ମୟୁରଭଞ୍ଜ : ଆଜି ଦିନିକିଆ ଓଡିଶା ଗସ୍ତରେ ଆସିଛନ୍ତି କେନ୍ଦ୍ର ସଡକ ପରିବହନ ଓ ରାଜମାର୍ଗ ମନ୍ତ୍ରୀ ନୀତିନ ଗଡ଼କରୀ । କଟକ ଓ ଭୁବନେଶ୍ବରରେ ବିଭିନ୍ନ କାର୍ଯ୍ୟକ୍ରମରେ ଯୋଗଦେବେ କେନ୍ଦ୍ରମନ୍ତ୍ରୀ । କଟକ ରେଭେନ୍ସା ବିଶ୍ବବିଦ୍ୟାଳୟ ପରିସରରେ ଆୟୋଜିତ ଉତ୍କଳ କେଶରୀ ଡକ୍ଟର ହରେକୃଷ୍ଣ ମହତାବଙ୍କ ଜୟନ୍ତୀ କାର୍ଯ୍ୟକ୍ରମରେ ଯୋଗ ଦେଇ ‘ଭିତ୍ତିଭୂମି ବିକାଶ ଏବଂ ଓଡ଼ିଶା’ ଉପରେ ସେ ନିଜର ବକ୍ତବ୍ୟ ରଖିବେ । ମହତାବଙ୍କ ୧୨୫ତମ ଜନ୍ମ ଶତବାର୍ଷିକୀ ଅବସରରେ ଏହି କାର୍ଯ୍ୟକ୍ରମ ହେଉଛି ।
ଆନ୍ୟପଟ ଆଜି କେନ୍ଦ୍ରମନ୍ତ୍ରୀ ୪ ହଜାର କୋଟିର ୧୯ଟି ପ୍ରକଳ୍ପର ଶିଳାନ୍ୟାସ ଓ ଉଦ୍ଘାଟନ କରିବାର କାର୍ଯ୍ୟକ୍ରମ ରହିଛି । ଭୁବନେଶ୍ୱର ବରମୁଣ୍ଡା ଠାରେ ଆୟୋଜିତ ବିରାଟ ଜନସଭାରୁ ସେ ୪ ହଜାର କୋଟି ଟଙ୍କାରୁ ଉର୍ଦ୍ଧ୍ଵ ମୋଟ ୧୫୪ କିମି ଦୀର୍ଘ ୧୯ ଟି ଜାତୀୟ ରାଜପଥ ପ୍ରକଳ୍ପ ଶୁଭାରମ୍ଭ ଓ ଘୋଷଣା କରିବେ। ତେବେ ଉକ୍ତ ଘୋଷଣାରେ ଶିମିଳିପାଳ ବ୍ୟାଘ୍ର ସଂରକ୍ଷଣ ଅନ୍ତର୍ଗତ ମୟୂରଭଞ୍ଜ ଜିଲ୍ଲା ବାଙ୍ଗିରିପୋଷି ଦେଇ ଯାଇଥିବା ୪୯ ନମ୍ବର ଜାତୀୟ ରାଜପଥର ବାଙ୍ଗିରିପୋଷି ଘାଟି(ଦ୍ୱାରଶୁଣି ଘାଟି) ର ଦୀର୍ଘ ୧୦ କିମି ରାସ୍ତା ମଧ୍ୟ ସାମିଲ ରହିଛି। ୪ ଲେନ୍ ବିଶିଷ୍ଟ ହେବାକୁ ଥିବା ଏହି ରାସ୍ତାର ପ୍ରାଥମିକ ବ୍ୟୟ ଅଟକଳ ମୂଲ୍ୟ ୧୩୫ କୋଟି ଟଙ୍କା ରହିଛି। ତେବେ ଦୀର୍ଘ ଦିନ ଧରି ଦାବି ହେଉଥିବା ଏହି ରାଜରାସ୍ତା ପ୍ରକଳ୍ପର ଶୁଭାରମ୍ଭ କୁ ନେଇ ବାଙ୍ଗିରିପୋଷି ଅଞ୍ଚଳରେ ଖୁସି ର ମହୋଲ ଛାଇ ଯାଇଛି। ନିକଟ ଅତୀତରେ ବାଙ୍ଗିରିପୋଷି ବିଧାୟିକା ସଞ୍ଜଲୀ ମୁର୍ମୁ ପ୍ରତ୍ୟକ୍ଷ ଭାବେ କେନ୍ଦ୍ର ସଡକ ପରିବହନ ମନ୍ତ୍ରୀ ନୀତିନ ଗଡ଼କରୀ ଙ୍କୁ ସାକ୍ଷାତ କରି ଘାଟି ରାସ୍ତାର ସମ୍ପ୍ରସାରଣ ନେଇ ଆଲୋଚନା କରିବା ସହ ଦାବୀପତ୍ର ମଧ୍ୟ ଦେଇଥିଲେ। ଅନ୍ୟପକ୍ଷରେ ଲୋକସଭା ସାଂସଦ ନବ ଚରଣ ମାଝୀ ଓ ରାଜ୍ୟସଭା ସାଂସଦ ମମତା ମହାନ୍ତ ମଧ୍ୟ ଦିଲ୍ଲୀ ଗସ୍ତ ସମୟରେ ମନ୍ତ୍ରୀ ଶ୍ରୀ ଗଡ଼କରୀ ଙ୍କୁ ଭେଟି ବାଙ୍ଗିରିପୋଷି ଘାଟି ରାସ୍ତାର ଉନ୍ନତିକରଣ ପାଇଁ ଦାବିପତ୍ର ପ୍ରଦାନ କରିଥିଲେ। ସେହିପରି ଭଞ୍ଜସେନା ପରି ବିଭିନ୍ନ ସଂଗଠନ ତରଫରୁ ମଧ୍ୟ ଘାଟି ରାସ୍ତାର ସମ୍ପ୍ରସାରଣ ପାଇଁ ଦାବି ହୋଇ ଆସୁଥିଲା।
Comments are closed.