ଭୁବନେଶ୍ୱର : ଆଜି ହେଉଛି ଗୁରୁ ପୂର୍ଣ୍ଣିମା । ଦେଶବ୍ୟାପୀ ଗୁରୁଙ୍କୁ ପୂଜାର୍ଚ୍ଚନା କରାଯାଉଛି । ଆଷାଢ ମାସର ଶୁକ୍ଳ ପକ୍ଷରେ ପଡ଼ୁଥିବା ପୂର୍ଣ୍ଣିମାରେ ମହାଭାରତର ରଚୟିତା ବ୍ୟାସଦେବଙ୍କର ଜନ୍ମ ହୋଇଥିବାରୁ ଏହାକୁ ବ୍ୟାସ ପୂର୍ଣ୍ଣିମା ମଧ୍ୟ କୁହାଯାଏ । ଏହି ଦିନ ଦେବଗୁରୁ ବୃହଷ୍ପତ୍ତିଙ୍କ ପୂଜା ମଧ୍ୟ କରାଯାଇଥାଏ । ସଂସାର ଯାତ୍ରାରେ ଜୀବନ ନୌକାକୁ ପାର କରାଇବାପାଇଁ ଜଣେ ଦୀକ୍ଷା ଗୁରୁଙ୍କ ଆବଶ୍ୟକ ହୋଇଥାଏ । ତାଙ୍କରି ମାର୍ଗଦର୍ଶନ ଜୀବନର ଆଲୋକ ବର୍ତ୍ତିକା ସଦୃଶ ହୋଇଥାଏ । ଜୀବନରେ ଗୁରୁଙ୍କ ବିନା ଏ ସଂସାର ଅନ୍ଧକାର ମୟ । ପିତା ଓ ମାତା ଆମର ପ୍ରଥମ ଗୁରୁ । ଏହା ବାଦ ଶିକ୍ଷା ଗୁରୁ ଏବଂ ଦିକ୍ଷା ଗୁରୁ । ଜୀବନ ଯାତ୍ରାରେ ଯିଏ ମାର୍ଗ ଦର୍ଶନ କରିଥାଆନ୍ତି ତାଙ୍କୁ ହିଁ ଆମେ ଗୁରୁରୂପେ ଗ୍ରହଣ କରିଥାଉ । ସେହି ଗୁରୁଙ୍କୁ ସମର୍ପିତ ଏହି ପବିତ୍ର ଦିନ ।
ଶାସ୍ତ୍ର ଅନୁସାରେ ଆଷାଢ଼ ପୂର୍ଣ୍ଣିମା ଦିନ ପରାଶର ଋଷି ଏବଂ ଧୀବର କନ୍ୟା ମାତା ସତ୍ୟବତୀଙ୍କ ଗର୍ଭରୁ ମହର୍ଷି ବେଦବ୍ୟାସ ଗଙ୍ଗାନଦୀ ଗର୍ଭସ୍ଥ କୃଷ୍ଣଦ୍ୱୀପରେ ଜନ୍ମଗ୍ରହଣ କରିଥିଲେ । ପ୍ରଥମେ ମହର୍ଷି ବେଦବ୍ୟାସ ବେଦ ଶିକ୍ଷା ପ୍ରଦାନ କରିଥିଲେ । ତେଣୁ ତାଙ୍କୁ ହିନ୍ଦୁ ଧର୍ମରେ ପ୍ରଥମ ଗୁରୁର ମାନ୍ୟତା ଦିଆଯାଇଛି । ଏହି କାରଣରୁ ଗୁରୁ ପୂର୍ଣ୍ଣିମାଙ୍କୁ ବ୍ୟାସ ପୂର୍ଣ୍ଣିମା ମଧ୍ୟ କୁହାଯାଏ । ସେ ବ୍ରହ୍ମସୂତ୍ର, ମହାଭାରତ, ଶ୍ରୀମଦ୍ ଭାଗବତ ଏବଂ ଅଷ୍ଟପୁରାଣ ଗ୍ରନ୍ଥ ମଧ୍ୟ ରଚନା କରିଛନ୍ତି ।
ଆଜିର ଦିନଟିକୁ ସର୍ବଧମ ନିର୍ବିଶେଷରେ ସମସ୍ତେ ପାଳନ କରିଥାନ୍ତି । କେବଳ ହିନ୍ଦୁମାନେ ନୁହେଁ ବୌଦ୍ଧ, ଜୈନ ଏବଂ ଶିଖ ଧର୍ମରେ ମଧ୍ୟ ଗୁରୁ ପୂର୍ଣ୍ଣିମାର ବିଶେଷ ମହତ୍ୱ ରହିଛି । ସେହିପରି ଭାରତ ସହିତ ନେପାଳ ଏବଂ ଭୁଟାନରେ ମଧ୍ୟ ଏହି ପବିତ୍ର ଦିନକୁ ପାଳନ କରାଯାଇଥାଏ । ଆଜି ର ଦିନରେ ଭଗବାନ ଗୌତମ ବୁଦ୍ଧ ବୋଧି ବୃକ୍ଷ ତଳେ ଜ୍ଞାନ ପ୍ରାପ୍ତି ପରେ, ବୋଧଗୟାରୁ ସାରନାଥ ଯାତ୍ରା କରି ପୂର୍ଣ୍ଣିମା ଦିନ ନିଜର ଉପଦେଶ ଦେଇଥିଲେ। ତେଣୁ ବୁଦ୍ଧଙ୍କ ଅନୁଗାମୀମାନେ ଏହି ଦିନ ତାଙ୍କୁ ପୂଜା କରିଥାନ୍ତି । ତେଣୁ ବୁଦ୍ଧଙ୍କ ଅନୁଗାମୀଙ୍କ ପାଇଁ ଏହି ଦିନ ବେଶ ମହତ୍ୱପୂର୍ଣ୍ଣ ଅଟେ ।
Comments are closed.