ବାରିପଦା : ଆଜି ମହାମହିମ ରାଷ୍ଟ୍ରପତି ଦ୍ରୌପଦୀ ର୍ମୁର୍ମୁଙ୍କ ୩ଦିନିଆ ଓଡ଼ିଶା ଗସ୍ତର ଶେଷ ଦିନ । ଅନ୍ତିମ ଦିନରେ ମହାରାଜା ଶ୍ରୀରାମଚନ୍ଦ୍ର ଭଞ୍ଜଦେଓ ବିଶ୍ୱବିଦ୍ୟାଳୟର ସମାବର୍ତ୍ତନ ଉତ୍ସବରେ ସାମିଲ ହୋଇଥିଲେ ରାଷ୍ଟ୍ରପତି I ତେବେ ଏହି ସମାବର୍ତ୍ତନ ସମାରୋହରେ ହୋଇଥିଲା ଏକ ଗୁରୁତର ବିଭ୍ରାଟ I ଦୀକ୍ଷାନ୍ତ ସମାରୋହରେ ରାଷ୍ଟ୍ରପତି ଦ୍ରୌପଦୀ ମୁର୍ମୁୁ ଭାଷଣ ଦେବାର କିଛି ସମୟ ପରେ ଅଚାନକ ବିଜୁଳି ଚାଲି ଯାଇଥିଲା । ଦିନ ୧୧ଟା ୫୬ରୁ ୧୨ଟା ୦୫ ପର୍ଯ୍ୟନ୍ତ ବିଜୁଳି ନଥିଲା I ୯ ମିନିଟ ଧରି ବିନା ବିଜୁଳିରେ ଡାଏସ୍ ଉପରେ ଲାଗିଥିବା ଝାପସା ବା ମିଞ୍ଜି ମିଞ୍ଜି ଆଲୁଅରେ ନିଜର ଅଭିଭାଷଣ ରଖିଥିଲେ ରାଷ୍ଟ୍ରପତି I ତେବେ ବିନା ବିଜୁଳିରେ ସ୍ଥିତିକୁ ସମ୍ଭାଳିବାକୁ ଯାଇ ମହାମହିମ ଦେଇଥିଲେ ସକାରାତ୍ମକ ବାର୍ତ୍ତା I ଏହି ସମୟରେ ସେ ମାୟାଧର ମାନସିଂହଙ୍କ ଅନୁବାଦ କବିତାରୁ ପଦେ ଗାଇଥିଲେ ରାଷ୍ଟ୍ରପତି। ‘ସୁନ୍ଦର ଯେତିକି ଅନ୍ଧାର ସେତିକି ଏଇ ଯେ ଗହନ ବନ… ତେଣୁ ତୁ ଆପଣା ସଂକଳ୍ପେ ଅଟଳ, ଅଚଳ ରହରେ ମନ’ I
ସୂଚନାନୁସାରେ,ଆଜି ରାଷ୍ଟ୍ରପତି ୮ ଜଣଙ୍କୁ ଡିଲିଟ୍ ଉପାଧି ସହିତ ୯୦ ଜଣ ଗବେଷକଙ୍କୁ ପିଏଚଡି ଓ ୩୪ ଜଣ କୃତି ଛାତ୍ରଛାତ୍ରୀଙ୍କୁ ସ୍ୱର୍ଣ୍ଣପଦକ ପ୍ରଦାନ କରିଛନ୍ତି । ଏହାପରେ ୧୨ଟା ୨୫ରେ ରାଷ୍ଟ୍ରପତି ବାରିପଦା ହେଲିପ୍ୟାଡ୍ରୁ କୋଲେଇକୁଣ୍ଡା ଦେଇ ପାଲମ ଏୟାରପୋର୍ଟ ଅଭିମୁଖେ ଯାତ୍ରା କରିବାର କାର୍ଯ୍ୟକ୍ରମ ରହିଛି।
Comments are closed.