ଭୁବନେଶ୍ୱର : ଏଣିକି ଡିଭାଇଡରରେ ଲାଗିବ ତୁଳସୀ ଗଛ । ଏନେଇ ସବୁ ପୌର ପ୍ରଶାସନକୁ ନିର୍ଦ୍ଦେଶ ଦେଇଛନ୍ତି ଗୃହ ନିର୍ମାଣ ଓ ନଗର ଉନ୍ନୟନ ମନ୍ତ୍ରୀ କୃଷ୍ଣଚନ୍ଦ୍ର ମହାପାତ୍ର । ଆସନ୍ତା ୨୦ ତାରିଖ ଦିନ ଏହି ଅଭିଯାନରେ ବ୍ୟାପକ ଭାବରେ ସହଭାଗିତା କରିବାକୁ ମନ୍ତ୍ରୀ ପରାମର୍ଶ ଦେଇଛନ୍ତି । ଏହି ପଦକ୍ଷେପର ଲକ୍ଷ୍ୟ ହେଉଛି ସହରରେ ଅମ୍ଳଜାନ ସ୍ତର ବୃଦ୍ଧି କରିବା ଏବଂ ଲୋକଙ୍କୁ ଭଲ ଅମ୍ଳଜାନ ଯୋଗାଇବା ।
ଦିନକୁ ଦିନ ବାୟୁମଣ୍ଡଳରେ ଅମ୍ଳଜାନ ପରିମାଣ କମିବାରେ ଲାଗିଛି । ତେଣୁ ସହରର ଡିଭାଇଡ଼ର ଗୁଡିକରେ ତୁଳସୀ ଗଛ ଲଗାଇଲେ, ଏହା ବାୟୁମଣ୍ଡଳରେ ଅମ୍ଲଜାନର ମାତ୍ରା ବଢ଼ାଇବାରେ ସହାୟକ ହେବ ତଥା ଟ୍ରାଫିକ ପୋଷ୍ଟରେ ଦୀର୍ଘ ସମୟ ଧରି ଠିଆ ହେଉଥିବା ଲୋକେ ସହଜରେ ଅମ୍ଳଜାନ ପାଇପାରିବେ I ତେଣୁ ଏହାକୁ ମଧ୍ୟ ଫୋକସରେ ରଖାଯାଇଛି ବୋଲି ଗୃହ ନିର୍ମାଣ ଓ ନଗର ଉନ୍ନୟନ ମନ୍ତ୍ରୀ କୃଷ୍ଣଚନ୍ଦ୍ର ମହାପାତ୍ର କହିଛନ୍ତି ।
ରାଜ୍ୟ ସରକାରଙ୍କ ଏକ ବର୍ଷ ପୂର୍ତ୍ତି ଅବସରରେ ତୁଳସୀ ଗଛ ସହ ଅନ୍ୟ ସବୁ ଗଛ ଲଗାଇବାକୁ ପରମର୍ଶ ଦିଆଯାଇଛି । ଏହି ଦିନ ଏକକାଳୀନ ଭାବରେ ସହରାଞ୍ଚଳର ଅନେକ ସ୍ଥାନରେ ଶହ ଶହ ଗଛ ଲଗାଯିବ । ‘ମା ପାଇଁ ଗଛଟିଏ’ ଅଭିଯାନରେ ସେଦିନ ପ୍ରତ୍ୟକ ଘର, କାର୍ଯ୍ୟାଳୟ, ଅନୁଷ୍ଠାନରେ ତୁଳସୀ ଗଛ ଲଗାଇବା ପାଇଁ କୁହାଯାଇଛି ।
Comments are closed.