ରାୟପୁର : ଆଜି ଛତିଶଗଡର ରାୟପୁରରେ କଂଗ୍ରେସର ଜାତୀୟ ସମ୍ମିଳନୀ ଆରମ୍ଭ ହୋଇଛି । ୨୦୨୪ ଲୋକସଭା ନିର୍ବାଚନ ପୂର୍ବରୁ କଂଗ୍ରେସ ଡ଼କାଇଛି ଏହି ଗୁରୁତ୍ୱପୂର୍ଣ୍ଣ ବୈଠକ । ଏହି ବୈଠକରେ ‘କଂଗ୍ରେସ ୱାର୍କିଙ୍ଗ୍ କମିଟି’ କାର୍ଯ୍ୟକର୍ତ୍ତା ନିର୍ବାଚନ ବିଷୟରେ ଆଲୋଚନା ହେବ, କିନ୍ତୁ ଏହି ବୈଠକରୁ ଦୂରେଇ ରହିଛନ୍ତି ପୂର୍ବତନ କଂଗ୍ରେସ ସଭାପତି ସୋନିଆ ଗାନ୍ଧୀଙ୍କ ସମେତ ପୁରା ପରିବାର I ନବ ନିର୍ବାଚିତ କଂଗ୍ରେସ ସଭାପତି ମଲ୍ଲିକାର୍ଜୁନ ଖଡଗେ ଏହି ବୈଠକର ନେତୃତ୍ୱ ନେବେ।
ସମ୍ମିଳନୀର ପ୍ରଥମ ଦିନରେ ସୋନିଆ ଗାନ୍ଧୀ, ରାହୁଲ ଗାନ୍ଧୀ ଏବଂ ପ୍ରିୟଙ୍କା ଗାନ୍ଧୀ ଭଦ୍ରା ଏହି ବୈଠକରୁ ଦୂରେଇ ରହିବେ I ଦଳର ଶୀର୍ଷ ଆଲୋଚନା ବେଳେ ନୂତନ କଂଗ୍ରେସ ଅଧ୍ୟକ୍ଷ ମଲ୍ଲିକାର୍ଜୁନ ଖଡ଼ଗେଙ୍କୁ ସ୍ବାଧୀନତା ଦେବା ଓ ତାଙ୍କ ନିଷ୍ପତ୍ତିଗୁଡ଼ିକୁ କୌଣସି ପ୍ରକାରେ ପ୍ରଭାବିତ ନ କରିବା ଲାଗି ଗାନ୍ଧୀମାନେ ଚାହୁଁଛନ୍ତି। କିନ୍ତୁ, ସେମାନେ ଏହି କନ୍କ୍ଲେଭ୍ ବା ଅଧିବେଶନର ବାକି କାର୍ଯ୍ୟକ୍ରମରେ ଯୋଗ ଦେଇ ୨୦୨୪ ଜାତୀୟ ନିର୍ବାଚନ ଉପରେ ବିଚାର ଆଲୋଚନା କରିବେ। କଂଗ୍ରେସ ଗୋଟିଏ ପଟେ ଆଭ୍ୟନ୍ତରୀଣ ନିର୍ବାଚନ ପାଇଁ ପ୍ରସ୍ତୁତ ହେଉଥିବା ବେଳେ ଅନ୍ୟପଟେ ୨୦୨୪ ସାଧାରଣ ନିର୍ବାଚନ ପାଇଁ ରଣନୀତି ପ୍ରସ୍ତୁତ କରୁଛି। ଏଥିପାଇଁ ରାୟପୁରରେ ଦଳ ଆଜି ଠାରୁ ୮୫ତମ ମହାଅଧିବେଶନ ଆରମ୍ଭ କରିଛି।
କଂଗ୍ରେସ ବାରମ୍ବାର ନିର୍ବାଚନ ହାରୁ ଥିବା ବେଳେ ଦଳ ଭିତରୁ ପରିବର୍ତ୍ତନର ସ୍ୱର ଉଠିଥିଲା। ବରିଷ୍ଠ ନେତାମାନେ ସାଂଗଠନିକ ପରିବର୍ତ୍ତନ ପାଇଁ ଦାବି କରିବାରୁ ସୋନିଆ ଗାନ୍ଧି ଶେଷରେ ୧୩୭ ବର୍ଷ ପୁରୁଣା କଂଗ୍ରେସ ଦଳର କମାଣ ନିର୍ବାଚନ ଦ୍ୱାରା ଖଡଗେଙ୍କୁ ହସ୍ତାନ୍ତର କରିଛନ୍ତି। ଏବେ ଖଡଗେ କେମିତି ଦଳକୁ ଆଗକୁ ନେଉଛନ୍ତି, ତା’ ଉପରେ ସମସ୍ତଙ୍କ ନଜର ରହିଛି।
Comments are closed.