ଆମେରିକା ସୈନ୍ୟ ଆଫଗାନିସ୍ତାନ ଛାଡ଼ିବା ପରେ ତାଲିବାନଙ୍କ ଉତ୍ସବ

ଦିଲ୍ଲୀ: ଅଗଷ୍ଟ ୩୧: ଆଫଗାନିସ୍ତାନରେ ୨୦ ବର୍ଷ ଧରି ଲୋକଙ୍କୁ ସୁରକ୍ଷା ଦେଇ ଆସୁଥିବା ଆମେରିକା ସୈନ୍ୟ ନିଜ ଦେଶକୁ ଗଲା ପରେ ତାଲିବାନ ଉତ୍ସବ ମୁଖରିତ ହୋଇଉଠିଛି । ସେମାନେ ବ୍ଲଙ୍କ୍‌ ଫାୟାରିଂ କରି ଉତ୍ସବ ମନାଇବା ସହିତ ବାଣ ଫୁଟାଇଛନ୍ତି । ସୋମବାର ରାତିରେ ଆମେରିକା ସୈନ୍ୟ ଯିବା ପରେ ଏହି ଘଟଣା ଘଟିଛି । ଏବେ କାବୁଲ ଏୟାରପୋର୍ଟ ସମ୍ପୂର୍ଣ୍ଣ ତାଲିବାନଙ୍କ କବଜାରେ ରହିଛି । ଯଦି କୌଣସି ଲୋକ ଆଫଗାନ ଛାଡ଼ି ଯିବାକୁ ଚାହେଁ ତେବେ ସେ ତାଲିବାନଠାରୁ ଅନୁମତି ନେବାକୁ ପଡ଼ିବ । ଆମେରିକୀୟ ସୈନ୍ୟ ନିଜ ଦେଶକୁ ଯିବା ପରେ ଏବେ ତାଲିବାନ ସମ୍ପୂର୍ଣ୍ଣ ସ୍ୱାଧୀନ ହୋଇଯାଇଛି ।
ଆମେରିକା ପ୍ରତିରକ୍ଷା ବିଭାଗ ପେଣ୍ଟାଗନ ତଥ୍ୟ ଅନୁସାରେ, ଆଫଗାନିସ୍ତାନ ଛାଡ଼ିଥିବା ଶେଷ ଆମେରିକୀୟ ସୈନ୍ୟ ହେଉଛନ୍ତି, ମେଜର ଜେନେରାଲ କ୍ରିସ୍‌ ଡୋନାହୁ । ସେ ସି-୧୭ ବିମାନରେ ଆମେରିକା ଫେରିଥିଲେ ।
ତେବେ ଅଗଷ୍ଟ ୩୦ ସୁଦ୍ଧା ଆମେରିକୀୟମାନଙ୍କୁ ଆଫଗାନ ଛାଡ଼ିବାକୁ ଧମକ ଦେଇଥିଲା ତାଲିବାନ । ଆମେରିକା ଗତ ଦୁଇ ସପ୍ତାହ ମଧ୍ୟରେ କାବୁଲ ବିମାନ ବନ୍ଦରରୁ ପ୍ରାୟ ୧ ଲକ୍ଷ ୧୪ ହଜାରରୁ ଅଧିକ ଲୋକଙ୍କୁ ସ୍ଥାନାନ୍ତରଣ କରିଛି । ଆମେରିକା ସୈନ୍ୟ ଅଫଗାନ ଛାଡ଼ିବା ପରେ ଏବେ ସାଧାରଣ ଜନତା ଭୟଭୀତ ହୋଇପଡ଼ିଛନ୍ତି ।
ଅନ୍ୟପକ୍ଷରେ, ଆମେରିକା ସୈନ୍ୟବାହିନୀ ଏବଂ ପ୍ରଶାସନରେ କାର୍ଯ୍ୟ କରୁଥିବା ଅନ୍ୟଲୋକ ଯେପରି, ଅନୁବାଦକ, ସାମ୍ବାଦିକ, ମହିଳା ଅଧିକାରୀ ଏବେ ଆତଙ୍କରେ ରହିଛନ୍ତି । ସେମାନଙ୍କୁ ତାଲିବାନୀ କୋର୍ଟରେ ହାଜର ହେବାକୁ ପତ୍ର ମିଳିଛି । କୋର୍ଟରେ ହାଜର ନହେଲେ ମୃତୁ୍ୟଦଣ୍ଡ ଦିଆଯିବ ବୋଲି ଖୋଲା ଧମକ ପତ୍ରରେ ଲେଖାଯାଇଛି ।