ମୁମ୍ବାଇ: ଶେଷରେ ଉଦ୍ଧବଙ୍କୁ ମିଳିଲା ଶିବାଜୀ ପାର୍କରେ ଦଶହରା ରାଲି ଅନୁମତି । ଆଜି ବମ୍ବେ ହାଇକୋର୍ଟ ଶିବସେନାକୁ ଅନୁମତି ଦେଇଛନ୍ତି । ଏହା ସହିତ ସିନ୍ଦେ ଦଳକୁ ଅନୁମତି ଦେବାକୁ ମନା କରାଯାଇଛି । ସେମାନଙ୍କୁ ଅନ୍ୟ କୌଣସି ସ୍ଥାନରେ ରାଲି କରିବାକୁ ପଡିବ । କୋର୍ଟ କହିଛନ୍ତି ଯେ ସରକାର ଦେଇଥିବା ୨୦୧୬ ଆଦେଶ ଅନୁଯାୟୀ ଏହି ଅନୁମତି ଦିଆଯିବ । କେବଳ ଏତିକି ନୁହେଁ, ସମଗ୍ର ରାଲିର ଭିଡିଓଗ୍ରାଫି କରାଯିବ ଏବଂ ଯଦି କୌଣସି ତ୍ରୁଟି ଦେଖାଦିଏ କିମ୍ବା ଆଇନ ଶୃଙ୍ଖଳା ପରିସ୍ଥିତି ଉପୁଜେ, ତେବେ ଭବିଷ୍ୟତରେ ଅନୁମତି ଦେବା ଉପରେ ବିଚାର କରାଯିବ ।
ସୂଚନା ମୁତାବକ ବିଏମସି ଉଭୟ ଏକନାଥ ସିନ୍ଦେ ଏବଂ ଉଦ୍ଧବ ଠାକରେଙ୍କୁ ପାର୍କ ଦେବାକୁ ମନା କରିଦେଇଥିଲା, ଏହା ପରେ ଉଭୟ ହାଇକୋର୍ଟରେ ପହଞ୍ଚିଥିଲେ । ଆଜି ଶୁଣାଣି ସମୟରେ କୋର୍ଟ ପ୍ରଥମେ ଶିବାଜୀ ପାର୍କରେ ଏକନାଥ ସିନ୍ଦେ ଦଳକୁ ରାଲି କରିବାକୁ ମନା କରିଦେଇଥିଲେ ଏବଂ ପରେ ଶିବସେନାକୁ ଅନୁମତି ଦେଇଥିଲେ । କେବଳ ଏତିକି ନୁହେଁ, ଏହି ସମୟରେ କୋର୍ଟ କହିଛନ୍ତି ଯେ ଶିବସେନାର ଆବେଦନକୁ ପ୍ରତ୍ୟାଖ୍ୟାନ କରିବା ଠିକ୍ ନୁହେଁ । ଶୁକ୍ରବାର ଦିନ ପ୍ରାୟ ସାଢେ ତିନି ଘଣ୍ଟା ଧରି ହାଇକୋର୍ଟରେ ଏନେଇ ତର୍କବିତର୍କ ଜାରି ରହିଥିଲା । ଶିବସେନା, ବିଏମସି ଏବଂ ସିନ୍ଦେଙ୍କ ଗୋଷ୍ଠୀର ଓକିଲମାନେ ସେମାନଙ୍କ ପକ୍ଷ ବୁଝାଇବାକୁ ଚେଷ୍ଟା କରିଥିଲେ । ସମସ୍ତଙ୍କ ଯୁକ୍ତି ଶୁଣିବା ପରେ ହାଇକୋର୍ଟ କହିଛନ୍ତି ଯେ ବିଏମସିର ନିଷ୍ପତ୍ତି ଠିକ ନୁହେଁ ।
