ଭୁବନେଶ୍ୱର : ଚାକିରିକାଳ ଆରମ୍ଭ ନହେଉଣୁ ଦୁର୍ନୀତି ଗ୍ରସ୍ତ ହେଲେ ପ୍ରଶାସନିକ ଅଧିକାରୀ । ୧୦ ଲକ୍ଷ ଟଙ୍କା ଲାଞ୍ଚ ନେବା ଅଭିଯୋଗରେ ଯୁବ ଆଇଏଏସ୍ ଅଫିସର ଧୀମାନ ଚକମାଙ୍କୁ ବାନ୍ଧିଛି ଭିଜିଲାନ୍ସ । ୨୦୨୧ ବ୍ୟାଚର ଆଇଏଏସ୍ ଅଫିସର ଧୀମାନ ଚକମା କଳାହାଣ୍ଡି ଜିଲ୍ଲା ଧର୍ମଗଡ଼ ଉପ-ଜିଲ୍ଲାପାଳ ଭାବରେ କାର୍ଯ୍ୟରତ ଥିଲେ । ସ୍ଥାନୀୟ ବ୍ୟବସାୟୀ କ୍ରସର ମାଲିକଙ୍କ ଠାରୁ ୧୦ ଲକ୍ଷ ଟଙ୍କା ଲାଞ୍ଚ ନେବାବେଳେ ଘଟଣାସ୍ଥଳରେ ଧରାପଡ଼ିଥିଲେ । ଏନେଇ ସୂଚନା ଦେଇଛନ୍ତି ଭିଜିଲାନ୍ସ ନିର୍ଦ୍ଦେଶକ ଜଶୱନ୍ତ ଜେଠୱା । ଗିରଫ ପରେ ତାଙ୍କୁ ଗୁରେଇ ତୁରେଇ ଜେରା କରାଯାଇଥିଲା । ଲାଞ୍ଚ ଟଙ୍କା ଜବତ ପରେ ବାସଭବନରେ ଚଢ଼ାଉ କରି ସେଠାରୁ ଆଉ ୪୭ ଲକ୍ଷ ଟଙ୍କା ଜବତ କରିଥିଲା ଭିଜିଲାନ୍ସ ।
ସୂଚନାନୁସାରେ,୨୦୨୧ ବ୍ୟାଚର ଆଇଏଏସ୍ ଅଫିସର ଧୀମାନ ଚକମା ଗତ ବର୍ଷ ଧର୍ମଗଡ ଉପ ଜିଲ୍ଲାପାଳ ଭାବେ ଯୋଗ ଦେଇଥିଲେ । ଗତକାଲି ସ୍ଥାନୀୟ ବ୍ୟବସାୟୀ କ୍ରସର ମାଲିକଙ୍କ ଠାରୁ ନିଜ ସରକାରୀ ବାସଭବନରେ ୧୦ ଲକ୍ଷ ଟଙ୍କା ଲାଞ୍ଚ ନେଉଥିଲେ । ତେବେ ୨୦ ଲକ୍ଷ ଟଙ୍କା ଲାଞ୍ଚ ନେବାକୁ ହୋଇଥିଲା ଡିଲ୍ । ଏହି ଘଟଣାରେ କ୍ରସର ମାଲିକ ପୂର୍ବରୁ ଭୁବନେଶ୍ୱର ଭିଜିଲାନ୍ସର ଦ୍ୱାରସ୍ଥ ହୋଇଥିଲେ । ଗତକାଲି ଲାଞ୍ଚ ନେଉଥିବାବେଳେ ପୂର୍ବ ଯୋଜନା ମୁତାବକ ଭିଜିଲାନ୍ସ ହାତରେ ପଡ଼ିଥିଲେ ଧୀମାନ । ତାଙ୍କ ଠାରୁ ରଙ୍ଗବୋଳା ଟଙ୍କା ଜବତ କରାଯିବା ସହ ବାସଭବନ ଯାଞ୍ଚ ବେଳେ ମିଳିଛି ଆଉ ୪୭ ଲକ୍ଷ ଟଙ୍କା । ମୋଟ ୫୭ ଲକ୍ଷ ଟଙ୍କା ଜବତ କରିଛି ଭିଜିଲାନ୍ସ ।
୨୦୨୧ ବ୍ୟାଚର ଓଡିଶା କ୍ୟାଡରର ଆଇଏଏସ ଧିମନ, ତ୍ରିପୁରାର ବାସିନ୍ଦା । ବାପା ଜଣେ ସ୍କୁଲ ଶିକ୍ଷକ ଓ ମା’ ଜଣେ ସାଧାରଣ ଗୃହିଣୀ । ଏନଆଇଟି ଅଗ୍ରତାଲାରୁ କମ୍ପ୍ୟୁଟର ସାଇନ୍ସରେ ସ୍ନାତକ ସାରିବା ପରେ ୟୁପିଏସସି ପରୀକ୍ଷା ଦେଇଥିଲେ । ପ୍ରଥମେ ୨୦୧୯ ରେ ଆଇଏଫଏସ ପାଇ ଓଡିଶା କ୍ୟାଡରରେ ବାରିପଦାରେ ଅବସ୍ଥାପିତ ହୋଇଥିଲେ । ୨୦୨୦ ରେ ପୁନଶ୍ଚ ୟୁପିଏସସି ଦେଇ ୪୮୨ ରାଙ୍କରେ ଓଡିଶା କ୍ୟାଡର ପାଇବାକୁ ସକ୍ଷମ ହୋଇଥିଲେ । ୨୦୨୧ ବ୍ୟାଚର ଏହି ଆଇଏଏସ ସର୍ବଭାରତୀୟ ସ୍ତରରେ ୪୮୨ ରାଙ୍କ ହାସଲ କରିବା ପରେ ତ୍ରିପୁରା ଭଳି ରାଜ୍ୟରେ ଶିକ୍ଷା ପାଇଁ ବହୁତ କିଛି କରିବେ ବୋଲି କହିଥିଲେ । ସେ ଜନ୍ମ ନେଇଥିବା ଅଞ୍ଚଳରେ ଥିଲେ ପ୍ରଥମ ଆଇଏଏସ ।
Comments are closed.