ଭୁବନେଶ୍ୱର : ଆଜି ମାର୍ଚ୍ଚ ୫ ତାରିଖ ଇ ଓଡ଼ିଶାର ବରପୁତ୍ର ତଥା ମହାନ ଜନ ନାୟକ ବିଜୁ ପଟ୍ଟନାୟକଙ୍କର ୧୦୯ତମ ଜୟନ୍ତୀ । ବିଜୁ ବାବୁ ଥିଲେ ଏକ ଅଦ୍ୱିତୀୟ ବ୍ୟକ୍ତିତ୍ୱ ସମ୍ପନ୍ନ ପ୍ରବାଦ ପୁରୁଷ । ସେ ଥିଲେ ଝଡର ଇଗଲ,ଦୁର୍ଦ୍ଧଶ ପାଇଲଟ । ଓଡ଼ିଆ ସ୍ୱାଭିମାନ ଓ ସଂକଳ୍ପର କିମ୍ବଦନ୍ତୀ ପୁରୁଷ ବିଜୁ ପଟ୍ଟନାୟକ । ଓଡିଆଙ୍କ ଗର୍ବ ଏବଂ ଗୌରବ। ନୂଆ ଓଡ଼ିଶା ଗଠନ କରିବାରେ ତାଙ୍କର ଥିଲା ପ୍ରମୁଖ ଭୂମିକା । ସାହସୀ ଓ ନିର୍ଭିକ ବ୍ୟକ୍ତିତ୍ବ ଭାବେ ପ୍ରତିଟି ଓଡ଼ିଆଙ୍କ ମନରେ ସେ ରହିଛନ୍ତି।
ଅଧିକ ସମୟ ସେ ସତ୍ତାର ଚେୟାରରେ ବସିନଥିଲେ ସତ, ହେଲେ ଆଜି ବି ଜଣେ ମହାନ ଜନନାୟକ ଭାବେ ସେ ଲୋକଙ୍କ ହୃଦୟରେ ରାଜ୍ କରନ୍ତି । କହନ୍ତି ସେ କିଙ୍ଗ୍ ନୁହଁନ୍ତି, ନିଜେ କିଙ୍ଗ୍ ମେକର, ୟାକୁ ହିଁ ତ କୁହାଯିବ ଜନନେତା । ଯେତିକି ସାହାସୀ, ସେତିକି ଧୂରନ୍ଧର ଆଉ ସେତିକି ଦୁର୍ଦ୍ଦଷ ।
କିଏ କହେ ତାଙ୍କୁ ଏ ମାଟିର ବରପୂତ୍ର, ତ ଆଉ କିଏ କହେ ସେ କଳିଙ୍ଗ ବୀର, ହେଲେ କୋଟି କୋଟି ଓଡିଆଙ୍କ ପାଇଁ ସେ ଆଜି ବି ପ୍ରିୟର ବିଜୁ ବାବୁ । ଆଜନ୍ମ ସାହାସୀ, ଦୁର୍ଦ୍ଦଷ ମାନସିକତା ଆଉ ଏ ମାଟି ପ୍ରତି ବେବାକ୍ ଭଲପାଇବା। ପୂରା ନାଁ ବିଜୟାନନ୍ଦ ପଟ୍ଟନାୟକ, ହେଲେ ସମସ୍ତଙ୍କ ପ୍ରିୟ ବିଜୁ ବାବୁ । ତାଙ୍କ ଜନ୍ମ ଦିବସ ଅବସରରେ ସାରା ରାଜ୍ୟରେ ପାଳନ ହେଉଛି ବିଜୁ ଜୟନ୍ତୀ । ଭୁବନେଶ୍ବର ଫରେଷ୍ଟପାର୍କରେ ଥିବା ବିଜୁବାବୁଙ୍କ ପ୍ରତିମୂର୍ତ୍ତିରେ ପୁଷ୍ପାଞ୍ଜଳି ଅର୍ପଣ କରି ସ୍ମୃତିଚାରଣ କରିଛନ୍ତି ନବୀନ ପଟ୍ଟନାୟକ। ନବୀନଙ୍କ ସମେତ ବିଜେଡି ବହୁ ବରିଷ୍ଠ ନେତା ଓ ଭୁବନେଶ୍ୱର ମେୟର ମଧ୍ୟ ଉପସ୍ଥିତ ଥିଲେ।
ବିଜୁ ବାବୁ ଥିଲେ କଳିଙ୍ଗ ମାଟିର ଦ ଟଲ୍ ମ୍ୟାନ। ନବ ଉତ୍କଳର ଅନ୍ୟତମ ପୁରୋଧା । କିଏ କହେ ’ମାଟିର ବରପୁତ୍ର’ କିଏ କହେ ’ଝଡ଼ର ଇଗଲ’ । ରୋକଠୋକ୍ କଥା । ସ୍ପଷ୍ଟ, ଶାଣିତ ଓ ସାହସିକ ସ୍ବର । ତାଙ୍କର ଅଭିନବ ଉଦ୍ୟମ, ସାହସ ଏବଂ କ୍ରାନ୍ତିକାରୀ ପଦକ୍ଷେପ ଯୋଗୁଁ ସେ ସମସ୍ତଙ୍କ ମନର ମହାନାୟକ। ତାଙ୍କ ବ୍ୟକ୍ତିତ୍ୱ ଓଡିଶାବାସୀଙ୍କୁ ସବୁବେଳେ ଉଦବୁଦ୍ଧ କରିଆସିଛି, ପ୍ରେରଣା ଯୋଗାଇ ଆସିଛି। ବିଜୟାନନ୍ଦ ପଟ୍ଟନାୟକ, ସମସ୍ତଙ୍କ ପ୍ରିୟ ବିଜୁ ବାବୁ ।
