ନୂଆଦିଲ୍ଲୀ: ରିଜର୍ଭ ବ୍ୟାଙ୍କ ଅଫ୍ ଇଣ୍ଡିଆର ପୂର୍ବତନ ଗଭର୍ଣ୍ଣର ଉର୍ଜିତ ପଟେଲଙ୍କୁ ଏକ ବଡ଼ ଦାୟିତ୍ୱ । ଆନ୍ତର୍ଜାତୀୟ ମୁଦ୍ରା ପାଣ୍ଠି (ଆଇଏମ୍ଏଫ୍)ର କାର୍ଯ୍ୟନିର୍ବାହୀ ନିର୍ଦ୍ଦେଶକ ଭାବେ ନିଯୁକ୍ତି ପାଇଛନ୍ତି ଉର୍ଜିତ ପଟେଲ । କେନ୍ଦ୍ର କ୍ୟାବିନେଟ୍ ନିଯୁକ୍ତି କମିଟି ଉର୍ଜିତଙ୍କୁ ଏହି ନୂତନ ଦାୟିତ୍ୱ ଦେଇଛନ୍ତି । କ୍ୟାବିନେଟର ନିଯୁକ୍ତି କମିଟି ଉର୍ଜିତ ପଟେଲଙ୍କୁ ଆଇଏମ୍ଏଫ୍ କାର୍ଯ୍ୟନିର୍ବାହୀ ନିର୍ଦ୍ଦେଶକ ପଦବୀରେ ନିଯୁକ୍ତିକୁ ଅନୁମୋଦନ କରିଛି । ଏନେଇ ଅଗଷ୍ଟ ୨୮ ତାରିଖରେ ଜାରି ହୋଇଥିବା ବିଜ୍ଞପ୍ତିରେ କୁହାଯାଇଛି ।
ଆଗାମୀ ୩ ବର୍ଷ ପର୍ଯ୍ୟନ୍ତ ଏହି ପଦବୀରେ ରହିବେ ଉରଃଜିତ ପଟେଲ । ସେ ପୂର୍ବରୁ ମଧ୍ୟ ଆଇଏମ୍ଏଫ୍ ଅଧୀନରେ କାମ କରିସାରିଛନ୍ତି । ଶ୍ରୀଯୁକ୍ତ ପଟେଲ ସେପ୍ଟେମ୍ବର ୪, ୨୦୧୬ରେ ଆରବିଆଇର ୨୪ତମ ଗଭର୍ଣ୍ଣର୍ ହୋଇଥିଲେ । ସେ ରଘୁରାମ ରାଜନଙ୍କ ପରେ ଏହି ଦାୟିତ୍ୱ ସମ୍ଭାଳି ଥିଲେ । ମାତ୍ର ତାଙ୍କର କାର୍ଯ୍ୟକାଳ ଶେଷ ହେବା ପୂର୍ବରୁ ସେ ବ୍ୟକ୍ତିଗତ କାରଣ ଦର୍ଶାଇ ଇସ୍ତଫା ଦେଇଥିଲେ । ୨୦୧୮, ଡିସେମ୍ବର ୧୦ ତାରିଖରେ ଗଭର୍ଣ୍ଣର ପଦରୁ ଇସ୍ତଫା ଦେଇଥିଲେ । ୧୯୯୦ ପରେ ସେ ପ୍ରଥମ କେନ୍ଦ୍ରୀୟ ବ୍ୟାଙ୍କ ଗଭର୍ଣ୍ଣର ଥିଲେ ଯିଏ କାର୍ଯ୍ୟକାଳ ଶେଷ ହେବା ପୂର୍ବରୁ ଇସ୍ତଫା ଦେଇଥିଲେ । ଖାଲି ସେତିକି ନୁହେଁ ପଟେଲ୍ ଆରବିଆଇର ଡେପୁଟି ଗଭର୍ଣ୍ଣର ପଦବୀ ମଧ୍ୟ ସମ୍ଭାଳିଛନ୍ତି । ୧୯୯୬-୧୯୯୭ ମଧ୍ୟରେ ଆଇଏମ୍ଏଫ୍ ର କେନ୍ଦ୍ରୀୟ ଡେପୁଟେସନରେ ଥିଲେ ଏବଂ ଏହି ଦାୟିତ୍ୱରେ ସେ ଋଣ ବଜାରର ବିକାଶ, ବ୍ୟାଙ୍କିଙ୍ଗ କ୍ଷେତ୍ରରେ ସଂସ୍କାର, ପେନସନ ପାଣ୍ଠି ସଂସ୍କାର ଏବଂ ବିଦେଶୀ ମୁଦ୍ରା ବଜାରର ବିକାଶ ପରାମର୍ଶ ଦାତା ରହିଥିଲେ । ସେ ୧୯୯୮ ରୁ ୨୦୦୧ ପର୍ଯ୍ୟନ୍ତ ଅର୍ଥ ମନ୍ତ୍ରଣାଳୟ (ଅର୍ଥନୈତିକ ବ୍ୟାପାର ବିଭାଗ) ର ପରାମର୍ଶଦାତା ଥିଲେ।
