ଗଞ୍ଜାମ : ନିଜ ହାତରେ ନିଜ ସିନ୍ଦୁର ପୋଛିଲା ସ୍ତ୍ରୀ । ସ୍ତ୍ରୀର ଛୁରାମାଡ଼ରେ ସ୍ୱାମୀ ମୃତ । ବାପା ସହ ମିଶି ସ୍ୱାମୀକୁ ହତ୍ୟା କରିଥିବା ଅଭିଯୋଗ ହୋଇଛି । ଘର ଭିତରେ ଖଟ ଉପରେ ପଡ଼ିଥିବା ଯୁବକଙ୍କ ରକ୍ତାକ୍ତ ମୃତଦେହ ଉଦ୍ଧାର କରାଯାଇଛି । ଏଭଳି ବିଭତ୍ସ ହତ୍ୟାକାଣ୍ଡ ଘଟିଛି ଗଞ୍ଜାମ ଜିଲ୍ଲା କବିସୂର୍ଯ୍ୟନଗର ଥାନା ଗୋବିନ୍ଦପୁର ଗାଁ ରେ । ମୃତକ ହେଉଛନ୍ତି କାଳିଆ ଓରଫ କାଳୁଚରଣ ସେଠୀ (୩୫) ବର୍ଷ ଏବଂ ଅଭିଯୁକ୍ତ ପତ୍ନୀ ହେଉଛନ୍ତି ପୂଜା ସେଠୀ । ୧୫ ବର୍ଷ ପୂର୍ବେ ଉଭୟଙ୍କ ପ୍ରେମ ବିବାହ ହୋଇଥିଲା । ତେବେ ହତ୍ୟାକାଣ୍ଡର କାରଣ ଅସ୍ପଷ୍ଟ ଥିବାବେଳେ ପରକିଆ ପ୍ରୀତିକୁ ନେଇ ଅଘଟଣ ଘଟିଥିବା ସନ୍ଦେହ କରାଯାଉଛି ।
ସୂଚନାନୁସାରେ, କାଳିଆ ସେଠୀ ଦୀର୍ଘ ୧୫ ବର୍ଷ ପୂର୍ବେ ପୋଲସରା ଡିମ୍ୱିରିଆ ଗ୍ରାମର ପୂଜା ସେଠୀକୁ ପ୍ରେମ ବିବାହ କରିଥିଲେ । କିଛି ଦିନ ହେଲା ପୂଜା ମୋବାଇଲରେ ଅନ୍ୟ କାହା ସହ କଥା ହେଉଥିବା ନେଇ ସ୍ବାମୀ ସନ୍ଦେହ କରିଥିଲେ । ପ୍ରତ୍ୟେକ ଦିନ ଉଭୟଙ୍କ ମଧ୍ୟରେ ଝଗଡା ଲାଗି ରହୁଥିବାବେଳେ ପୂଜା ୨/୩ ମାସ ହେବ ତାଙ୍କ ବାପା ଘର ଡ଼ିମ୍ୱିରିଆକୁ ଚାଲିଯାଇଥିଲେ । ଏହି ଘଟଣାକୁ ନେଇ ପୂଜାଙ୍କ ବାପା କାଳିଆଙ୍କ ମା’କୁ ହତ୍ୟା ଧମକ ଦେଇଆସୁଥିଲେ । ତେବେ ଗତକାଲି ରାତିରେ କାଳିଆ ଘରେ ଶୋଇଥିବା ବେଳେ ପୂଜା ତାଙ୍କୁ ଛୁରାମାଡ଼ କରି ହତ୍ୟା କରିଥିବା ନେଇ ପରିବାର ଲୋକେ ଅଭିଯୋଗ କରିଛନ୍ତି । ଭୋର ସମୟରେ ଖଟ ଉପରେ ରକ୍ତ ଜୁଡୁବୁଡୁ ଅବସ୍ଥାରେ କାଳିଆଙ୍କ ମୃତଦେହ ଉଦ୍ଧାର କରିଥିଲେ ମାଆ ଓ ଭାଇ । ତାଙ୍କ ଛାତି ଓ ହାତରେ ଆଘାତ ଲାଗିଥିଲା । ଏହାପରେ ପରିବାର ପକ୍ଷରୁ ଥାନାରେ ଏତଲା ଦିଆଯାଇଥିଲା । ଘଟଣାସ୍ଥଳରେ କବିସୂର୍ଯ୍ୟନଗର ପୋଲିସ ପହଞ୍ଚି ଶବକୁ ଜବତ କରି କାଳିଆଙ୍କ ଶ୍ୱଶୁରଙ୍କୁ ଅଟକ ରଖି ଘଟଣାର ତଦନ୍ତ ଜାରି ରଖିଛି ।
Comments are closed.