ଭୁବନେଶ୍ୱର : ନୂଆଦିଲ୍ଳୀ ଏମ୍ସରେ ଚିକିତ୍ସିତ ହେଉଥିବା ବେଳେ ବଳଙ୍ଗା ପୀଡ଼ିତାଙ୍କର ବୟାନ ନିଆଯାଇଥିଲା । ବର୍ତ୍ତମାନ ଏହାର ଭିଡିଓ ସୋସିଆଲ ମିଡିଆରେ ଭାଇରାଲ ହେବାରେ ଲାଗିଛି । ଏହି ସମୟରେ ପୀଡିତା ନାବାଳିକା ଜଣେ ମହିଳା ଅଫିସରଙ୍କ ପ୍ରଶ୍ନର ଉତ୍ତର ଦେଇ କହୁଛନ୍ତି ‘ମୋତେ ୩ ଜଣ ଉଠାଇନେଲେ। ସେମାନେ ମୁହଁରେ ରୁମାଲ ବାନ୍ଧିଥିଲେ । ଆଉ ବନ୍ଧ କଡ଼କୁ ନେଇ ମୋ ଦେହରେ କିରୋସିନି ଢାଳି ନିଆଁ ଲଗାଇଦେଲେ ବୋଲି କହୁଥିବାର ଦେଖାଯାଇଛି । ବଳଙ୍ଗା ପୀଡ଼ିତାଙ୍କ ଭିଡିଓ ଭାଇରାଲ ଘଟଣା ନେଇ ପ୍ରତିକ୍ରିୟା ରଖିଛନ୍ତି ପୁରୀ ଏସପି ପିନାକ ମିଶ୍ର। ଭିଡିଓର ସତ୍ୟାସତ୍ୟ ଯାଞ୍ଚ ସହ ଏହି ଭିଡିଓ ଭାଇରାଲ କରିଥିବା ବ୍ୟକ୍ତିଙ୍କ ବିରୋଧରେ ତଦନ୍ତ ପାଇଁ ସାଇବର ଟିମର ସହଯୋଗ ନିଆଯିବ। ଏ ନେଇ ଗଣମାଧ୍ୟମକୁ ସୂଚନା ଦେଇଛନ୍ତି ଏସ୍ପି ପିନାକ ମିଶ୍ର ।
ଶ୍ରୀ ମିଶ୍ର କହିଛନ୍ତି, ଏହି ସମ୍ବେଦନଶୀଳ ଭିଡିଓ କିଏ ଓ କ’ଣ ପାଇଁ ଭାଇରାଲ କରିଛି ତାହାର ଅନୁସନ୍ଧାନ ଜାରି ରହିଛି । କ୍ରାଇମ୍ବ୍ରାଞ୍ଚ ଓ ସାଇବର ଟିମ୍ର ଅଧିକାରୀମାନଙ୍କ ସହଯୋଗରେ ଏହାର ତଦନ୍ତ ଜାରି ରହିଛି । ଉକ୍ତ ଘଟଣାର ଭିଡିଓ ଭାଇରାଲ କରିବା ଅନୁଚିତ୍ । ପୀଡ଼ିତାଙ୍କ ବୟାନ ଆଇନ ଅନୁଯାୟୀ ମାଜିଷ୍ଟ୍ରେଟଙ୍କ ଆଗରେ ରେକର୍ଡ କରାଯାଇଛି । ତଦନ୍ତ ଶେଷ ପର୍ଯ୍ୟାୟରେ ପହଞ୍ଚିଛି । ଏହାର ଚୂଡ଼ାନ୍ତ ରିପୋର୍ଟ ଖୁବ୍ଶୀଘ୍ର କୋର୍ଟକୁ ପ୍ରଦାନ କରାଯିବ । ଅନ୍ୟପକ୍ଷରେ ଏହି ଭିଡିଓକୁ ଭାଇରାଲ୍ ନ କରିବା ସହିତ ନ ଦେଖିବାକୁ ଅପିଲ କରିଛନ୍ତି ଏସ୍ପି।
