ନୂଆଦିଲ୍ଲୀ : ଆଇପିଏଲ୍ରେ ଆଜି ଦିଲ୍ଲୀ କ୍ୟାପିଟାଲ୍ସ ଓ ମୁମ୍ବାଇ ଇଣ୍ଡିଆନ୍ସ ମୁହାଁମୁହିଁ ହେବେ। ଚଳିତ ସଂସ୍କରଣରେ ଏହି ଦୁଇ ଦଳ ଏପର୍ଯ୍ୟନ୍ତ ବିଜୟ ସ୍ବାଦ ଚାଖି ନାହାନ୍ତି। ଦିଲ୍ଲୀ ୩ରୁ ୩ ଏବଂ ମୁମ୍ବାଇ ୨ରୁ ୨ ମ୍ୟାଚ୍ ହାରି ପଏଣ୍ଟ ଟେବୁଲର ଶେଷ ଦୁଇ ସ୍ଥାନରେ ରହିଛନ୍ତି। ତେଣୁ ଅରୁଣ ଜେଟଲି ଷ୍ଟାଡିୟମଠାରେ ଉଭୟ ଦଳ ମ୍ୟାଚ୍ ଜିତି ପଏଣ୍ଟ ଖାତା ଖୋଲିବାକୁ ଚାହିଁବେ। ଗତ ମ୍ୟାଚ୍ରେ ଅଧିନାୟକ ଡେଭିଡ ୱାର୍ଣ୍ଣରଙ୍କୁ ଛାଡ଼ି ଦିଲ୍ଲୀର ଶୀର୍ଷ କ୍ରମ ପୂରା ବିଫଳ ହୋଇଥିଲେ। ଅନ୍ୟପକ୍ଷରେ ଗତ ୩ ମ୍ୟାଚ୍ରେ ପୃଥ୍ବୀ ସ’ଙ୍କ ବିଫଳତା ନେଇ ଅନେକ ପ୍ରଶ୍ନ ଉଠିଲାଣି। ସେହିପରି ଦିଲ୍ଲୀ ଦ୍ରୁତ ବୋଲର ଅନିରକ୍ ନର୍ଖିୟା, ମୁକେଶ କୁମାର ଓ ଖଲିଲ ଅହମଦ ମଧ୍ୟ ବିପକ୍ଷ ବ୍ୟାଟର୍ଙ୍କୁ ଚାପରେ ରଖିପାରୁନାହାନ୍ତି। ସ୍ପିନ୍ରେ କୁଲଦୀପ ଯାଦବ ମିତବ୍ୟୟୀ ରହିଥିଲେ ମଧ୍ୟ ଅକ୍ଷର ପଟେଲ ମଧ୍ୟଭାଗରେ ଅଧିକ ରନ୍ ବ୍ୟୟ କରୁଛନ୍ତି। ଏହା ଦଳ ପାଇଁ ଚିନ୍ତାର କାରଣ ପାଲଟିଛି। ଅନ୍ୟପକ୍ଷରେ ତାରକା ବ୍ୟାଟର୍ ଭର୍ତ୍ତି ଥିବା ମୁମ୍ବାଇ ବଡ଼ ସ୍କୋର୍ କରିବାରେ ବିଫଳ ହୋଇଛି। ଦଳ ଈଶାନ କିଶନଙ୍କ ବଡ଼ ସଟ୍ ଏବଂ ଦାମି ଖେଳାଳି କାମେରନ ଗ୍ରିନ୍ଙ୍କ ସଫଳତାକୁ ଅପେକ୍ଷା କରିଛି। ସୂର୍ଯ୍ୟକୁମାର ଯାଦବ ମଧ୍ୟ ଦୁଇଟି ଯାକ ମ୍ୟାଚ୍ରେ ବିଫଳ ହୋଇଛନ୍ତି। କେବଳ ତିଲକ ବର୍ମା ନିଜର ବ୍ୟାଟ୍ରେ କମାଲ ଦେଖାଇଛନ୍ତି। ରୋହିତ ମଧ୍ୟ ଚେନ୍ନାଇ ସୁପର କିଙ୍ଗ୍ସ ବିପକ୍ଷ ପରାଜୟ ଲାଗି ନିଜ ସହ ବରିଷ୍ଠ ଖେଳାଳିଙ୍କୁ ଦାୟୀ କରିଥିଲେ। ତେଣୁ ପ୍ରଥମ ବିଜୟ ସନ୍ଧାନରେ ଥିବାରୁ ଉଭୟ ଦଳ ନିଜର ଶ୍ରେଷ୍ଠ ପ୍ରଦର୍ଶନ କରିବାକୁ ଚାହିଁବେ।
Comments are closed.