ଶୀତଦିନେ ଆସିଲେ ଦିଲ୍ଲୀର ପ୍ରଦୂଷଣ ସମ୍ପର୍କରେ ସମସ୍ତେ ଆଲୋଚନା କରିବା ଆରମ୍ଭ କରନ୍ତି । ଏହି ସମୟରେ ଦିଲ୍ଲୀରେ ଥିବା ଲୋକମାନେ ଘରୁ ବାହାରିବାକୁ ଭୟ କରନ୍ତି । ହେଲେ ନିକଟରେ ହୋଇଥିବା ଗବେଷଣା ଅନୁସାରେ କେବଳ ଶୀତଦିନେ ନୁହେଁ ଖରାଦିନେ ବି ଦିଲ୍ଲୀର ବାୟୁମଣ୍ଡଳ ସୁରକ୍ଷିତ ନୁହେଁ । ଦିଲ୍ଲୀର ବାୟୁମଣ୍ଡଳରେ ସାଧାରଣତଃ ତିନୋଟି ପ୍ରକାରର ମାଇକ୍ରୋପ୍ଲାଷ୍ଟିକ ପିଏମ୍୧୦, ପିଏମ୍୨.୫, ପିଏମ୍୧ ଦେଖିବାକୁ ମିଳିଥାଏ । ସେହିଭଳି ସୂଚନା ଅନୁସାରେ ଶୀତଦିନ ଅପେକ୍ଷା ଲୋକମାନେ ଖରାଦିନେ ଅଧିକ ପ୍ଲାଷ୍ଟିକକୁ ଶ୍ୱାସକ୍ରିୟାରେ ଗ୍ରହଣ କରୁଛନ୍ତି । ଶୀତଦିନେ ଜଣେ ବ୍ୟକ୍ତି ଦୈନିକ ୧୦.୭ ମାଇକ୍ରୋପାଟିକିଲ୍ ସଂସ୍ପର୍ଶରେ ଆସୁଥିବାବେଳେ ଏହା ଖରାଦିନେ ବଢି ୨୧.୧ରେ ପହଞ୍ଚିଥାଏ, ଯାହା ବର୍ତ୍ତମାନ ଚିନ୍ତାର ବିଷୟ ପାଲଟିଛି । ଏହି ଗବେଷଣାକୁ ଇଣ୍ଡିଆନ ଇନ୍ଷ୍ଟିଚ୍ୟୁଟ୍ ଅଫ୍ ଟ୍ରପିକାଲ ମେଟ୍ରୋଲୋଜି ପକ୍ଷରୁ କରାଯାଇଥିଲା । ଏଠିକାର ବାୟୁମଣ୍ଡଳରେ ବିଶେଷଭାବେ ପଲିଥିଲାଇନ୍ ଟେରେଫଥାଲେଟ ମାଇକ୍ରୋ ପ୍ଲାଷ୍ଟିକ ମିଳିଛି । ଯାହା ବିଶେଷଭାବେ ଖାଦ୍ୟ ପଦାର୍ଥ ପ୍ୟାକିଂ କରିବା ଓ ଟେକ୍ସଷ୍ଟାଇଲ ଶିଳ୍ପରେ ବ୍ୟବହାର ହୋଇଥାଏ । ଏହାର ପରିମାଣ ୪୧ ପ୍ରତିଶତ ଥିବାବେଳେ ପଲିଥିନ୍ ୨୭ ପ୍ରତିଶତ, ପଲିଷ୍ଟର ୧୮ ପ୍ରତିଶତ, ପଲିଷ୍ଟେରେଇନ୍ ୯ ପ୍ରତିଶତ ଓ ପିଭିସି ୫ ପ୍ରତିଶତ ରହିଥିବା ଏହି ଗବେଷଣାରୁ ଜଣା ପଡିଛି । ଏହା ଆମ ସ୍ୱାସ୍ଥ୍ୟ ପାଇଁ ଖୁବ କ୍ଷତିକାରକ ବୋଲି ଏହି ରିପୋର୍ଟରେ ଦର୍ଶାଯାଇଛି । ଏହା ବିଶେଷଭାବେ ସ୍ୱାସକ୍ରିୟା ଜନିତ ସମସ୍ୟାକୁ ବଢାଉଛି ।
