ ଏହି ସମସ୍ୟା ଦେଖିବାକୁ ମିଳେ । ମୁଖ୍ୟତୃ ଡାକ୍ତରଙ୍କ ପରାମର୍ଶରେ ଚିକିତ୍ସା ଏହାର ସମାଧାନ ହୋଇଥାଏ । ତେବେ ଏହି ରୋଗୀଙ୍କ ପାଇଁ ପରିବାରର ଯତ୍ନ ଓ ଭଲପାଇବା ଖୁବ ଆବଶ୍ୟକ ହୋଇଥାଏ । ଏହି ସମୟରେ ସୁଷମ ଖାଦ୍ୟ ସହ ଚିନ୍ତା ମୁ୍କ୍ତ ପରିବେଶ ରୋଗୀଙ୍କୁ ବିଶେଷ ସହାୟକ ହୋଇଥାଏ । ଏହି ସମୟରେ ରୋଗୀଙ୍କର ଅଧିକ ଧ୍ୟାନ ରଖିବାର ଆବଶ୍ୟକତା ରହିଛି ।
କର୍କଟ
କର୍କଟ ରୋଗ ବା କ୍ୟାନ୍ସରର ବିଭିନ୍ନ ସମସ୍ୟା ପ୍ରତିଦିନ ଦେଖିବାକୁ ମିଳୁଛି । ଏହି ରୋଗର ଚିକିତ୍ସା ବହୁତ ବ୍ୟୟବହୂଳ ଓ କଷ୍ଟସାଧ୍ୟ ହୋଇଥିବାରୁ ଏହା ସମସ୍ତଙ୍କୁ ଖୁବ ଡରାଇଥାଏ । ଏହାର ବିଭିନ୍ନ ପ୍ରକାରର ରହିଛି । ଏହା ଆମ ଶରୀରର ବିଭିନ୍ନ ଅଙ୍ଗରେ ମୁଖ୍ୟତଃ ଦେଖିବାକୁ ମିଳିଥାଏ । ପ୍ରତିଟି ପ୍ରକାରର ଲକ୍ଷଣ ଓ କାରଣ ଭିନ୍ନ ହୋଇଥାଏ । ସେହିଭଳି କିଛି ଲକ୍ଷଣ କ୍ୟାନ୍ସର ଲକ୍ଷଣ ଭଳି ପ୍ରତୀତ ହେଲେ ମଧ୍ୟ ଏହା ହୋଇନଥାଏ । କେବଳ ପରୀକ୍ଷା ଦ୍ବାରା ହିଁ କର୍କଟ ରୋଗ ନେଇ ନିର୍ଦ୍ଧିଷ୍ଟ ତଥ୍ୟ ମିଳିଥାଏ । ତେବେ ଲକ୍ଷଣ ଭାବେ ଅଚାନକ ଓଜନ ହ୍ରାସ, ଫଟିଗୋ ସହିତ ଟ୍ୟୁମର ଭଳି ସମସ୍ୟା ଦେଖିବାକୁ ମିଳିଥାଏ । ସେହିଭଳି ଏହାର କାରଣ ମଧ୍ୟ ପ୍ରକାର ଅନୁଯାୟୀ ଭିନ୍ନ ହୋଇଥାଏ । ତେବେ କିଛିଟା କମନ୍ କାରଣ ରହିଛି ଯେପରି ବଂଶାନୁକ୍ରମ, ମାଦକ ଦ୍ରବ୍ୟ, ତମାଖୁ ସେବନ ଆଦି । ତେବେ ଏହି ରୋଗ ସମ୍ବନ୍ଧରେ ଅଧିକ ତଥ୍ୟ କେବଳ ଡାକ୍ତରଙ୍କ ପାଖରୁ ହିଁ ମିଳିବ । ଯେବେ ବି ଏହି ରୋଗର କୌଣସି ଲକ୍ଷଣ ଦେଖୁଛନ୍ତି ତେବେ ତୁରନ୍ତ ଡାକ୍ତରଙ୍କ ପରାମର୍ଶ କରନ୍ତୁ । କେବଳ ଲକ୍ଷଣ ନୁହେଁ ବରଂ ବିଭିନ୍ନ ପରୀକ୍ଷା ସାହାଯ୍ୟରେ ଏହି ରୋଗକୁ ଚିହ୍ନଟ କରାଯାଇଥାଏ । ସେହିଭଳି ଏହି ରୋଗ ପାଇଁ ଜୀବନଶୈଳୀ ଖୁବ ଗୁରୁତ୍ବପୂର୍ଣ୍ଣ ହୋଇଥାଏ । ସବୁବେଳେ ଏକ ସ୍ବାସ୍ଥ୍ୟକର ଜୀବନଶୈଳୀ ଅନୁକରଣ କରନ୍ତୁ । ନିଶା ଦ୍ରବ୍ୟଠାରୁ ଦୂରରେ ରୁହନ୍ତୁ । ସେହିଭଳି ନିୟମିତ ପୁଷ୍ଟିକର ଖାଦ୍ୟ ଖାଆନ୍ତୁ । ଚିନ୍ତା ମୁକ୍ତ ରହିବା ସହିତ ନିୟମିତ ବ୍ୟାୟାମ ଅଭ୍ୟାସ କରନ୍ତୁ ।
