ଆଇପିଏଲରେ ସର୍ବାଧିକ ସ୍କୋର କରି ପଞ୍ଜାବ କିଙ୍ଗ୍ସକୁ ହରାଇଲା ଲକ୍ଷ୍ନୌ ସୁପର ଜାଏଣ୍ଟସ୍

ମୋହାଲି: ଲକ୍ଷ୍ନୌ ସୁପର ଜାଏଣ୍ଟସ୍ ଚଳିତ ଆଇପିଏଲ୍ରେ ସର୍ବୋଚ୍ଚ ଦଳଗତ ସ୍କୋର କରିବା ପରେ ପଞ୍ଜାବ କିଙ୍ଗ୍ସକୁ ୫୬ ରନ୍ରେ ହରାଇଛି। ମୋହାଲିର ଆଇଏସ୍ ବିନ୍ଦ୍ରା ଷ୍ଟାଡିୟମ୍ରେ ଖେଳାଯାଇଥିବା ମ୍ୟାଚ୍ରେ ଲକ୍ଷ୍ନୌ ୨୫୭/୫ ସ୍କୋର କରିଥିଲା। ଲକ୍ଷ୍ନୌ ପାଳିରେ ୨୭ ଚୌକା ଓ ୧୪ ଛକା ସାମିଲ ଥିଲା। ବିଜୟ ଲକ୍ଷ୍ୟକୁ ପିଛା କରିବାକୁ ଯାଇ ପଞ୍ଜାବ ମଧ୍ୟ ଲଢୁଆ ପ୍ରଦର୍ଶନ କରି ୨୦୧ ରନ୍ରେ ସମସ୍ତ ୱିକେଟ୍ ହରାଇଥିଲା। ଏହି ବିଜୟ ସହ ଲକ୍ଷ୍ନୌ ପଏଣ୍ଟ ଟେବୁଲ୍ର ଦ୍ବିତୀୟ ସ୍ଥାନକୁ ଉଠିଛି। ଆଇପିଏଲ୍ ଇତିହାସରେ ମଧ୍ୟ ଲକ୍ଷ୍ନୌର ଏହା ଦ୍ବିତୀୟ ସର୍ବୋଚ୍ଚ ସ୍କୋର ହୋଇଛି। ୨୦୧୩ରେ ପୁନେ ୱାରିଅର୍ସ ବିପକ୍ଷରେ ରୟାଲ ଚ୍ୟାଲେଞ୍ଜର୍ସ ବାଙ୍ଗାଲୋର ୨୬୩/୫ ସ୍କୋର କରିଥିଲା। ଚଳିତ ସଂସ୍କରଣରେ ଚେନ୍ନାଇ ସୁପରକିଙ୍ଗ୍ସ ୨୩୫/୪ (ବନାମ କେକେଆର୍) ସ୍କୋର କରି ଆଗରେ ଥିଲା। ହେଲେ ଲକ୍ଷ୍ନୌ ଏହାକୁ ପଛରେ ପକାଇଦେଇଛି। ବୃହତ୍ ଲକ୍ଷ୍ୟକୁ ପିଛା କରୁଥିବା ପଞ୍ଜାବ କିନ୍ତୁ ପ୍ରଥମ ଓଭରରୁ ଅଧିନାୟକ ଶିଖର ଧାୱନ ଓ ଚତୁର୍ଥ ଓଭରରେ ପ୍ରଭସିମ୍ରନ ସିଂହଙ୍କୁ ହରାଇଥିଲା। ତାଇଦେ ଓ ସିକନ୍ଦର ରାଜା ତୃତୀୟ ୱିକେଟ୍ରେ ବିସ୍ଫୋରକ ବ୍ୟାଟିଂ କରି ୪୭ ବଲ୍ରୁ ୭୮ ରନ୍ ସଂଗ୍ରହ କରିଥିଲେ। ୟାଶ ଠାକୁର ଦ୍ବାଦଶ ଓଭରରେ ରାଜାଙ୍କୁ ଆଉଟ୍ କରି ଯୋଡ଼ି ଭାଙ୍ଗିବାର ପରବର୍ତ୍ତୀ ଓଭରରେ ଅର୍ଦ୍ଧଶତକ କରିଥିବା ତାଇଦେଙ୍କୁ ବାଦୋନି ଆଉଟ୍ କରି ବିଳମ୍ବିତ ସଫଳତା ଦେଇଥିଲେ। ଲିଆମ୍ ଲିଭିଙ୍ଗଷ୍ଟୋନ୍, ସାମ୍ କରନ୍, ଜିତେଶ ଶର୍ମା ଯଦିଓ କିଛି ଆକର୍ଷଣୀୟ ସଟ୍ ଖେଳିଥିଲେ, କିନ୍ତୁ ଅଧିକ ସମୟ ପିଚ୍ରେ ରହିପାରିନଥିଲେ। ଶେଷ ଓଭରରେ ଦଳ ୨୦୦ ଅତିକ୍ରମ କରିଥିଲା ବେଳେ ସମସ୍ତ ୱିକେଟ୍ ହରାଇଥିଲା। ଏହି ପାଳିରେ ଲକ୍ଷ୍ନୌର କେଏଲ୍ ରାହୁଲ, ଦୀପକ ହୁଡ଼ା ଓ ୱିକେଟରକ୍ଷକ ନିକୋଲାସ ପୂରନ୍ଙ୍କୁ ଛାଡ଼ିଦେଲେ ୯ ଜଣ ବୋଲିଂ କରିଥିଲେ।
ଏଥିପୂର୍ବରୁ ଟସ୍ରେ ହାରି ପ୍ରଥମେ ବ୍ୟାଟିଂ ପାଇଥିବା ଲକ୍ଷ୍ନୌ ପ୍ରଥମ ଓଭରରେ ୨ ରନ୍ ସଂଗ୍ରହ କରିଥିଲା। ଏପରିକି ପ୍ରଥମ ବଲ୍ରେ କେଏଲ୍ ରାହୁଲ ଜୀବନଦାନ ପାଇଥିଲେ। କିନ୍ତୁ ଏହାପରଠୁ ରନ୍ ଗତି ଦ୍ରୁତ ଭାବେ ବଢିଚାଲିଥିଲା। ଚତୁର୍ଥ ଓଭରରେ ରାହୁଲ ଯଦିଓ ୧୨ ରନ୍ କରି ଆଉଟ୍ ହୋଇଥିଲେ, କିନ୍ତୁ କାଇଲ ମାୟର୍ସ ଚିରାଚରିତ ଢଙ୍ଗରେ ରନ୍ ବାହାର କରୁଥିଲେ। ମାତ୍ର ୨୦ ବଲ୍ରୁ ଅର୍ଦ୍ଧଶତକ ହାସଲ କରିବା ପରେ ମାୟର୍ସ (୫୪) ପାୱାରପ୍ଲେ ଶେଷ ହେବାର ଗୋଟିଏ ବଲ୍ ପୂର୍ବରୁ ଆଉଟ୍ ହୋଇଥିଲେ। ତଥାପି ପ୍ରଥମ ୬ ଓଭରରେ ଦଳ ୭୪ ରନ୍ ସଂଗ୍ରହ କରି ଦୃଢ଼ ସ୍ଥିତି ଦେଇଥିଲା। ଆୟୂଷ ବାଦୋନି ଓ ମାର୍କସ ଷ୍ଟୋଇନିସ୍ ତୃତୀୟ ୱିକେଟ୍ରେ ୮୯ ରନ୍ ଯୋଡ଼ିଥିଲେ। ବାଦୋନି ୩ ଲେଖାଏଁ ଚୌକା ଓ ଛକା ସହାୟତାରେ ୪୩ ରନ୍ କରିଥିଲା ବେଳେ ଯୋଡ଼ି ଭାଙ୍ଗିଥିଲା। ପରେ ନିକୋଲାସ ପୂରନ୍ଙ୍କ ସହ ମିଶି ଷ୍ଟୋଇନିସ୍ ୭୬ ରନ୍ ଯୋଡ଼ିବା ସହ ୧୭ ଓଭର ସୁଦ୍ଧା ଦଳୀୟ ସ୍କୋରକୁ ୨୦୦ରେ ପହଞ୍ଚାଇଥିଲେ। ବାଉଣ୍ଡରିରୁ ୫୪ ରନ୍ ବାହାର କରିଥିବା ଷ୍ଟୋଇନିସ୍ ଆଉଟ୍ ହେବା ବେଳକୁ ଲକ୍ଷ୍ନୌ ଚଳିତ ସଂସ୍କରଣରେ ସର୍ବୋଚ୍ଚ ସ୍କୋର କରିସାରିଥିଲା। ଶେଷ ଓଭରରେ ଦଳକୁ ୨୫୦ ପାର୍ କରାଇବା ପରେ ପୂରନ୍ (୪୫) ମଧ୍ୟ ଆଉଟ୍ ହୋଇଥିଲେ।