ମୁମ୍ବାଇ : ସଂଗୀତ ଜଗତ ପାଇଁ ଆଉ ଏକ ଦୁଖଦଃ ଖବର I ସୁପ୍ରସିଦ୍ଧ ଗାୟିକା ପଦ୍ମ ଭୂଷଣ ବାଣୀ ଜୟରାମଙ୍କ ୭୭ ବର୍ଷ ବୟସରେ ଦେହାନ୍ତ ହୋଇଛି। ଚେନ୍ନାଇର ନୁଙ୍ଗମ୍ବକ୍କମସ୍ଥିତ ତାଙ୍କ ଘରେ ବାଣୀ ଜୟରାମଙ୍କ ପରଲୋକ ଘଟିଛି I ତାଙ୍କ ମୃତ୍ୟୁ ଖବରକୁ ନେଇ ଏବେ ଦେଶର ସଂଗୀତ ଦୁନିଆରେ ଶୋକର ଲହରୀ ଖେଳିଯାଇଛି। ଚେନ୍ନାଇ ପୋଲିସ ସୂଚନାନୁସାରେ ବାଣୀ ଜୟରାମଙ୍କୁ ତାଙ୍କ ଘରେ ମୃତଦେହ ମିଳିଛି । ତେବେ ଏପର୍ଯ୍ୟନ୍ତ ମୃତ୍ୟୁର କାରଣ ଅସ୍ପଷ୍ଟ ରହିଛି I
ସଂଗୀତ ଶିଳ୍ପରେ ଭାନି ଜୟରାମ ଏକ ବହୁତ ଲୋକପ୍ରିୟ ନାମ I ନିକଟରେ ବାଣୀ ଜୟରାମ ଜଣେ ସଫଳ ଗାୟିକା ଭାବରେ ସଙ୍ଗୀତ ଶିଳ୍ପରେ ୫୦ ବର୍ଷ ପୂରଣ କରିଥିଲେ। ଏକ ଶାସ୍ତ୍ରୀୟ ସଙ୍ଗୀତକାର ପରିବାରରେ ଜନ୍ମଗ୍ରହଣ କରିଥିବା ବାଣୀ ଜୟରାମ ୧୯୭୧ ମସିହାରେ ପ୍ରଚ୍ଛଦପଟ୍ଟ ଗାୟିକା ଭାବେ କଣ୍ଠଦାନ କରିଥିଲେ। ନ୍ୟାସନାଲ ଫିଲ୍ମ ପୁରସ୍କାର ସହ ରାଜ୍ୟ ସରକାରଙ୍କ ପୁରସ୍କାର ମଧ୍ୟ ଲାଭ କରିଛନ୍ତି। ସେ ନିଜ କ୍ୟାରିୟରରେ ବିଭିନ୍ନ ଭାଷାରେ ୧୦,୦୦୦ରୁ ଅଧିକ ଗୀତ ଗାଇ ରେକର୍ଡ କରିଥିଲେ। ବାଣୀ ଜୟରାମ ଆର୍ ଡି ବର୍ମନ, କେ.ଭି ମହାଦେବନ, ଓପି ନାୟାର ଏବଂ ମଦନ ମୋହନଙ୍କ ସମେତ ବଲିଉଡର ଅନ୍ୟାନ୍ୟ ପ୍ରସିଦ୍ଧ ସଂଗୀତ ନିର୍ଦ୍ଦେଶକଙ୍କ ସହ ମଧ୍ୟ କାମ କରିଥିଲେ। ଓଡ଼ିଆ ସିନେମାରେ ମଧ୍ୟ ଅନେକ ଚଳଚ୍ଚିତ୍ରରେ କଣ୍ଠଦାନ କରିଛନ୍ତି ବାଣୀ ଜୟରାମ। ଶେଷ ଶ୍ରାବଣ, ବନ୍ଧୁ ମହାନ୍ତି, ରାମାୟଣ ସିନେମାରେ କଣ୍ଠଦାନ କରି ଶ୍ରୋତାଙ୍କ ମଧ୍ୟରେ ବେଶ ଲୋକପ୍ରିୟତା ଅର୍ଜନ କରିପାରିଥିଲେ I
ବାଣୀ ଜୟରାମଙ୍କୁ ଜାନୁଆରି ୨୫ରେ ଭାରତ ସରକାର ଦେଶର ତୃତୀୟ ସର୍ବୋଚ୍ଚ ସମ୍ମାନ ପଦ୍ମ ଭୂଷଣ ପୁରସ୍କାରରେ ସମ୍ମାନିତ କରିଥିଲେ। ବାନି ଜୟରାମଙ୍କୁ ଆଧୁନିକ ଭାରତର ମୀରା କୁହାଯାଉଥିଲା। ମହିଳା ପ୍ଲେବ୍ୟାକ୍ ସିଙ୍ଗର ପାଇଁ ସେ ତିନିଥର ଜାତୀୟ ଚଳଚ୍ଚିତ୍ର ପୁରସ୍କାର ପାଇଛନ୍ତି I ଏହା ବ୍ୟତୀତ ସେ ତାମିଲନାଡୁ, ମହାରାଷ୍ଟ୍ର, ଆନ୍ଧ୍ରପ୍ରଦେଶ, କେରଳ, ଗୁଜୁରାଟ ଏବଂ ଓଡିଶାରୁ ମଧ୍ୟ ଅନେକ ପୁରସ୍କାର ପାଇଛନ୍ତି। ତାଙ୍କ ସମୟରେ ସେ ସଙ୍ଗୀତ ଶିଳ୍ପକୁ ଶିଖରରେ ପହଞ୍ଚାଇ ପାରିଥିଲେ I ବାଣୀ ଜୟରାମଙ୍କ ହଠାତ ବିୟୋଗ ସଙ୍ଗୀତ ଜଗତକୁ ସ୍ତବ୍ଧ କରିଦେଇଛି I
Comments are closed.