ଡାଇରିଆ
ଭାରତରେ ଡାଇରିଆ ଅଧିକମାତ୍ରାରେ ଦେଖିବାକୁ ମିଳିଥାଏ । ଏହା ଭାରତର ବିଭିନ୍ନ ସ୍ଥାନରେ ଏବଂ ଅଧିକ ଲୋକଙ୍କୁ ପ୍ରଭାବିତ କରିଥାଏ । ଏଥିରେ ଅନେକ ସମୟରେ ପ୍ରାଣହାନୀର ସୂଚନା ମଧ୍ୟ ରହିଛି । ଏହାଖୁବ ଗୁରୁତର ସ୍ବାସ୍ଥ୍ୟ ସମସ୍ୟା ଭାବେ କିଛି ଅଞ୍ଚଳରେ ଉଭା ହୋଇଥାଏ । ଏହା ବିଶେଷଭାବେ ବ୍ୟାକ୍ଟେରିଆ ସଂକ୍ରମଣ , ଖାଦ୍ୟ ବିଷାକ୍ତିକରଣ ଆଦି କାରଣରୁ ହୋଇଥାଏ । ଏହାର ଲକ୍ଷଣ ଭାବେ ତରଳ ଝାଡା, ପେଟରେ ଯନ୍ତ୍ରଣା, ବାନ୍ତି, ଜ୍ବର, ଡିହାଇଡ୍ରେସନ ଭଳି ସମସ୍ୟା ଦେଖିବାକୁ ମିଳିଥାଏ । ଏହାକୁ ଡାକ୍ତରୀ ଚିକିତ୍ସାରେ ରୋକିହେବ, ଏହାସହିତ ନିଜର ଦୈନନ୍ଦିନ ଜୀବନରେ ମଧ୍ୟ ଧ୍ୟାନ ଦେବାକୁ ହେବ । ଶୁଦ୍ଧ ପାନୀୟଜଳ, ପରିବେଶ ସଫାସୁତୁରା, ପୋଷଣରେ ଭରପୂର ଖାଦ୍ୟ, ଘରେ ରନ୍ଧା ଯାଇଥିବା ସତେଜ ଖାଦ୍ୟ ଆଦି ଏହାକୁ ରୋକିବାରେ ସହାୟକ ହୋଇଥାଏ । ତେବେ ଲକ୍ଷଣ ଦେଖିଲେ ତୁରନ୍ତ ଡାକ୍ତରଙ୍କ ପରାମର୍ଶରେ ଚିକିତ୍ସିତ ହୁଅନ୍ତୁ, ନଚେତ ଏହା ଘାତକ ହେବାର ଭୟ ରହିଥାଏ । ସେହିଭଳି ଡାଇରିଆ ହେଲେ ଅଧିକ ପରିମାଣ ପାଣି ପିଇବା ସହିତ ଘରେ ରହି ଆରାମ କରନ୍ତୁ ।
ଟିବି
ଟିବି ବା ଟ୍ୟୁବେରକ୍ଲୋସିସ୍ ଭାରତରେ ଅଧିକ ଦେଖିବାକୁ ମିଳୁଥିବା ରୋଗ ମଧ୍ୟରେ ସାମିଲ ରହିଛି । ଏହା ଏକ ଗମ୍ଭୀର ସଂକ୍ରମିତ ରୋଗ ଯାହା ଆମର ଫୁସଫୁସକୁ ପ୍ରଭାବିତ କରିଥାଏ । ଏହାର ଲକ୍ଷଣ ଭାବେ ଅଧିକ ଦିନ ଧରି କଫ, ଛାତିରେ ଯନ୍ତ୍ରଣା, କଫରେ ରକ୍ତ ପଡିବା, ରାତିରେ ଅଧିକ ଝାଳ ବାହାରିବା, ଓଜନ ହ୍ରାସ ଆଦି ଦେଖିବାକୁ ମିଳିଥାଏ । ଏହା ଏକ ସଂକ୍ରମିତ ରୋଗ ହୋଇଥିବାରୁ ଏହା ଖୁବ ଅଧିକ ଗମ୍ଭୀର ହୋଇଥାଏ । ତେବେ ଏହି ରୋଗ ପାଇଁ ବି ସି ଜି ଭ୍ୟାକସିନ୍ ଉପଲବ୍ଧ ହୋଇଥାଏ ତେଣୁ ଏହାକୁ ନେବା ଦ୍ବାରା ଟିବି ରୋଗରୁ ମୁକ୍ତି ମିଳିଥାଏ । ଏହାସହ ଏହାର ଲକ୍ଷଣ ଚିହ୍ନି ଶୀଘ୍ର ଚିକିତ୍ସା କଲେ ମଧ୍ୟ ଏଥିରୁ ମୁକ୍ତି ମିଳିବ । ଏଥିସହିତ କିଭଳି ଏହା ଅନ୍ୟ କାହାଠାରୁ ସଂକ୍ରମିତ ହେବ ନାହିଁ ସେଥିପ୍ରତି ଧ୍ୟାନ ଦିଅନ୍ତୁ , ଲାଭ ମିଳିବ ।
ମାନସିକ ସ୍ବାସ୍ଥ୍ୟ
ଆଜିକାଲି ଭାରତରେ ଅନେକ ଆତ୍ମହତ୍ୟା ଘଟଣା ସାମନାକୁ ଆସୁଛି । ବିଶେଷଭାବେ ଯୁବପିଢିଙ୍କ କ୍ଷେତ୍ରରେ ଏହା ଦେଖିବାକୁ ମିଳୁଛି । ଜୀବନରେ କୌଣସି ଛୋଟଛୋଟ ସମସ୍ୟା ଆସିଲେ ମଧ୍ୟ ସେମାନେ ହାରି ଯାଉଛନ୍ତି । କିଛି ଆଗପଛ ନଭାବି ଚରମ ପଦକ୍ଷେପ ନେଉଥିବା ଦେଖିବାକୁ ମିଳୁଛି । ଆତ୍ମହତ୍ୟାକୁ ସବୁ ସମସ୍ୟାର ସମାଧାନ ଭାବେ ଗ୍ରହଣ କରୁଛନ୍ତି ଯୁବପିଢି । ସେହିଭଳି ଅନେକ ପିଲା ହେଉ କି ବଡଙ୍କ ନିକଟରେ ଅବସାଦ ଦେଖିବାକୁ ମିଳୁଛି । ଅଫିସରେ କାର୍ଯ୍ୟ ବ୍ୟବସ୍ଥା ହଉ କିମ୍ବା ଘରେ କୌଣସି ସମସ୍ୟା ସବୁକିଛି ଆମର ମାନସିକ ସ୍ବାସ୍ଥ୍ୟ ଉପରେ ବିଶେଷ ପ୍ରଭାବ ପକାଇଥାଏ । ହେଲେ ଏହାରି ଭିତରେ ମଧ୍ୟ ଆମକୁ ନିଜ ମାନସିକ ସ୍ବାସ୍ଥ୍ୟର ଯତ୍ନ ନେବାକୁ ହୋଇଥାଏ । ମାନସିକ ସ୍ତରରେ ସକରାତ୍ମକ ରହି କିଭଳି ଆଗକୁ ବଢିହେବ ସେନେଇ ଯତ୍ନ ବାନ ହେବାକୁ ପଡିବ । ଯଦି କୌଣସି ସମସ୍ୟା ରହିଛି ତେବେ ଏହାକୁ ପରିବାର ସଦସ୍ୟ ଓ ସାଙ୍ଗସାଥୀଙ୍କ ସହିତ ଆଲୋଚନା କରି ସମାଧାନ କରିବାକୁ ଚେଷ୍ଟ କରନ୍ତୁ । ସେହିଭଳି ମାନସିକ ସ୍ତରରେ ସୁସ୍ଥ ରହିବା ପାଇଁ ଧ୍ୟାନ ଓ ବ୍ୟାୟାମକୁ ଅଭ୍ୟାସରେ ପକାନ୍ତୁ । ସବୁବେଳେ ନିଜକୁ ଯାହା ଭଲ ଲାଗୁଛି ସେଥିରେ ମନ ଦିଅନ୍ତୁ । ଏଭଳି ସ୍ଥିତିରୁ ବାହାରିବା ପାଇଁ ଅନ୍ୟମାନଙ୍କ ସାହାଯ୍ୟ ମଧ୍ୟ ନିଅନ୍ତୁ ।
