ବିହାର : ବିହାରର ଦରଭଙ୍ଗାରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କ ପାଇଁ ଅଶାଳୀନ ମନ୍ତବ୍ୟ ଦେଇଥିବା ଯୁବକଙ୍କ ବିରୋଧରେ କଡା କାର୍ଯ୍ୟାନୁଷ୍ଠାନ । ଅଭିଯୁକ୍ତଙ୍କୁ ଗିରଫ କରିଛି ବିହାର ପୋଲିସ । ଅଭିଯୁକ୍ତ ଯୁବକ ହେଉଛନ୍ତି ଦରଭଙ୍ଗାର ବାସିନ୍ଦା ମହମ୍ମଦ ରିଜଭି ଓରଫ ରାଜା । ବିହାରରେ ଇଣ୍ଡି ମେଣ୍ଟର ଭୋଟର୍ ଅଧିକାର ଯାତ୍ରାବେଳେ ପ୍ରଧାନମନ୍ତ୍ରୀ ଏବଂ ତାଙ୍କ ସ୍ଵର୍ଗବାସୀ ମା’ଙ୍କ ଉପରେ ଆପତ୍ତିଜନକ ମନ୍ତବ୍ୟ ଦେଇଥିଲେ । ଏହାର ଭିଡିଓ ଭାଇରାଲ ହେବା ପରେ ରାଜନୈତିକ ହଇଚଇ ସୃଷ୍ଟି ହୋଇଥିଲା। ଏହା ପରେ ପୋଲିସ କାର୍ଯ୍ୟାନୁଷ୍ଠାନ ଗ୍ରହଣ କରିଛି । ଏନେଇ ଗୁରୁବାର ଦିନ ବିଜେପି ପକ୍ଷରୁ ପାଟନା ପୋଲିସ ଷ୍ଟେସନରେ ଅଭିଯୋଗ କରାଯାଇଥିଲା। ତେବେ ଏହାର ପ୍ରତିବାଦ କରି ଶୁକ୍ରବାର ବିହାର ବିଜେପି ଏବଂ କଂଗ୍ରେସ ମଧ୍ୟରେ ମୁହାଁମୁହିଁ ପରିସ୍ଥିତି ସୃଷ୍ଟି ହୋଇଛି । ଏକ ଭିଡିଓରେ ଦେଖାଯାଇଛି ଯେ ଦୁଇ ଦଳର ବହୁ ସଂଖ୍ୟାରେ କର୍ମୀ ନିଜ ନିଜ ଦଳୀୟ ପତାକା ଧରି ପରସ୍ପର ଉପରେ ଆକ୍ରମଣ କରୁଛନ୍ତି।
ଘଟନାନୁସାରେ,ବିହାରରେ ମହାଗଠବନ୍ଧନ ପକ୍ଷରୁ ଏକ ଭୋଟର ଅଧିକାର ଶୋଭାଯାତ୍ରା କରାଯାଇଥିଲା । ଶୋଭାଯାତ୍ରାଟି ସକାଳେ ସୀତାମାଢ଼ିରୁ ଦରଭଙ୍ଗାରେ ପହଞ୍ଚିଥିଲା। ସେଠାରେ ଏକ ସାଧାରଣ ସଭାରେ ଅଭିଯୁକ୍ତ ଯୁବକ ପ୍ରଧାନମନ୍ତ୍ରୀ ମୋଦି ଏବଂ ତାଙ୍କ ମାଆଙ୍କ ଉପରେ ଅଶାଳୀନ ମନ୍ତବ୍ୟ ଦେଇଥିଲେ। ଏହି ଘଟଣାରେ ରାଲି ଆୟୋଜକ ନୌସାଦ କ୍ଷମା ପ୍ରାର୍ଥନା କରିଥିଲେ।
ଏହି ଘଟଣାରେ ଦରଭଙ୍ଗା ବିଜେପି ଜିଲ୍ଲା ସଭାପତି ଆଦିତ୍ୟନାଥ ନାରାୟଣ ମାନ୍ନା ଦରଭଙ୍ଗା ଜିଲ୍ଲାର ସିମରି ଥାନାରେ ଏକ ମାମଲା ଦାୟର କରିଥିଲେ। କଂଗ୍ରେସ ନେତା ମହମ୍ମଦ ନୌସାଦଙ୍କୁ ଅଭିଯୁକ୍ତ କରାଯାଇଥିଲା।
ବରିଷ୍ଠ ବିଜେପି ନେତା ଏବଂ ଲୋକସଭା ସାଂସଦ ରବି ଶଙ୍କର ପ୍ରସାଦ ମଧ୍ୟ ଏହି ଘଟଣା ପାଇଁ କଂଗ୍ରେସ ନେତା ରାହୁଲ ଗାନ୍ଧୀ ଏବଂ ଆରଜେଡି ନେତା ତେଜସ୍ୱୀ ଯାଦବଙ୍କୁ ନିନ୍ଦା କରିଛନ୍ତି। ସେ ଏହି ମନ୍ତବ୍ୟକୁ “ଲଜ୍ଜାଜନକ” ଏବଂ “ଗମ୍ଭୀର ଅପମାନଜନକ” ବୋଲି ବର୍ଣ୍ଣନା କରିଛନ୍ତି, କେବଳ ପ୍ରଧାନମନ୍ତ୍ରୀଙ୍କ ପାଇଁ ନୁହେଁ ବରଂ ଭାରତୀୟ ସଂସ୍କୃତି ପାଇଁ ଏହା ଏକ ଲଜ୍ଜାଜନକ ଘଟଣା ବୋଲି କହିଛନ୍ତି ।