୧୯୧୬ ମାର୍ଚ୍ଚ ୫ରେ କଟକ ଅନ୍ତର୍ଗତ ତୁଳସୀପୁର ଆନନ୍ଦ ଭବନରେ ଏକ ସ୍ୱାଧୀନତା ସଂଗ୍ରାମୀ ପରିବାରରେ ଜନ୍ମଗ୍ରହଣ କରିଥିଲେ । ବାପା ଲକ୍ଷ୍ମୀନାରାୟଣ ପଟ୍ଟନାୟକ ଆଉ ମାଆ ଆଶାଲତାଙ୍କ ତୃତୀୟ ସନ୍ତାନ ଥିଲେ ବିଜୁ ପଟ୍ଟନାୟକ । ପିଲାଟି ଦିନରୁ ତାଙ୍କର ପାଇଲଟ ହେବାର ନିଶା । ଆକାଶରେ ଝଡ଼ର ଇଗଲ ଭଳି ଉଡି ବୁଲିବାର ଇଚ୍ଛା । ଯେଉଁଥିପାଇଁ ସେ କଲେଜ୍ ପାଠପଢା ନସରିବା ପୂର୍ବରୁ ଚାଲିଯାଇଥିଲେ ଏରୋପ୍ଲେନ୍ ଚଲେଇବା ଶିଖିବାକୁ । ଇତିହାସ ତ ଅନେକ, ହେଲେ ନାୟକ କିନ୍ତୁ ସେହି ଜଣିଏ ‘ବିଜୁ ବାବୁ’ । ଇଣ୍ଡୋନେସିଆର ମୁକ୍ତି ସଂଗ୍ରାମ ହେଉ, କି ମୁଖ୍ୟମନ୍ତ୍ରୀ ପଦକୁ ବିନା ଭାବିଚିନ୍ତିରେ ଛାଡିବା ହେଉ, ସବୁଥିରେ ଆଗରେ ଥିଲେ ବିଜୁ ବାବୁ ।
୬୦ ଦଶକ ଆରମ୍ଭରେ ରାଜ୍ୟ କଂଗ୍ରେସର ମଙ୍ଗ ଧରିଥିଲେ ବିଜୁବାବୁ । ୧୯୫୨ରେ ଜଗନ୍ନାଥପ୍ରସାଦ ଓ ୧୯୫୭ରେ ସୋରଡ଼ା ଆସନରୁ ବିଧାୟକ ଭାବେ ନିର୍ବାଚିତ ହୋଇଥିଲେ। ୧୯୬୧ରେ ମାତ୍ର ୪୫ ବର୍ଷ ବୟସରେ ବିଜୁ ପଟ୍ଟନାୟକ ହୋଇଥିଲେ ଓଡ଼ିଶାର ମୁଖ୍ୟମନ୍ତ୍ରୀ । ମାତ୍ର ଦୁଇଥର ଓଡ଼ିଶାର ମୁଖ୍ୟମନ୍ତ୍ରୀ ଆସନରେ ବସିଥିବା ବିଜୁ ବାବୁ ୧୯୬୧ରୁ ୧୯୬୩, ୧୯୯୦ରୁ ୧୯୯୫ ଓଡ଼ିଶା ରାଜନୀତିର କିନ୍ତୁ ଛାଇ ଭଳି ଥିଲେ । ବିଜୁବାବୁଙ୍କ ନେତୃତ୍ୱରେ ୧୪୦ ଆସନରୁ ୮୨ ଆସନ ଜିତିଥିଲା କଂଗ୍ରେସ ।
ଆଧୁନିକ ଓଡ଼ିଶା ନିର୍ମାଣର ନିଅଁ ପଡ଼ିଥିଲା ବିଜୁଙ୍କ ହାତରେ। ଓଡ଼ିଶାରେ ମୁଣ୍ଡ ଟେକିଥିଲା ବହୁ ଶିଳ୍ପ, କଳ କାରଖାନା । ଗାଁର ବିକାଶ ସହ ଘରେ ଘରେ ପାନୀୟ ଜଳ, ଶିକ୍ଷା, ସ୍ବାସ୍ଥ୍ୟ ଓ ମହିଳା ସଶକ୍ତୀକରଣ ପାଇଁ ସ୍ବପ୍ନ ଦେଖିଥିଲେ ବିଜୁ ପଟ୍ଟନାୟକ। ବିଜୁବାବୁଙ୍କର ସ୍ବପ୍ନକୁ ପୂରଣ କରିବାକୁ ବିଜୁ ଜନତା ଦଳ ପକ୍ଷରୁ ପ୍ରୟାସ ଜାରି ରହିଛି। ମା’କୁ ସମ୍ମାନ, ଗାଁକୁ କାମ କଥା କହିଥିଲେ ସ୍ଵର୍ଗତ ବିଜୁ ପଟ୍ଟନାୟକ। ଏହି ନୀତି ଆଦର୍ଶକୁ ନେଇ ବିଜୁ ଜନତା ଦଳ ପକ୍ଷରୁ ରାଜ୍ୟର ବିକାଶ ଲାଗି ସର୍ବଦା ପ୍ରୟାସ ଜାରି ରହିଛି।
Comments are closed.