ଏହି ସମୟରେ, କୋର୍ଟଙ୍କ ସର୍ତ୍ତ ଅନୁଯାୟୀ, ଠାକୁରଙ୍କ ଓକିଲମାନେ ଆଇନ ଶୃଙ୍ଖଳା ରକ୍ଷା କରିବେ ବୋଲି ଆଶ୍ୱାସନା ଦେଇଥିଲେ । ବମ୍ବେ ହାଇକୋର୍ଟ କହିଛନ୍ତି ଯେ ସମଗ୍ର ଘଟଣାର ଭିଡିଓ ରେକର୍ଡିଂ ବାଧ୍ୟତାମୂଳକ ରହିବ ଏବଂ ଯଦି ଆବେଦନକାରୀ ଆଇନ ଶୃଙ୍ଖଳା ପରିସ୍ଥିତି ପାଇଁ ଦାୟୀ ବୋଲି ଜଣାପଡେ ତେବେ ଭବିଷ୍ୟତରେ ସେମାନଙ୍କ ଅନୁମତି ପ୍ରଭାବିତ ହେବ । ଉଲ୍ଲେଖ ଥାଉ କି ୧୯୬୬ ମସିହାରେ ଅର୍ଥାତ୍ ପ୍ରାୟ ୫୪ ବର୍ଷ ପୂର୍ବେ ସ୍ୱର୍ଗତଃ ବାଲ ଠାକରେ ଶିବସେନା ଗଠନ କରିଥିଲେ । ତା’ପରେ ପ୍ରଥମ ଥର ପାଇଁ ଦଶହରା ଅବସରରେ ଶିବାଜୀ ପାର୍କରେ ଏକ ରାଲିର ଆୟୋଜନ କରାଯାଇଥିଲା । ଏହି କାରଣରୁ ଏହା ସେନାର ଏକ ପ୍ରମୁଖ ଘଟଣା ପାଲଟିଛି ଦଳୀୟକର୍ମୀମାନେ ମଧ୍ୟ ଏହି ରାଲିକୁ ଅପେକ୍ଷା କରିଛନ୍ତି, ଯାହା ଗତ ଦୁଇ ବର୍ଷ ମଧ୍ୟରେ କରୋନାଭାଇରସ୍ ମହାମାରୀ ଦ୍ୱାରା ହୋଇପାରିନଥିଲା ।
ଏହି ଦୁଇ ବର୍ଷ ମଧ୍ୟରେ ଅଡିଟୋରିୟମରେ ଏହି ରାଲି ଅନୁଷ୍ଠିତ ହୋଇଥିଲା । ୨୦୨୦ ମସିହାରେ, ଶିବସେନା କର୍ମୀମାନେ ଭରଚୁଆଲ ମାଧ୍ୟମରେ ଏହି ରାଲିରେ ଯୋଗ ଦେଇଥିବାବେଳେ ୨୦୨୧ ମସିହାରେ ୫୦ ପ୍ରତିଶତ କ୍ଷମତା ମଧ୍ୟରେ ଅଡିଟୋରିୟମରେ ଏହା ଆୟୋଜିତ ହୋଇଥିଲା । ତେଣୁ ଚଳିତବର୍ଷ ବଡ ଆକାରରେ ଏହି ରାଲି କରି କର୍ମୀମାନଙ୍କୁ ଏକାଠି କରିବାକୁ ଉଦ୍ଧବ ଅଣ୍ଟା ଭିଡ଼ିଥିଲେ ତେଣୁ ଅଗଷ୍ଟ ୨୨ରେ, ଶିବାଜୀ ପାର୍କରେ ରାଲି ପାଇଁ ଉଦ୍ଧବ କ୍ୟାମ୍ପ ଦ୍ୱାରା ଆବେଦନ କରାଯାଇଥିଲା । ଅନ୍ୟପଟେ ଅଗଷ୍ଟ ୩୦ରେ, ବିଦ୍ରୋହୀ ବିଧାୟକ ସଦା ସର୍ବକାର ମଧ୍ୟ ଏକ ରାଲି ପାଇଁ ବିଏମସି ନିକଟକୁ ଯାଇଥିଲେଛ ଆଉ ଦୁହିଁଙ୍କ ମଧ୍ୟରେ ଥିବା କନ୍ଦଳକୁ ଦେଖି ବିଏମସି ଉଭୟଙ୍କୁ ଅନୁମତି ଦେବାକୁ ମନା କରିଦେଇଥିଲ ।
Comments are closed.