ନୂଆଦିଲ୍ଲୀ: ଶନିବାର ଦିଲ୍ଲୀ କ୍ୟାପିଟାଲ୍ସ ବିପକ୍ଷ ଆଇପିଏଲ ମ୍ୟାଚ୍ ପୂର୍ବରୁ ରୟାଲ ଚ୍ୟାଲେଞ୍ଜର୍ସ ବାଙ୍ଗାଲୋରର ତାରକା ବ୍ୟାଟର ତଥା ଲୋକାଲ ବଏ ବିରାଟ କୋହଲି ପତ୍ନୀ ଅନୁଷ୍କା ଶର୍ମାଙ୍କ ସହ ଏକାଠି ରେଷ୍ଟୁରାଣ୍ଟରେ ଡିନର କରିଛନ୍ତି। ଏହି ମୁହୂର୍ତ୍ତର କିଛି ଫଟୋକୁ କୋହଲି ତାଙ୍କ ଇନ୍ଷ୍ଟାଗ୍ରାମ୍ରେ ସେୟାର କରିଥିଲା ବେଳେ ପ୍ରଶଂସକମାନେ ଉଭୟଙ୍କୁ ପୁଣି ଥରେ ଏକାଠି ଦେଖି ଉଲ୍ଲସିତ ହୋଇ ଉଠିଛନ୍ତି। ମ୍ୟାଚ୍ ପୂର୍ବରୁ କୋହଲି ଅରୁଣ ଜେଟ୍ଲି ଷ୍ଟାଡିୟମ୍ ଯାଇଥିଲା ବେଳେ ସେଠାରେ ତାଙ୍କ ନାମରେ ହୋଇଥିବା ଗ୍ୟାଲେରି ସମ୍ମୁଖରେ ଛିଡ଼ା ହୋଇ ଫଟୋ ଉଠାଇଥିଲେ। ବର୍ତ୍ତମାନ ଚାଲିଥିବା ଆଇପିଏଲ୍ର ବ୍ୟାଟରଙ୍କ ତାଲିକାରେ କୋହଲି ସର୍ବାଧିକ ରନ୍ ସଂଗ୍ରହକାରୀଙ୍କ ମଧ୍ୟରେ ୫ ଅର୍ଦ୍ଧଶତକ ସହ ଚତୁର୍ଥ ସ୍ଥାନରେ ଅଛନ୍ତି। ଏହାପୂର୍ବରୁ ଲକ୍ଷ୍ନୌ ସୁପର ଜାଏଣ୍ଟସ୍ ବିପକ୍ଷ ମ୍ୟାଚ୍ ପରେ ମେଣ୍ଟର ଗୌତମ ଗମ୍ଭୀରଙ୍କ ସହ ତାଙ୍କର ଝଗଡ଼ା ବହୁତ ଚର୍ଚ୍ଚାରେ ରହିଥିଲା। ଏଥିପାଇଁ ଉଭୟଙ୍କୁ ସେମାନଙ୍କର ଶତ ପ୍ରତିଶତ ମ୍ୟାଚ୍ ଫି’ ମଧ୍ୟ ହରାଇବାକୁ ପଡ଼ିଥିଲା।
Comments are closed.